ءوز جاستارىنىڭ الەۋەتىن ءتيىمدى پايدالانىپ كەلە جاتقان ەلدەر تاجىريبەلى باعبان سەكىلدى. ويتكەنى ولار ءبىرىنشى كەزەكتە «نە ەكسە, سونى وراتىنىن» جاقسى بىلگەندىكتەن, وزدەرىنىڭ جاس بۋىنىنىڭ الەۋەتتى بولۋىنا بارىنشا مۇددەلى. ال جاستارىمىز ەلىمىزدىڭ بولاشاعى ەكەنىن بارىنەن دە جاقسى بىلەتىن ءبىز وسى سالادا ارەكەتسىزدىك تانىتىپ وتىرعاندايمىز.
ءوز جاسىنا ءۇمىت پەن سەنىم ارتپاعاننىڭ بولاشاعى ب ۇلىڭعىر. ءبىز جاس بۋىنعا, ونىڭ ىشىندە دارىندى, تالاپتى, كوكىرەگى وياۋ جاستارىمىزدىڭ وزىنە «بولامىن دەگەن بالانىڭ بەتىن قاقپا, بەلىن بۋ» دەپ, ەكى تىزگىن, ءبىر شىلبىردى بەرگىمىز جوق. ءجۇرىپ كەلە جاتقان جولىمىز – باياعى جاعىمسىز ءۇردىس – جالىنداعان جاسىمىزدى ابدەن وكپەسىن ءوشىرىپ, سىلىكپەسىن شىعارىپ, اعا بۋىننىڭ بويىنداعى جات قىلىقتار مەن ادەتتەردى جۇقتىرتىپ بارىپ, ەلۋدەن اسقاندا, بولدىرا باستاعاندا, ەرىك-جىگەرىنەن جۇقالتىم ءبىر نارسە قالعاندا عانا جاۋاپكەرشىلىك جۇكتەيمىز. ەسىل جاستىق جالىن, قارقىن ايدالادا قالىپ قويادى. وسىناۋ تاپتاۋرىن جول قاشانعى جالعاسپاق؟ قوعامعا زارداپتى, ۋاقىت تالابىنا جاۋاپ بەرە المايتىن بۇل جول بىرەۋلەر ءۇشىن ءتيىمدى بولعاندىقتان عانا ءارى قاراي جالعاسا بەرە مە؟
ءالى كۇنگە دەيىن «جاستارىمىز ءوز الەۋەتىن تولىق پايدالانۋ ءۇشىن قانداي جاعدايلار جاسالدى؟» دەگەن سۇراققا جاۋاپ رەتىندە ۇكىمەتتىك دەڭگەيدە تولىققاندى قاندايدا ءبىر بايانداما ۇسىنىلعان جوق. سونداي-اق «ەرىك-جىگەرى تاسىعان, ءبىلىمدى, پاتريوت, مەملەكەتتىڭ قولداۋىمەن قالاعان ماماندىعىن يگەرگەن جاستارىمىزدىڭ الەۋەتىن ەلدىڭ, حالىقتىڭ يگىلىگىنە باعىتتاي الدىق پا؟» دەگەن ساۋال دا جاۋابىن كۇتىپ تۇر.
كەز كەلگەن جاس ءوز جەرىندە ەڭبەك ەتۋ ارقىلى الەۋمەتتىك جاعدايىن جاساۋىنا, ەڭسەسىن تىك ۇستاپ جۇرۋىنە مۇمكىندىك بەرىلمەسە, ولاردىڭ ءبىر بولىگى وزگەنىڭ كۇش-جىگەرىنە, اقىل-ويىنا اينالادى نەمەسە توڭكەرىس تولقىنىن تۋدىراتىن دولى كۇش بولادى. بۇعان ءوز ەلىمىزدەگى احۋال – ۋاقىتشا جۇمىس ىستەپ كەلۋگە نەمەسە تۇراقتى تۇرۋعا سىرت ەلگە كەتىپ جاتقان جاستارىمىز بەن «قاسىرەتتى قاڭتار» وقيعاسىندا شەرۋگە شىعىپ, اقىرىندا الدەبىر كۇشتەرگە ارانداعان جاس بۋىن وكىلدەرىن مىسال رەتىندە ايتۋعا بولادى. راس, جاستارعا مەملەكەت تاراپىنان قولداۋ كورسەتىلىپ جاتىر, مۇنى جوققا شىعارا المايمىز. بىراق بۇل كوتەرمەلەۋلەردىڭ بارلىعى جاستاردى قاناعاتتاندىرا المايدى ءارى ۋاقىت تالابىنا ساي ەمەس. ءبىز بىلەتىن قولداۋدىڭ باسىم بولىگى اتقارۋشى بيلىكتەگى جاۋاپتى تۇلعالاردىڭ قول قۋسىرىپ قاراپ وتىرماعانىن اڭعارتۋ ءۇشىن جاسالىپ جاتقان ءىس-قيمىلدار جيىنتىعى سەكىلدى كورىنەدى.
