بۇل بايقاۋ بيىل ءۇشىنشى مارتە ءوتىپ وتىر. وبلىقتىق مادەنيەت باسقارماسى جانە تەرەكتى اۋدانى اكىمدىگى قولداپ وتكىزەتىن تاماشا ءان تويى پاندەميا كەزىندە توقتاپ قالعان بولاتىن. اراعا ءۇش جىل سالىپ قايتا جاندانعان سايىس كورەرمەننىڭ كوڭىلىنەن شىقتى.
ەلىمىزدىڭ ءار جەرىنەن جينالعان 20 ءانشى بايتاق دالانىڭ ءىنجۋ-مارجانى سىندى شالقار كولىندە تاماشا دەمالىس كۇندەرىن وتكىزدى. شالقار اۋىلدىق وكرۋگىنىڭ ورتالىعى ءسارىومىر اۋىلىنىڭ تاريحىمەن تانىستى. بۇل اۋىل – بەلگىلى جازۋشى حامزا ەسەنجانوۆتىڭ تۋعان جەرى. جازۋشى ەسىمىن يەلەنگەن ورتا مەكتەپتە شاعىن مۋزەي ۇيىمداستىرىلعان.
بايقاۋعا قاتىسقان ونەرپازدار ءبىرىنشى كەزەڭدە قازاقستان كومپوزيتورلارىنىڭ ەل مەن جەر, وتان تاقىرىبىنداعى اندەرىن شىرقاسا, ەكىنشى كەزەڭدە اقجايىق ءوڭىرى اقىن-كوپوزيتورلارىنىڭ شىعارمالارىن ورىندادى.
ەكى كۇنگە سوزىلعان ءان دوداسىندا «شالقار تولقىنى-2022» رەسپۋبليكالىق ءان بايقاۋىنىڭ گران-پري سىيلىعىن اتىراۋ وبلىسى, يندەر اۋدانىنان كەلگەن مۇراتبەك جۇماشەۆ جەڭىپ الدى. ءى ورىندى – ورالدىق رۋستام حافيزوۆ يەلەنسە, قازىلار القاسىنىڭ شەشىمىمەن ءىى ورىن قوستانايلىق تاسقىن ءاجىباي مەن بوكەيوردالىق راۋان قاجىعاليەۆكە بۇيىردى. ال قاراتوبەلىك رۇستەم اقتاشەۆ پەن اقتوبە وبلىسىنان كەلگەن ءانشى نۇرجان ءابجان ءىىى ورىنعا يە بولدى. بايتەرەك اۋدانىنىڭ ونەرپازى اقان جەكەكوۆ, ورال قالاسىنىڭ نامىسىن قورعاعان بالاۋسا اجگەرەەۆا جانە پاۆلودار قالاسىنان كەلگەن «سامعاۋ» كۆارتەتى بايقاۋدىڭ ديپلومانتتارى اتاندى. وزگە قاتىسۋشىلار دا العىس حاتپەن, ەسكەرتكىش سىيلىقتارمەن ماراپاتتالدى.
