كەشە رەسەي فەدەراتسياسىنىڭ استاناسى ماسكەۋ قالاسىنداعى “يتار-تاسس” اگەنتتىگى عيماراتىنىڭ ۇلكەن ءماجىلىس زالىندا ۇلىبريتانيانىڭ بەلگىلى جازۋشىسى جانە قوعامدىق قايراتكەرى دجوناتان ايتكەننىڭ بۇدان بۇرىن اعىلشىن تىلىندە جارىق كورگەن “نۇرسۇلتان نازارباەۆ جانە قازاقستاننىڭ جاسامپازدىعى” (“نۋرسۋلتان نازارباەۆ ي سوزيدانيە كازاحستانا”) اتتى كىتابىنىڭ تۇساۋكەسەرى بولىپ ءوتتى. وعان وسى ەلگە جۇمىس ساپارىمەن كەلگەن قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ قاتىستى.
جىلقىباي جاعىپار ۇلى – ماسكەۋدەن.
تۇساۋكەسەر ءراسىمىن “يتار-تاسس” اگەنتتىگىنىڭ باسشىسى ۆيتالي يگناتەنكو اشىپ, كىرىسپە ءسوز سويلەدى. “بۇگىن ءبىز قازاقستان جانە رەسەي ەلدەرىنىڭ رۋحاني-مادەني ومىرىندەگى اسا ەلەۋلى وقيعانىڭ كۋاسى بولىپ وتىرمىز, – دەپ باستادى ول ءسوزىن. – نۇرسۇلتان نازارباەۆ – تەك قازاقستان مەملەكەتىنىڭ قالىپتاسۋى عانا ەمەس, بۇكىل تمد ەلدەرىنىڭ دامۋىنا, كەڭەستىك كەزەڭدە قالىپتاسقان بايلانىستاردىڭ ءۇزىلىپ قالماي, زامانعا ساي قايتا ينتەگراتسيالانۋىنا ولشەۋسىز ۇلەس قوسقان دارىندى دا تاريحي تۇلعا. سوندىقتان بەلگىلى اعىلشىن جازۋشىسى دج. ايتكەننىڭ بۇكىل باتىس ەلدەرى وقىرماندارىن ەلەڭ ەتكىزگەن كىتابى ورىس تىلىنە اۋدارىلىپ, ىزىنشە ماسكەۋدىڭ “حۋدوجەستۆەننايا ليتەراتۋرا” باسپاسىنان جارىق كوردى. وسى ءبىر الەمدىك دارەجەدەگى تانىمال تۇلعاعا, بۇكىل قازاقستاندىقتارعا باۋىرلاس رەسەي تاراپىنان جاسالعان لايىقتى قۇرمەت دەپ بىلەمىن”. ودان كەيىن ءسوز كەزەگى پرەمەر-مينيستر كارىم ماسىموۆكە بەرىلدى. ول ءوز سوزىندە دۇنيە ءجۇزى تانىعان رەفورماتور, ەلباسى نۇرسۇلتان نازارباەۆتىڭ بۇگىندە وركەنيەت الەمىنەن ءوزىنىڭ لايىقتى ورنىن العان, دامىعان مەملەكەتتەر شوعىرىندا باسەكەگە قابىلەتتىلىگىن ايقىنداي باستاعان جاڭا قازاق ەلىن قۇرۋداعى بالاماسىز ەڭبەگىن ايتا كەلىپ, قازاقستان پرەزيدەنتىنىڭ ءومىر جولى مەن كوشباسشىلىق عۇمىردايەگىن تالعامى توقسان باتىس وقىرماندارىنا كەڭىنەن تانىمال ەتىپ, ەرەكشە قىزىعۋشىلىقتارىن وياتا بىلگەن دجوناتان ايتكەنگە شىنايى ىقىلاسىن ءبىلدىردى. سونىمەن بىرگە كارىم ءماسىموۆ وتكىزۋگە ۇيىتقى بولعان ۆ.