ىنتىماقتاستىق كەڭەيە تۇسەدى
قازاقستان پرەزيدەنتىن اۋەجايدا كورولدىڭ كەڭەسشىسى ءارى مەككە پروۆينتسياسىنىڭ گۋبەرناتورى فەيسال حاليد بەن ابدەلازيز, سونداي-اق ساۋد ارابياسى كورولدىگىنىڭ قورشاعان ورتانى قورعاۋ, سۋ رەسۋرستارى جانە اۋىل شارۋاشىلىعى ءمينيسترى ابدۋراحمان ءال-فادلي قارسى الدى.
سودان كەيىن پرەزيدەنت رەسمي كەزدەسۋ وتكىزۋ ءۇشىن كورولدىڭ «قاسر اس-سالام» سارايىنا باردى. قۇرمەت قاراۋىلىنىڭ باستىعى ەكى ەل باسشىلارىنا راپورت بەردى. قازاقستان مەن ساۋد ارابياسىنىڭ ءانۇراندارى شىرقالعاننان كەيىن قاسىم-جومارت توقاەۆ پەن تاق مۇراگەرى مۇحاممەد بەن سالمان بەن ابدەلازيز ءال ساۋدقا رەسمي دەلەگاتسيالاردىڭ مۇشەلەرى تانىستىرىلدى.
بۇدان كەيىن مەملەكەت باسشىسى مەن تاق مۇراگەرى كەلىسسوز جۇرگىزدى. قاسىم-جومارت توقاەۆ مۇحاممەد بەن سالمان بەن ابدەلازيز ءال ساۋدقا ءىلتيپات ءبىلدىرىپ, شاقىرعانى جانە قوناقجايلىق كورسەتكەنى ءۇشىن ساۋد ارابياسىنىڭ كورولى مەن تاق مۇراگەرىنە العىس ايتتى.
قازاقستان پرەزيدەنتىنىڭ ايتۋىنشا, مەملەكەت باسشىسى رەتىندە ساۋد ارابياسىنا العاش رەت كەلگەندىكتەن, بۇل ساپاردىڭ ماڭىزى زور. قاسىم-جومارت توقاەۆ ساۋد ارابياسى قازاقستاننىڭ باستى ستراتەگيالىق سەرىكتەستەرىنىڭ ءبىرى ەكەنىن اتاپ ءوتتى.
– ساۋد ارابياسى – قازاقستاننىڭ تاۋەلسىزدىگىن ءبىرىنشى بولىپ مويىنداعان ەلدەردىڭ ءبىرى. وسى كەزەڭدە ءتۇرلى باعىتتاعى ىنتىماقتاستىعىمىز نىعايا ءتۇستى. قازىر قازاق-ساۋد قاتىناستارى جوعارى دەڭگەيدە. دەگەنمەن, ەكى ەل اراسىنداعى ىنتىماقتاستىققا تىڭ سەرپىن بەرەتىن كەز كەلدى. بۇل – ەلدەرىمىزدىڭ مۇددەسىنە ساي كەلەتىن ورتاق شەشىم. ءبىزدىڭ ءوزارا ءتيىمدى بايلانىستارىمىز نىعايا بەرەدى دەپ سەنەمىن, – دەدى مەملەكەت باسشىسى.
كەلىسسوز بارىسىندا ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرى تالقىلاندى. قازاقستان ساۋد ينۆەستورلارى ءۇشىن ءوزارا مۇددەنى كوزدەيتىن ءتۇرلى پەرسپەكتيۆتى سالالار بويىنشا ەرەكشە شارتتار مەن كەڭ كولەمدە ارتىقشىلىقتار ۇسىنۋعا دايىن.
تاراپتار ءوزارا تاۋار اينالىمىن ەداۋىر ارتتىرۋعا نيەتتى ەكەنىن جانە جۋىق ارادا ەكى ەل ۇكىمەتتەرىنىڭ بۇل باعىتتاعى جۇمىستاردى جانداندىراتىنىن ناقتىلادى.
