«زاماناۋي مەكتەپ» جوباسى شەڭبەرىندە جوندەلىپ جاتقان اتالعان مەكتەپ 1967 جىلى سالىنعان. مۇندا ەكى اۋىسىم بويىنشا 1 129 بالا ءبىلىم الۋدا. ءبىلىم ورداسىندا 37 كابينەت, ونىڭ ىشىندە 2 زەرتحانا, روبوتتەحنيكا كابينەتى بار.
جوندەۋ جۇمىستارىن جۇرگىزۋگە 3 مەردىگەر ۇيىم تارتىلعان. جۇمىستىڭ كۇردەلىلىگى سول, ءبىر مەردىگەر وزىنە ءتيىستى جۇمىستى اياقتاماي, ەكىنشى مەردىگەر قانداي دا ءبىر شارۋاعا كىرىسە المايدى. ءماجىلىس دەپۋتاتتارى جوندەۋ جۇمىستارى كەستەدەن كەشىكپەي, بالالار ءبىلىم كۇنىن ەرەكشە قۋانىشپەن قارسى الۋ كەرەك ەكەنىن ەسكە سالدى. بۇل رەتتە, حالىق قالاۋلىلارى جەرگىلىكتى Amanat پارتياسىنىڭ وكىلدەرى جانە ءبىلىم سالاسىنا جاۋاپتى ماماندارمەن كەڭەسە كەلە, قوسىمشا كەلىسىمشارت جاساۋ ارقىلى كەستەگە وزگەرىس ەنگىزۋدى ۇسىندى. سونداي-اق ءورت قاۋىپسىزدىگى ماسەلەسىنە باسا نازار اۋدارۋدى تاپسىردى.
ءبىلىم باسقارماسى باسشىلارىنىڭ ايتۋىنشا, «زاماناۋي مەكتەپ» جوباسى اياسىندا تەك كۇردەلى جوندەۋ عانا ەمەس, قۇرال-جابدىقتارمەن قامتاماسىز ەتۋ, مۇعالىمدەرگە دە, وقۋشىلارعا دا ىڭعايلى جاعداي جاساۋ كوزدەلگەن. سونىمەن قاتار Amanat پارتياسىنىڭ سايلاۋالدى پلاتفورماسى نەگىزىندە اۋىلدىق 54 مەكتەپتە قايتا جابدىقتاۋ جۇمىستارى جۇرگىزىلمەك.
2025 جىلعا دەيىن پاۆلودار وبلىسىنىڭ 82 ءبىلىم بەرۋ مەكەمەسى «زاماناۋي مەكتەپ» جوباسى اياسىندا جاڭارتىلادى دەپ كۇتىلۋدە.
پاۆلودار وبلىسى,
اقسۋ قالاسى
