سەنات دەپۋتاتى ساعىندىق لۇقپانوۆ جۇمىس ساپارىمەن اتىراۋ وبلىسىندا بولدى. ول ساپار بارىسىندا بىرقاتار ەلدى مەكەندەردى ارالاپ, كاسىپكەرلەرمەن جانە اۋداندىق ءماسليحات دەپۋتاتتارىمەن كەزدەستى. سەناتور ماحامبەت اۋدانىنداعى الەۋمەتتىك نىسانداردى ارالاپ, اقجايىق اۋىلىندا ورنالاسقان اۋدانى 22 گەكتار بولاتىن جىلىجاي قۇرىلىسىمەن تانىستى. دەپۋتات يساتاي اۋدانىنداعى بىرقاتار الەۋمەتتىك نىسانداردى كوردى جانە اۋدان ورتالىعىنداعى قۇرىلىسى جاقىندا عانا اياقتالعان 320 ورىندىق مەكتەپ عيماراتىندا بولدى. كەزدەسۋ بارىسىندا دەنساۋلىق ساقتاۋ جۇيەسى, جولدار, وڭىردەگى اۋىز سۋمەن قامتاماسىز ەتۋ ماسەلەلەرى تالقىلاندى.
دەپۋتات ءلاززات قالتاەۆا الماتى قالاسىنا جۇمىس ساپارى بارىسىندا زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحاناعا باردى. سەناتور سونىمەن قاتار «ەرزي» الەۋمەتتىك-وڭالتۋ ورتالىعىنىڭ قىزمەتىن پايدالانۋشىلارمەن دە كەزدەستى. كەزدەسۋدە اربا پايدالانۋشىلارعا ارنالعان قولجەتىمدى ورتانىڭ ماسەلەلەرى, وڭالتۋدى تەحنيكالىق قۇرالدارمەن قامتاماسىز ەتۋ كەزىندەگى جەكەلەگەن ءادىس-تاسىلدەر, سونداي-اق شيپاجاي-كۋرورتتىق ەمدەۋگە قول جەتكىزۋگە قاتىستى تاقىرىپتار تالقىلاندى. دەپۋتات ءوز سوزىندە كوتەرىلگەن ماسەلەلەر جۇيەلەنىپ, الداعى سەسسيا بارىسىندا دەپۋتاتتىق ساۋالدار ازىرلەۋ مەن زاڭ شىعارۋ جۇمىستارىندا نازاردا بولاتىنىن ايتتى.
اندرەي لۋكين نۇر-سۇلتان قالاسى پوليتسيا دەپارتامەنتىنىڭ بايقوڭىر, ەسىل, الماتى جانە سارىارقا اۋداندارىنداعى پوليتسيا باسقارمالارىنا باردى. ول پالاتانىڭ زاڭنامالىق جۇمىسى تۋرالى باسقارما قىزمەتكەرلەرىنە ايتىپ بەردى. اتاپ ايتقاندا, قۇقىق قورعاۋ قىزمەتىن وتكەرۋ ءتارتىبىن جەتىلدىرۋ, قۇقىق قورعاۋ, ارناۋلى مەملەكەتتىك ورگاندار قىزمەتكەرلەرى مەن اسكەري قىزمەتشىلەردىڭ قۇقىقتىق جانە الەۋمەتتىك قورعالۋى مەن جاۋاپكەرشىلىگىن ارتتىرۋ, ىشكى ىستەر ورگاندارىنىڭ دەربەستىگى, جەكەلەگەن قىلمىستىق قۇقىق بۇزۋشىلىقتار ءۇشىن جاۋاپكەرشىلىكتى كۇشەيتۋ جانە قارۋ اينالىمى ماسەلەلەرى بويىنشا سەنات قابىلداعان زاڭدارعا ەگجەي-تەگجەيلى توقتالدى.