مۇحاممەد بەن سالمان بەن ابدەلازيز ءال ساۋد ەلدەرىمىز اراسىنداعى قاتىناستار دەڭگەيى جاقسى ەكەنىن اتاپ ءوتىپ, ونى ءارى قاراي نىعايتىپ, دامىتۋ ءۇشىن مۇمكىندىكتەر مول ەكەنىن ايتتى. سونداي-اق بۇل باعىتتاعى جۇمىستاردى جانداندىرۋ قاجەت ەكەنىنە توقتالدى. ونىڭ ايتۋىنشا, بۇل رەتتە قازاقستان مەن ساۋد ارابياسىنىڭ بيزنەسمەندەرىن بىرىكتىرەتىن ىسكەرلىك كەڭەستىڭ ءرولى زور بولماق.
تاق مۇراگەرى مەملەكەت باسشىسىنىڭ رەسمي ساپارى اياسىندا وتەتىن ينۆەستيتسيالىق دوڭگەلەك ۇستەلگە كورولدىكتىڭ ءىرى كومپانيالارىنىڭ وكىلدەرى قاتىساتىنىن جەتكىزدى. ونىڭ ايتۋىنشا, قازىرگى جاعدايدا ساۋد ارابياسىنىڭ مەملەكەتتىك ينۆەستيتسيالىق قورى ۇيلەستىرەتىن بىرقاتار جوبا بويىنشا بىرلەسكەن جۇمىس ماڭىزدى سانالادى.
اتاپ ايتقاندا, مۇحاممەد بەن سالمان بەن ابدەلازيز ءال ساۋد كورولدىكتىڭ كومپانيالارى قازاقستاننىڭ اگرارلىق سالاسىنا ينۆەستيتسيا سالۋعا قىزىعۋشىلىق تانىتىپ وتىر. ونىڭ پىكىرىنشە, بۇل باعىت جاھاندىق ازىق-ت ۇلىك داعدارىسى جاعدايىندا اسا وزەكتى بولا تۇسەدى.
قاسىم-جومارت توقاەۆ تاق مۇراگەرىن قازاقستانعا مەملەكەتتىك ساپارمەن كەلۋگە شاقىردى. مۇحاممەد بەن سالمان بۇل شاقىرۋدى قۋانا قابىلدايتىنىن ايتىپ, قول جەتكىزىلگەن ۋاعدالاستىقتاردى جۇزەگە اسىرۋدىڭ ناقتى ناتيجەلەرىن تالقىلاۋ ءۇشىن قازاقستانعا ساپارمەن كەلۋگە دايىن ەكەنىن جەتكىزدى.
ينۆەستيتسيالىق مۇمكىندىك مول
مەملەكەت باسشىسىنىڭ ساۋد ارابياسىنا رەسمي ساپارىنىڭ ەكىنشى كۇنى ەلدىڭ ىسكەر توپتار وكىلدەرىمەن وتكەن ينۆەستيتسيالىق دوڭگەلەك ۇستەلگە قاتىسۋدان باستالدى. ەكى ەلدىڭ ينۆەستيتسيا, ەكونوميكا, ساۋدا جانە قارجى سالالارىنداعى ىقپالداستىعىن نىعايتۋ كەزدەسۋدىڭ نەگىزگى تاقىرىبى بولدى.
قاسىم-جومارت توقاەۆ جيىنعا قاتىسۋشىلارعا ءىلتيپات بىلدىرە وتىرىپ, ساۋد ارابياسىنىڭ تاق مۇراگەرى مۇحاممەد بەن سالمان بەن ابدەلازيز ءال ساۋدپەن وتكىزگەن كەشەگى كەزدەسۋىندە ساۋدا-ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ جونىندە ماڭىزدى ۋاعدالاستىقتارعا قول جەتكىزىلگەنىن ايتتى. پرەزيدەنت مەملەكەتتەرىمىزدىڭ كەلەشەك ەكونوميكالىق دامۋعا دەگەن كوزقاراستارى ۇقساس ەكەنىن اتاپ ءوتتى.