بىلىمىنە, ەڭبەگىنە ساي اقى تولەنەتىن جۇمىس ورىندارى بار, قۋلىق-سۇمدىقتان, سىبايلاس جەمقورلىقتان ادا, ەلجاندى, ءبىلىمدى جاستارىمىز ءبىلىمسىز, قابىلەتسىز, بىراق كوكە-جاكەسىنىڭ ارقاسىندا كوتەرىلگەن الدەكىمدەردىڭ قول استىندا قۇنجىڭداپ جۇرمەيتىن قوعام قالىپتاستىرۋىمىز قاجەت. بۇلاي ەتپەيىنشە, بولاشاعىن تەك شەتەلمەن بايلانىستىرا قارايتىن جاس بۋىن وكىلدەرىنىڭ قاتارى كۇن وتكەن سايىن كوبەيە بەرمەك. بۇلاردىڭ باسىم بولىگى دارىنىمەن دارالانىپ, بىلىمىمەن ەرەكشەلەنىپ, تالابىمەن توپ جارعان باۋىرلارىمىز ەكەنىن ۇمىتپايىق.
العان ماماندىعىنا ساي جۇمىس ورنىن تابۋ قيىن ءبىزدىڭ قوعامدا مىڭداپ قاجەتسىز ماماندار دايارلاۋ ءىسى ۇزدىكسىز جۇرگىزىلىپ كەلەدى. مۇددەلى قوجايىنداردىڭ قالتاسىن قالىڭداتۋ ءۇشىن جۇمىس ىستەپ تۇرعان وقۋ ورىندارىن ءبىتىرىپ شىعاتىن ون مىڭداعان جاس (دەرەكتەرگە قاراعاندا ءبىتىرۋشى تۇلەكتەردىڭ 50 پايىزى) ءوز ماماندىعى بويىنشا ەڭبەك ەتپەيدى, دۇرىسى جۇمىس تابا المايدى. ينجەنەرلەر, تەحنولوگتەر, IT ماماندار دايىندايتىن وقۋ ورىندارى جەتىسپەيدى, كەيبىرىنىڭ ءبىلىم بەرۋ ساپاسىنا كوڭىل تولمايدى. مىنە, بۇل جاعدايلار دا جاستاردى قولداپ جاتىرمىز دەگەن ءسوزدىڭ سالماعى جوق ەكەنىن نىعارلاي تۇسەدى.
قورىتا ايتقاندا, جاستاردى مەملەكەت تاراپىنان قولداۋ ساياساتىنا تۇبەگەيلى ءارى رەفورمالىق وزگەرىس كەرەك. بۇل ىستە ۇكىمەت تەك الەۋمەتتىك پاتەر بەرۋ, از-ماز جاردەماقى تولەۋ جانە ونى-مۇنى كوتەرمەلەۋ توڭىرەگىندە اينالساقتاماۋعا ءتيىس. ايتپەسە, جاستاردى بەيبىت كۇندە الەمگە جاپپاي تارىداي شاشىراتىپ الامىز. ال ولاردى ەلگە قايتا جيناۋ قيىن بولادى. باستالعالى ءبىراز بولعان, الداعى ۋاقىتتا ۇلتتىق ۇلكەن پروبلەماعا اينالۋ ىقتيمالدىعى جوعارى تارىداي شاشىراۋ ۇدەرىسىن قازىردەن توقتاتۋ بۇگىنگىنىڭ باستى مىندەتى بولۋعا ءتيىس.