يگناتەنكونىڭ نۇرسۇلتان نازارباەۆتى تەك قازاقستان رەسپۋبليكاسىنىڭ پرەزيدەنتى رەتىندە عانا ەمەس, سوناۋ ءبىر كەزەڭدەردە قازاقستان جانە ۋكراينا ماگنيتكالارىنىڭ دامۋىنا قولتاڭباسىن قالدىرعان مەتاللۋرگ رەتىندە تانيتىنىن, ۇزاق جىلداردان بەرى سىيلاس ازاماتتار بولىپ كەلە جاتقانىن تىلگە تيەك ەتىپ, دوستىقتىڭ مۇقالماس قاسيەتى تاعى ءبىر قىرىنان تانىلىپ وتىرعانىنا شىن العىسىن ايتتى. اقيقاتىندا تالعامى تەرەڭ ماسكەۋ زيالىلارىنىڭ “يتار-تاسس” اگەنتتىگىنىڭ ۇلكەن ءماجىلىس زالىنا تولا جينالۋى دا وسى ايتىلعانداردىڭ اقيقاتتىعىن پاش ەتكەندەي. بەلگىلى ساياساتكەرلەر, ادەبيەت جانە ونەر قايراتكەرلەرىمەن قاتار رەسەي استاناسىنداعى جوعارى وقۋ ورىندارىنىڭ وقىتۋشىلارى مەن ستۋدەنتتەرى دە ءوتىپ جاتقان مادەني شاراعا جان-جاقتى قىزىعۋشىلىق تانىتىپ, بوياۋى كەپپەگەن تۋىندىنىڭ اۆتورى دج. ايتكەننەن قولتاڭبا الۋ ءۇشىن جالىقپاي كەزەككە تۇردى. تۇساۋكەسەر راسىمىندە “حۋدوجەستۆەننايا ليتەراتۋرا” باسپاسىنىڭ باسشىسى گريگوري پرياحين ءسوز الىپ, جارىققا شىعىپ وتىرعان ەڭبەكتىڭ ەرەكشە قۇندىلىعىنا توقتالدى. قازىر الەمدە قىتايدىڭ ەكونوميكالىق دامۋ تاجىريبەسىنە تاڭدانىس قانداي دارەجەدە بولسا, تمد ەلدەرى كەڭىستىگىندە قازاقستاندىق ەكونوميكالىق ورلەۋ تاجىريبەسىنە قىزىعۋشىلىق, ونى تۇسىنۋگە دەگەن تالپىنىس تۋرا سونداي دارەجەدە. ەندەشە, قازاقستاندىق ەكونوميكالىق دامۋ عاجايىبىنىڭ اۆتورى – رەفورماتور نۇرسۇلتان نازارباەۆتىڭ ءومىرى مەن ونەگەسىنە دەگەن قىزىعۋشىلىقتىڭ ارتىپ وتىرعاندىعى زاڭدى قۇبىلىس. مىنە, وسى ۋاقىت سۇرانىسىن دارىندى جازۋشى, ۇلىبريتانيانىڭ كەزىندەگى بەلدى ساياساتكەرى, قازىرگى تانىمال قوعام قايراتكەرى دجوناتان ايتكەن شەبەر دە ساپالى قاناعاتتاندىرا بىلگەن, دەدى ول ءسوزىنىڭ سوڭىندا. تۇساۋكەسەردە شىعارما اۆتورى دج.ايتكەن جانە رف سىرتقى ىستەر ءمينيسترىنىڭ ورىنباسارى گريگوري كاراسين دە ءسوز سويلەدى. بىرنەشە ساعاتقا سوزىلعان وتىرىستا شىنايى شىعارما بارىنشا قىزۋ تالقىلاندى. “حۋدوجەستۆەننايا ليتەراتۋرا” باسپاسى 10 مىڭ دانامەن جارىققا شىعارىپ وتىرعان “نۇرسۇلتان نازارباەۆ جانە قازاقستاننىڭ جاسامپازدىعى” اتتى كىتاپتى اعىلشىن تىلىنەن ولجاس سۇلەيمەنوۆ پەن ۆيتالي يگناتەنكو اۋدارعان. سونىمەن اعىلشىن تىلىندە جازىلىپ, باتىس ەلدەرى وقىرماندارىن ەرەكشە ەلەڭ ەتكىزگەن شىعارما ورىس ءتىلدى قالىڭ وقىرمانعا جولداما الدى. سۋرەتتەردى تۇسىرگەن شۇكىر شاحاي.