– Saudi Vision-2030 باعدارلاماسى مەن ءبىزدىڭ «قازاقستان-2050» ستراتەگياسى ەكونوميكانى ءارتاراپتاندىرۋ, شيكىزاتقا تاۋەلدىلىكتى تومەندەتۋ, ادامي كاپيتالعا ينۆەستيتسيا سالۋ, تۇپتەپ كەلگەندە, جوعارى دامىعان ەلدەردىڭ قاتارىنا كىرۋ ارقىلى ۇلتتىق دامۋعا قول جەتكىزۋدى كوزدەيدى, – دەدى مەملەكەت باسشىسى.
پرەزيدەنت ساۋد كاسىپكەرلەرىنە قازاقستاننىڭ ەكونوميكالىق جەتىستىكتەرى تۋرالى مالىمەت بەردى.
– تاۋەلسىزدىك جىلدارى قازاقستاننىڭ ىشكى جالپى ءونىمى 17 ەسە ءوستى. بۇگىندە قازاقستان ەكونوميكاسى ورتالىق ازياداعى بارلىق وزگە ەل ەكونوميكاسىنىڭ جيىنتىق كولەمىنەن اسىپ تۇسەدى. ورتالىق ازياداعى تاۋار اينالىمىنىڭ 60 پايىزعا جۋىعى قازاقستانعا تيەسىلى. ەلىمىزدىڭ حالىقارالىق رەزەرۆى – 90 ميلليارد دوللار جانە تمد بويىنشا جان باسىنا شاققاندا ەڭ جوعارىسى سانالادى. شەتەلدىك ينۆەستورلار ەلىمىزدىڭ ەكونوميكاسىنا 380 ميلليارد دوللاردان استام قارجى قۇيدى. بۇل ورتالىق ازيا ايماعىنا سالىنعان جالپى ينۆەستيتسيانىڭ 70 پايىزىن قۇرايدى, – دەدى قاسىم-جومارت توقاەۆ.
مەملەكەت باسشىسى قازاقستاندا ساۋد ارابياسىنىڭ قولداۋىمەن ءبىلىم بەرۋ, دەنساۋلىق ساقتاۋ, مادەنيەت جانە ينفراقۇرىلىم سالالارىندا قۇنى 120 ميلليون دوللاردان اساتىن بىرقاتار ماڭىزدى جوبا جۇزەگە اسىرىلعانىن جەتكىزدى. قازاقستان پرەزيدەنتىنىڭ پىكىرىنشە, بۇل سوما مەملەكەتتەرىمىزدىڭ الەۋەتىنە ساي كەلمەيدى.
وسىعان بايلانىستى مەملەكەت باسشىسى ىنتىماقتاستىقتى كەڭەيتۋدىڭ مەيلىنشە پەرسپەكتيۆتى سالالارىن بەلگىلەپ بەردى. ەڭ الدىمەن, بۇل ەكىجاقتى ساۋدا-ساتتىققا قاتىستى.
– ءبىز جۇرگىزگەن تالداۋعا سايكەس قازاقستان ماشينا جاساۋ, شويىن جانە بولات ءوندىرىسى, سونداي-اق تاماق ونەركاسىبى مەن اۋىل شارۋاشىلىعى سياقتى سالالار بويىنشا قۇنى شامامەن جىلىنا 400 ميلليون دوللار بولاتىن شيكىزات تاۋارلارىنىڭ 100-دەن استام ءتۇرىن ۇسىنا الادى, – دەدى پرەزيدەنت.