ناريمان تورەعاليەۆ جۇمىس ساپارى بارىسىندا باتىس قازاقستان وبلىسىنىڭ جانىبەك اۋدانىن ارالاپ, كۇيگەنكول, جانىبەك, تاۋ جانە قامىستى اۋىلدىق وكرۋگتەرىنىڭ تۇرعىندارىمەن كەزدەسۋلەر وتكىزدى جانە اۋداننىڭ تىنىس-تىرشىلىگىمەن تانىستى. جيىندا اۋدان ورتالىعىنداعى دا, اۋدانداعى اۋىلدارداعى دا اۋىز سۋمەن قامتاماسىز ەتۋ, جولداردىڭ جاعدايى, ازىق-ت ۇلىك باعاسىنىڭ قىمباتتاۋى, ءبىلىم ساپاسى, دارىگەرلەردىڭ جەتىسپەۋى ماسەلەلەرى ءسوز بولدى. دەپۋتات سونداي-اق ۇزىندىعى 15 شاقىرىمدى قۇرايتىن جانىبەك-تالوۆ-كىشى وزەن جول ۋچاسكەسىندەگى قۇرىلىس جۇمىستارىنىڭ بارىسىمەن تانىستى. بۇل جۇمىستارعا ۇلتتىق قوردان 644 ميلليون تەڭگە بولىنگەن بولاتىن. بيىل 8 شاقىرىم جول سالىنادى. جول قۇرىلىسىن كەلەسى جىلدىڭ قازان ايىندا اياقتاۋ جوسپارلانعان.
سەناتورلار بەكبولات ورىنبەكوۆ پەن ءابدالى نۇراليەۆ جۇمىس ساپارى بارىسىندا جامبىل وبلىسىنىڭ جۋالى اۋدانىندا بولدى. سەناتورلار «بىرلىك» جانە «باقىت» شارۋا قوجالىقتارىنىڭ قىزمەتىمەن, نۇرلىكەنت اۋىلىنداعى تاۋارلى ءسۇت فەرماسىنىڭ قۇرىلىسىنداعى «گامبۋرگ» جشس جۇمىسىمەن تانىستى, سونداي-اق كۇردەلى جوندەۋ جۇرگىزىلىپ جاتقان №30 كوكتوبە ورتا مەكتەبىندە بولدى. پارلامەنتشىلەر جۇمىستى ساپالى جۇرگىزۋگە باسا نازار اۋداردى. دەپۋتات بەكبولات ورىنبەكوۆ سونىمەن قاتار تاراز قالاسىندا بولىپ, ونكولوگيالىق اۋرۋحانانىڭ, وڭالتۋ ورتالىعىنىڭ جاي-كۇيىمەن جانە تالاس وزەنىنىڭ جاعاسىن نىعايتۋ جۇمىستارىمەن تانىستى.
دەپۋتاتتار نۇرلان بەكنازاروۆ پەن ايگۇل قاپباروۆا جۇمىس ساپارى بارىسىندا شىمكەنت قالاسىنىڭ باق وكىلدەرىمەن كەزدەستى. شارادا باق تۋرالى زاڭ جوباسىنا وزگەرىستەر ەنگىزۋ, جۋرناليستەردىڭ مارتەبەسى, مەرزىمدى باسىلىمداردىڭ قازىرگى جاعدايى مەن كادر تاپشىلىعى ماسەلەلەرى تالقىلاندى. سەناتورلار سونداي-اق شىمكەنت قالاسى ۇلتتىق ۇلانىنىڭ اسكەريلەرىمەن جانە مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ پروفەسسورلىق-وقىتۋشىلىق قۇرامىمەن كەزدەسىپ, ماتەريالدىق-تەحنيكالىق بازانى, ينفراقۇرىلىمدى جانە وقۋ-جاتتىعۋ بازالارىن ارالادى.
سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ حاتشىسى قاناتبەك سافينوۆ كاسىبي مەدياتورلارمەن كەزدەسىپ, مەدياتسيا سالاسىنداعى زاڭنامانى جەتىلدىرۋ ماسەلەسىن تالقىعا سالدى. جۇزدەسۋگە قاتىسۋشىلار مەدياتورلاردىڭ كاسىبي قىزمەت بارىسىندا تاپ بولاتىن پروبلەمالاردى ساراپقا سالدى. دەپۋتات كەزدەسۋ بارىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتىق پروتسەستىك زاڭنامانى جەتىلدىرۋ جانە داۋلاردى سوتتان تىس جانە سوتقا دەيىنگى رەتتەۋ ينستيتۋتتارىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ىسكە اسىرۋ جونىندەگى 2022 جىلعا ارنالعان ءىس-شارالار جوسپارىن ورىنداۋ قورىتىندىسى بويىنشا اقپارات جانە قوعامدىق دامۋ مينيسترلىگىنە اعىمداعى جىلدىڭ سوڭىندا مەدياتورلاردىڭ ءبىرىنشى فورۋمىن وتكىزۋ ۇسىنىلعانىن اتاپ ءوتتى.
