جول اپاتى بۇگىن تۇنگى ساعات ءۇش شاماسىندا جالاعاش اۋدانىنا قاراستى تاڭ اۋىلى تۇسىنداعى «سامارا-شىمكەنت» اۆتوجولىنىڭ بويىندا بولعان.
«وقيعا ورنىندا 27 جاستاعى ازاماتتىڭ باسقارۋىنداعى «Toyota Camry» جانە 42 جاستاعى ازاماتتىڭ باسقارۋىنداعى «Daewoo-Nexia» جەڭىل اۆتوكولىكتەرى سوقتىعىسقان. سالدارىنان ەكى جۇرگىزۋشى, «Daewoo-Nexia» كولىگىندەگى تۇركىستان وبلىسى ورداباسى اۋدانىندا تۇراتىن 42 جاستاعى جولاۋشى, 6, 10 جاستاعى ەكى بالا كوز جۇمدى», دەپ ءمالىم ەتتى قىزىلوردا وبلىستىق توتەنشە جاعدايلار دەپارتامەنتىنەن.
ۆەدومستۆو مالىمەتىنشە, وقيعا ورنىندا توتەنشە جاعدايلار دەپارتامەنتى, «جوسالى» كۇرەجول مەديتسينالىق بەكەتى, جەدەل جاردەم بريگاداسى, اۋداندىق پوليتسيا بولىمىنەن كەلگەن ماماندار ءتيىستى جۇمىستار اتقارعان.
«اتالعان دەرەك بويىنشا قر قىلمىستىق كودەكسىنىڭ 345-بابى 4-بولىگىمەن (كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى) سوتقا دەيىنگى تەرگەپ-تەكسەرۋ باستالدى. ءتيىستى ساراپتامالار تاعايىندالدى. وقيعانىڭ ءمان-جايى انىقتالىپ جاتىر», دەدى قىزىلوردا وبلىستىق پوليتسيا دەپارتامەنتىنەن.