قاسىم-جومارت توقاەۆ قىتاي, قازاقستان, ازەربايجان, گرۋزيا جانە تۇركيا اراسىن جالعاستىراتىن كولىك-ترانزيت جانە لوگيستيكالىق مۇمكىندىكتەردى, سونىڭ ىشىندە ترانسكاسپي باعدارىن ءارتاراپتاندىرۋدى جانە كەڭەيتۋدى ەكىنشى ماڭىزدى باعىت رەتىندە اتاپ ءوتتى.
ونىڭ پىكىرىنشە, ىنتىماقتاستىقتىڭ مول الەۋەتىن ەكونوميكانىڭ ناقتى سەكتورىندا دا پايدالانۋعا بولادى.
– قازاقستان الەمدە ۆولفرام قورى بويىنشا 1-ورىن, ۋران مەن حروم بويىنشا 2-ورىن الادى, ال مارگانەتس, كۇمىس, مىرىش, قورعاسىن بايلىعى بويىنشا العاشقى بەستىككە كىرەدى. بۇل قورلاردى بارلاپ, زەرتتەۋ كەرەك. قارقىندى دامىپ كەلە جاتقان قىتاي مەن وڭتۇستىك ازيا نارىعىنا جاقىندىعىمىزدى ەسكەرە وتىرىپ, ينۆەستيتسيا سالۋعا, شىن مانىندە, بۇل جاقسى مۇمكىندىك. بۇگىن ءبىز بارلاۋ جانە ازىرلەمە جۇمىستارى ءۇشىن باعالى جانە ءتۇستى مەتالدىڭ 60-تان استام كەن ورنىن ۇسىنا الامىز, – دەدى مەملەكەت باسشىسى.
قازاقستان مەن ساۋد ارابياسىنىڭ مۇناي حيمياسى, اتوم ەنەرگەتيكاسى, جاسىل سۋتەگى ءوندىرىسى سالالارىن دامىتۋ, عارىشتى زەرتتەۋ جونىندە جانە باسقا دا باعىتتار بويىنشا جوسپارى بار.
– ءبىز كورولدىكتىڭ Saudi Vision-2030 ستراتەگياسى اياسىندا ءوزىنىڭ عارىشتىق باعدارلاماسىن دامىتۋعا دەگەن نيەتىن قولدايمىز. ەلدەرىمىزدىڭ عارىش كەڭىستىگىن زەرتتەۋ جانە بەيبىت ماقساتتا پايدالانۋ سالاسىنداعى ىنتىماقتاستىق ءۇشىن ءتيىستى قۇقىقتىق بازاسى بار. قازاقستاننىڭ اەروعارىش سالاسىن دامىتۋ ءۇشىن تاجىريبەسى دە, الەۋەتى دە جەتكىلىكتى. ءبىزدىڭ كومپانيالارىمىز وسى سالالار بويىنشا ساۋد ارابياسىنىڭ مەملەكەتتىك جانە جەكە كومپانيالارىمەن ءوزارا ىنتىماقتاستىق ورناتۋعا دايىن, – دەدى قاسىم-جومارت توقاەۆ.
پرەزيدەنت وتاندىق اگروسەكتوردىڭ الەۋەتىنە دە توقتالدى.
– قازاقستان ەگىستىك كولەمى بويىنشا جان باسىنا شاققاندا الەمدە ەكىنشى, جايىلىمدىق جەرلەر جونىنەن بەسىنشى ورىن (180 ميلليون گەكتار) الادى. ەلىمىز بيداي وسىرەتىن جانە ۇن وندىرەتىن 10 ءىرى مەملەكەتتىڭ قاتارىنا كىرەدى. ءبىز كورولدىككە جوعارى ساپالى بيداي, ۇن جانە مايلى داقىلداردى تۇراقتى ءارى ۇزاق مەرزىمدى جەتكىزۋشى ەلدەردىڭ ءبىرى بولۋعا دايىنبىز, – دەدى قاسىم-جومارت توقاەۆ.
