قىرعىزستاننىڭ وڭتۇستىك ايماعىن تىنىشتىققا شاقىردى

ەقىۇ-نىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەت­تىك حات­شىسى – سىرتقى ىستەر ءمينيسترى قانات ساۋداباەۆ قايتا ادام وپاتىنا سوقتىرعان قىرعىزستاننىڭ وڭتۇستىك جالالاباد وبلىسىنداعى قايعىلى وقيعالارعا بايلانىستى ءوزىنىڭ تەرەڭ الاڭداۋشىلىعىن ءبىلدىردى. ق.ساۋداباەۆ مىناداي ءمالىم­دەمە جاسادى: “مەن بارلىق تاراپتاردى زور­لىق-زومبىلىققا جول بەرمەي, الداعى ۋاقىتتا قاقتىعىستىڭ الدىن الۋعا بارلىق شارالاردى قابىل­داۋعا جانە تۋىنداعان ماسەلەلەردى توزىمدىلىك پەن ىمىراعا كەلۋ ارقىلى شەشۋگە شاقىرامىن. ونىڭ ۇستىنە, ۇلتارالىق قاقتىعىسقا مۇلدەم جول بەرىلمەۋى ءتيىس. قىر­عىزستاندى داعدارىستان شىعارۋعا جاعداي تۋعىزاتىن ءتارتىپ پەن زاڭ ۇستەمدىگىن, كەلىسىم مەن قوعامداعى تۇراقتىلىقتى تەز ارادا قامتاما­سىز ەتۋ قاجەت. قازاقستان ەقىۇ-نىڭ قازىرگى توراعاسى رەتىندە قىرعىزستانداعى داعدارىستىڭ ءبىرىنشى كۇننەن باستاپ ونى تۇراقتاندىرۋعا بارىنشا كۇش-جىگەر جۇمساپ كەلەدى. قىرعىز­ستان­داعى كۇردەلى الەۋمەتتىك-ەكونو­ميكالىق جاعدايدى ەسكەرە وتىرىپ, قازاقستان پرەزيدەنتى نۇرسۇلتان نازارباەۆتىڭ شەشىمىمەن ءۇستىمىز­دە­گى جىلدىڭ 6 ساۋىرىندە داعدارىس كەزەڭىنە قابىلدانعان قازاقستان-قىرعىزستان مەملەكەتتىك شەكارا­سىن­داعى شەكتەۋلەردى 20 مامىردان باستاپ جويدى. بىشكەكتەگى ەقىۇ ورتالىعى ەلدىڭ سولتۇستىگىندەگى دە, ءوڭتۇس­تىگىندەگى دە ماسەلەلەردى شەشۋدە بەلسەندى ۇلەس قوسىپ, جاعداي مو­نيتورينگىن تۇراقتى جاساپ وتىر. سوڭعى ۋاقىتتا جاعدايدى تۇ­راق­تاندىرۋعا قاجەتتى كومەك كورسەتۋ ماقساتىندا قىرعىز­ستاندا ەقىۇ-نىڭ ءىس باسىنداعى توراعاسى, ەقىۇ-نىڭ باس حات­شىسى م.پ. دە بريشامبو, ەقىۇ پارلامەنتتىك اسسامبلەياسىنىڭ توراعاسى ج.سوارەش, ەقىۇ-نىڭ ۇلتتىق ازشىلىق ىستەرى جونىندەگى جوعارعى كوميسسارى ك. ۆوللەبەك جانە ۇيىمنىڭ باسقا دا جوعارى دارەجەدەگى وكىلدەرى بولدى. مەن قىرعىزستان ۋاقىتشا ۇكىمەتىنىڭ باسشىسى روزا وتۋن­باەۆامەن تەلەفون ارقىلى سويلەستىم. اڭگىمە بارىسىندا مەن ول ەلدەگى اياقتالماي جاتقان قاقتىعىستارعا ءبىزدىڭ الاڭداۋشىلىعىمىزدى جەت­كىز­دىم جانە ەقىۇ-نىڭ, ونىڭ ينس­تيتۋتتارىنىڭ جانە بىشكەكتەگى ورتالىعىنىڭ قىرعىزستانعا تەز ارادا داعدارىستان شىعىپ, ارى قاراي كونستيتۋتسيالىق دامۋعا بارىنشا كومەك كورسەتۋگە دايىن ەكەندىگىن ايتتىم”.