الدىن الا وتكىزىلگەن قوعامدىق تىڭداۋدا جاڭا اۋدانعا «الاش», «جىبەك جولى», «تۇران», «بادام», «مارتوبە», «ياسسى», «قۇرلىق» اتاۋلارى مەن ش.قالداياقوۆ, ا.اسقاروۆ, ج.تاشەنوۆ ەسىمدەرىن بەرۋ بويىنشا ۇسىنىس پىكىرلەر تۇسكەن. ال, كوپشىلىك «تۇران» اتاۋىن قولداعان.
شىمكەنت قالاسى اكىمى اپپاراتىنىڭ باسشىسى گ.ماۋلەنكۇلوۆتىڭ ايتۋىنشا جەرگىلىكتى قوعامداستىق وكىلدەرى, ارداگەرلەر, زيالى قاۋىم وكىلدەرى, قوعامدىق ۇيىمداردىڭ ۇسىنىمدارى دا ەسكەرىلگەن.
سەسسيا وتىرىسىندا قر ۇكىمەتىنىڭ جانىنداعى رەسپۋبليكالىق ونوماستيكا كوميسسياسىنىڭ قاراۋىنا «تۇران» اتاۋىن بەرۋ بويىنشا ۇسىنىستى حالىق قالاۋلىلارى ءبىر اۋىزدان قولدادى. ماڭىزدى تاريحي شەشىم قابىلدانعانىن ايتىپ وتكەن شىمكەنت قالاسىنىڭ اكىمى مۇرات ايتەنوۆ بەسىنشى اۋدان قۇرۋ – ۋاقىت تالابى ەكەنىن جەتكىزدى.
«قالامىزدا حالىق سانى جىل سايىن ارتىپ, دەموگرافيالىق ءوسىم جوعارىلاپ كەلەدى. سوندىقتان قالا تۇرعىندارى ءۇشىن قولايلى ورتا قالىپتاستىرىپ, باسقارۋ دەڭگەيىن جانە مەملەكەتتىك قىزمەت كورسەتۋ ساپاسىن ارتتىرۋىمىز قاجەت. قالاداعى اۋدانداردىڭ شەكارالارىن ءبولۋ قالانىڭ باس جوسپارى نەگىزىندە ازىرلەندى. سونىمەن قاتار 2022 جىلعا ارنالعان قالا بيۋدجەتى ناقتىلاندى. قوسىمشا قارجى قۇرىلىس جۇمىستارىن اياقتاۋعا, قالانىڭ ينجەنەرلىك-ينفراقۇرىلىمىن دامىتۋعا باعىتتالاتىن بولدى», دەدى م.ايتەنوۆ.
ايتا كەتەيىك, جاڭادان قۇرىلاتىن اۋداننىڭ اۋماعى 36,3 مىڭ گا (قالا اۋماعىنىڭ 32%), حالىق سانى – 220,7 مىڭ ادامدى قۇرايدى. قالانىڭ باس جوسپارىنا سايكەس اۋدان اۋماعىندا, 2035 جىلعا دەيىن 1 175 گەكتارعا 2 325 مىڭ شارشى مەتر جاڭا كوپقاباتتى تۇرعىن ءۇي قۇرىلىسى جوسپارلانۋدا.