تۋريزم سالاسىندا دا ىقپالداستىق ورناتۋعا زور مۇمكىندىكتەر اشىلادى. اتاپ ايتقاندا, مەملەكەت باسشىسى ساۋد كاسىپكەرلەرىنە قازاقستاننىڭ تۋريستىك-رەكرەاتسيالىق جوبالارىن قاراستىرىپ كورۋدى ۇسىندى.
سونىمەن قاتار قاسىم-جومارت توقاەۆ قازاقستاندا ينۆەستورلار ءۇشىن زاماناۋي ينستيتۋتسيونالدىق ورتا قالىپتاسقانىن ەسكە سالدى.
– وسى مۇمكىندىكتى پايدالانا وتىرىپ, قازاقستاننىڭ ساۋد ارابياسىمەن اراداعى ەكىجاقتى ىنتىماقتاستىقتى نىعايتۋعا جانە كەڭەيتۋگە بەيىلدى ەكەنىن راستاعىم كەلەدى. بۇگىن وسىندا بۇكىل الەمدە ايتارلىقتاي تابىستارعا قول جەتكىزگەن ساۋد ارابياسىنىڭ ءىرى كومپانيالارىنىڭ باسشىلارى قاتىسىپ وتىر. مەن ءبارىڭىزدى ءوزارا ءتيىمدى نەگىزدە قازاقستاندا بىرلەسە جۇمىس ىستەۋگە شاقىرامىن, – دەدى قازاقستان پرەزيدەنتى.
دوڭگەلەك ۇستەل بارىسىندا ساۋد ارابياسىنىڭ ينۆەستيتسيا ءمينيسترى حاليد ءال-فاليح, «سامۇرىق-قازىنا» اكتسيونەرلىك قوعامىنىڭ باسقارما توراعاسى الماسادام ساتقاليەۆ, ۇبح «بايتەرەك» اكتسيونەرلىك قوعامىنىڭ باسقارما توراعاسى قانات شارلاپاەۆ, SABIC كومپانياسى ديرەكتورلار كەڭەسىنىڭ توراعاسى حاليد حاشيم ءال-دابباگ, MA’ADEN كومپانياسىنىڭ باس ديرەكتورى روبەرت ۋيلت, ACWA Power كومپانياسى ديرەكتورلار كەڭەسىنىڭ توراعاسى مۇحاممەد ابۋنايان ءسوز سويلەدى.
بۇدان بولەك فورۋم جۇمىسىنا Ajlan & Bros Holding Group, SALIC, Saudi National Bank, Alhokair Group, FlyNas, Savola Group, SPIMACO, National Technology Group (NTG), Kingdom Holding, Dr. Sulaiman Al Habib Medical Group, Al Rajhi International for Investment, Al Muhaidib Group, Jamjoom Pharma, Tabuk Agriculture Development سياقتى ءىرى كومپانيالاردىڭ باسشىلارى, سونداي-اق ساۋد ارابياسى ەكونوميكاسىنىڭ بارلىق سەكتورىندا جۇمىس ىستەيتىن ونداعان كومپانيانىڭ جەتەكشىلەرى قاتىستى.
ورتاق مۇددەنى كوزدەيتىن جوبالار جۇزەگە اسادى
پرەزيدەنت قاسىم-جومارت توقاەۆ ساۋد ارابياسىنىڭ مەملەكەتتىك ينۆەستيتسيالىق قورىن (PIF) باسقارۋشى ياسير ءال-رۋمايانمەن كەزدەستى. مەملەكەت باسشىسىنا الەمدەگى ەڭ ءىرى دەربەس ءال-اۋقات قورىنىڭ ءبىرى – ساۋد ارابياسىنىڭ مەملەكەتتىك ينۆەستيتسيالىق قورىنىڭ قىزمەتى جونىندە اقپارات بەرىلدى. قور باسشىسى ياسير ءال-رۋمايان ەكونوميكانىڭ ءارتۇرلى سالالارىندا جۇزەگە اسىرىلىپ جاتقان جوبالار تۋرالى ايتتى.
قاسىم-جومارت توقاەۆ قازاقستاننىڭ ءارتۇرلى سالالار بويىنشا ءوزارا ءتيىمدى ىنتىماقتاستىقتى جۇزەگە اسىرۋعا نيەتتى ەكەنىن اتاپ ءوتىپ, ءوزارا ورتاق مۇددەنى كوزدەيتىن جوبالاردى جۇزەگە اسىرۋ ءۇشىن ساۋد ارابياسى ينۆەستيتسيالىق قورى مەن «سامۇرىق-قازىنا» اق جانە «ۇبح «بايتەرەك» كومپانيالارى اراسىنداعى تىعىز ىقپالداستىقتى جولعا قويۋدى ۇسىندى.
قور ساۋديانىڭ باسقا دا كومپانيالارى سياقتى مۇناي-حيميا ونەركاسىبىندەگى, جاسىل ەنەرگەتيكانى دامىتۋ سالاسىنداعى, مەتاللۋرگيا جانە تاۋ-كەن سەكتورلارىنداعى, سونداي-اق اۋىل شارۋاشىلىعىن تەرەڭ وڭدەۋ جونىندەگى ءىرى ينۆەستيتسيالىق جوبالارعا قاتىسۋعا شاقىرىلدى.
ءىرى كومپانيا باسشىلارىمەن كەزدەستى
بۇدان كەيىن قاسىم-جومارت توقاەۆ ساۋد ارابياسىنداعى ءىرى كومپانيالاردىڭ باسشىلارىمەن كەزدەستى. مەملەكەت باسشىسى ساۋد ارابياسىنىڭ بىرقاتار كاسىپكەرىمەن جەكە كەزدەسۋ وتكىزدى.
اتاپ ايتقاندا, پرەزيدەنت Ajlan & Bros Holding Group حولدينگتىك توپ باسقارماسىنىڭ باسشىسى ادجلان بەن ابدەلازيز ءال-ادجلانمەن جانە Acwa Power كومپانياسى ديرەكتورلار كەڭەسىنىڭ توراعاسى مۇحاممەد ابۋنايانمەن اڭگىمەلەستى.
ساۋد ارابياسى كورولدىگىنىڭ جانە تاياۋ شىعىستاعى ءىرى كونگلومەراتتىڭ ءبىرى – Ajlan & Bros Holding Group قازاقستانعا ينۆەستيتسيا قۇيۋعا مۇددەلى ەكەنىن ايتتى. قازىرگى ۋاقىتتا حولدينگ الماتى وبلىسىنىڭ اۋىل شارۋاشىلىعى سالاسىنداعى ءوندىرىس جوباسىن پىسىقتاۋدا.
مۇحاممەد ابۋنايانمەن كەزدەسۋدە بالامالى ەنەرگيا كوزدەرىن دامىتۋ ماسەلەلەرى تالقىلاندى. پرەزيدەنتتىڭ ايتۋىنشا, ەلىمىز 2030 جىلعا قاراي جاڭعىرتىلاتىن ەنەرگيا كوزدەرىنىڭ 30 پايىزىن ءوندىرۋدى جوسپارلاپ وتىر. سونىمەن قاتار قاسىم-جومارت توقاەۆ Acwa Power كومپانياسىن قازاقستاندا جاسىل سۋتەگى ءوندىرىسى سالاسىنداعى بىرلەسكەن جوبالاردى جۇزەگە اسىرۋعا شاقىردى.
سونداي-اق رەسمي ساپار بارىسىندا بىرقاتار ەكىجاقتى كەزدەسۋ ءوتتى. مەملەكەت باسشىسى قاسىم-جومارت توقاەۆ يسلام دامۋ بانكىنىڭ پرەزيدەنتى مۇحاممەد سۋلەيمان ءال-دجاسسەردى قابىلدادى. اڭگىمە بارىسىندا ەكونوميكانىڭ ءتۇرلى سالالارىنداعى بىرقاتار بىرلەسكەن جوبانىڭ جۇزەگە اسىرىلۋ بارىسى تالقىلاندى.
ينۆەستيتسيا كولەمى 1,6 ميلليارد دوللاردان استى
مەملەكەت باسشىسى قازاقستاننىڭ تمد ەلدەرى ىشىندە يسلام دامۋ بانكىمەن سەرىكتەستىك باعدارلاماسىن ءبىرىنشى بولىپ ازىرلەگەن ەل ەكەنىن ەسكە سالدى. الماتىدا 25 جىلدان استام ۋاقىت بۇرىن ورنالاسقان ايماقتىق كەڭسە شىعىس ەۋروپا ەلدەرىندە, تمد, موڭعوليا جانە قىتايدا بانك وپەراتسيالارىن ۇيلەستىرەدى. بۇل قازاقستان مەن يسلام دامۋ بانكى اراسىنداعى جوعارى ماڭىزدىلىق پەن ءوزارا سەنىمدى قارىم-قاتىناستى بىلدىرەدى.
– ءبىز بانكتىڭ قازاقستان ەكونوميكاسىنا كوپ جىلدان بەرى كورسەتىپ كەلە جاتقان قولداۋىن جوعارى باعالايمىز. يسلام دامۋ بانكى ىنتىماقتاستىق ورناتقان جىلدار ىشىندە ەلىمىزدەگى ەكونوميكانىڭ باسىم سەكتورلارى مەن الەۋمەتتىك جوبالارعا 1,6 ميلليارد دوللاردان استام ينۆەستيتسيا سالدى, – دەدى مەملەكەت باسشىسى.
ءال-دجاسسەر مەملەكەت باسشىسىنا بانكتىڭ ينۆەستيتسيالار سالاسىنداعى ساياسات جانە الداعى كەزەڭدەگى جوسپارلارى جونىندە ايتتى. ونىڭ ايتۋىنشا, يسلام دامۋ بانكى بيزنەس, قارجى سالالارىنداعى جوبالارعا, سونداي-اق ينفراقۇرىلىم مەن كوممۋنيكاتسيالاردى جاڭعىرتۋعا قاراجات ءبولۋدى جالعاستىرۋعا نيەتتى.
ۇيىم اياسىنداعى ىقپالداستىق كەڭەيەدى
مەملەكەت باسشىسى يسلام ىنتىماقتاستىعى ۇيىمىنىڭ باس حاتشىسى حيسسەين براحيم تاحامەن كەزدەستى. كەزدەسۋ بارىسىندا قازاقستان پرەزيدەنتى مەن يىۇ-نىڭ باس حاتشىسى ايماقتىق جانە حالىقارالىق كۇن تارتىبىندەگى وزەكتى ماسەلەلەر تۋرالى, سونداي-اق قازاقستان مەن يسلام ىنتىماقتاستىعى ۇيىمى اراسىنداعى ىقپالداستىقتى ودان ءارى تەرەڭدەتۋدىڭ پەرسپەكتيۆالارى جونىندە پىكىر الماستى.
قاسىم-جومارت توقاەۆ يىۇ-نىڭ ساياسي, الەۋمەتتىك-ەكونوميكالىق, ەكولوگيالىق جانە گۋمانيتارلىق سالالاردا بايلانىستار ورناتۋعا ىقپال ەتەتىن ينكليۋزيۆتى پلاتفورما رەتىندەگى جۇمىسىن جوعارى باعالادى.
مەملەكەت باسشىسى يسلام ىنتىماقتاستىعى ۇيىمىمەن اراداعى ءىس-قيمىلدار تۋرالى ايتا كەلە, قازاقستاننىڭ ۇيىم اياسىندا مۇسىلمان ەلدەرىمەن ىنتىماقتاستىقتى ودان ءارى كەڭەيتۋگە بەيىلدى ەكەنىن ناقتىلادى.
كەزدەسۋ سوڭىندا پرەزيدەنت قاسىم-جومارت توقاەۆ حيسسەين براحيم تاحانى الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىسۋعا شاقىردى. بۇل فورۋم بيىل كۇزدە قازاقستان استاناسىندا وتەدى.
ماڭىزدى قۇجاتقا قول قويىلدى
مەملەكەت باسشىسى قاسىم-جومارت توقاەۆتىڭ رەسمي ساپارى اياسىندا مىناداي قۇجاتتارعا قول قويىلدى:
- قازاقستان رەسپۋبليكاسى مادەنيەت جانە سپورت مينيسترلىگى مەن ساۋد ارابياسىنىڭ سپورت مينيسترلىگى اراسىنداعى سپورت سالاسى بويىنشا ءوزارا تۇسىنىستىك تۋرالى مەموراندۋم.
- قازاقستان رەسپۋبليكاسى اقپارات جانە قوعامدىق دامۋ مينيسترلىگى مەن ساۋد ارابياسى بۇقارالىق اقپارات قۇرالدارى مينيسترلىگى اراسىنداعى باق سالاسىنداعى ىنتىماقتاستىق جونىندە ءوزارا تۇسىنىستىك تۋرالى مەموراندۋم.
- «ساۋد باسپا ءىسى اگەنتتىگى» مەن «قازاقستان رەسپۋبليكاسى پرەزيدەنتىنىڭ تەلەراديوكەشەنى» كەاق اراسىنداعى ءوزارا تۇسىنىستىك جانە اقپارات الماسۋ تۋرالى مەموراندۋم.
- Astana International Exchange Ltd. كومپانياسى مەن ساۋد قور بيرجاسى (Tadawul) اراسىنداعى ءوزارا تۇسىنىستىك تۋرالى مەموراندۋم.
- ءىرى قارا مەن قوي ەتى يمپورتىنا قويىلاتىن سانيتارلىق-تەحنيكالىق حاتتاما.
- قازاقستان رەسپۋبليكاسى ەنەرگەتيكا مينيسترلىگى مەن ACWA Power كومپانياسى اراسىنداعى ءوزارا تۇسىنىستىك تۋرالى مەموراندۋم.
- «سامۇرىق-قازىنا» اق مەن Ajlan & Bros Holding Group Ability كومپانياسى اراسىنداعى ىنتىماقتاستىق تۋرالى كەلىسىم.
- «KAZBIOSORGO» جشس مەن Ajlan & Bros Holding Group كومپانياسى اراسىنداعى ءوزارا تۇسىنىستىك تۋرالى مەموراندۋم.
- «QazTrade» ساۋدا ساياساتىن دامىتۋ ورتالىعى» اق مەن Ajlan & Bros Holding Group Ability كومپانياسى اراسىنداعى ىنتىماقتاستىق تۋرالى كەلىسىم.
- «وپتوگراد» جشس مەن Ajlan & Bros Holding Group Ability كومپانياسى اراسىنداعى قازاقستاننان ساۋد ارابياسىنا ەت جەتكىزۋ جونىندەگى ءوزارا تۇسىنىستىك تۋرالى مەموراندۋم.
- «KAZAKH INVEST ۇلتتىق كومپانياسى» اق مەن Al Rajhi International for Investment (RAII) كومپانياسى اراسىنداعى ينۆەستيتسيالار بويىنشا ىنتىماقتاستىق تۋرالى مەموراندۋم.
- «QazTrade» ساۋدا ساياساتىن دامىتۋ ورتالىعى» اق مەن «لۋلۋ ساۋدي گيپەرماركەتس» كومپانياسى اراسىنداعى ىنتىماقتاستىق تۋرالى مەموراندۋم.
- «Eurasia Invest LTD» جشس مەن Jamjoom Pharma كومپانياسى اراسىنداعى قازاقستاننان ساۋد ارابياسىنا قۇرعاق قىمىز جەتكىزۋ تۋرالى كەلىسىم.
