ترانسكاسپي ءدالىزى – تىڭ مۇمكىندىك

تەمىر جولدى ءتيىمدى پايدالانۋ كەرەك

قازىرگىدەي الماعايىپ شاقتا تەمىر جولدىڭ الەۋەتىن ارتتىرۋ, ونىڭ مۇم­كىندىگىن بارىنشا پايدالانۋ ماڭىزدى. مۇنى كولىك-ترانزيت الەۋەتىن دامىتۋ جونىندەگى كەڭەستە مەملەكەت باسشىسى دا اتاپ ءوتتى. قاسىم-جومارت توقاەۆ ەلدى وڭىرلىك «ترانزيتتىك حاب» رەتىندە دامىتۋ ءۇشىن «قازاقستان تەمىر جولى» ۇلتتىق كومپانياسىنا اۋقىمدى جاڭعىرتۋدى جۇزەگە اسىرۋدى تاپسىردى.

ۇلتتىق كومپانيا باسقارما تور­اعاسىنىڭ ورىنباسارى قانات الما­عامبەتوۆتىڭ پىكىرىنشە, «قازاقستان تەمىر جولىنىڭ» ينفرا­قۇرى­لىمدىق جوبالارىن ىسكە اسىرۋ ەلدىڭ ەكسپورتتىق جانە ترانزيتتىك الەۋەتىن ارتتىرۋعا مۇمكىندىك بەرەدى.

– كومپانيا الدىندا تۇرعان جاڭا مىندەتتەردى ورىنداۋدى قامتاماسىز ەتۋ ءۇشىن لوگيستيكا سالاسىندا, ونىڭ ىشىندە ەلدەن تىس جەرلەردە اكتيۆتەر مەن قۇزىرەتتەردىڭ وڭتايلى قۇرىلىمىن قالىپتاستىرۋ ماسەلەسى قارالادى. وسى ماقساتتا لوگيستيكالىق بلوكتى كۇشەيتۋ جوسپارلانۋدا. قولدانىستاعى ترانزيتتىك باعىتتاردى دامىتۋ جانە جاڭالارىن قۇرۋ, لوگيستيكالىق ينفراقۇرىلىمدى جاڭعىرتۋ – باستى نازاردا. قازىرگى ۋاقىتتا قازاقستان ارقىلى وتەتىن مارشرۋتتار بۇرىنعىدان دا سۇرانىسقا يە بولا باستادى. «قازاقستان تەمىر جولى» ترانسكاسپي حالىقارالىق كولىك باعىتى ءدالىزىن ىنتالاندىرۋ بو­يىنشا شارالار قابىلدانۋدا. قازىرگى تاڭدا گرۋزيا, تۇركيا پورتتارىنا ترانزيتتىك جانە ەكسپورتتىق قاتىناستا كونتەينەرلىك تاسىمالدارعا باسەكەگە قابىلەتتى ستاۆكالار قولدانىلادى, – دەدى ق.الماعامبەتوۆ.

ونىڭ ايتۋىنشا, دوستىق – مويىنتى تەمىر جول ءدالىزىن جاڭعىرتۋ جوباسى «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسىنا ەنگىزىلدى. ونى ىسكە اسىرۋ جۇكتەردى تاسىمالداۋ جىلدامدىعىن جانە قىتاي – ەۋروپا – قىتاي ترانزيتتىك ءدالىزى بويىنشا تەمىر جول ينفراقۇرىلىمىنىڭ وتكىزۋ قابىلەتىن بەس ەسەگە ارتتىرادى.

– بۇدان باسقا, كومپانيا داربازا – ماقتاارال تەمىر جول جەلىسى مەن الماتى ستانساسىن اينالىپ وتەتىن جەتىگەن – قازىبەك بەك اينالما تەمىر جول جە­لىسىن سالۋدى جوسپارلاپ وتىر. داربازا – ماقتاارال جەلىسى سارىاعاش مەملە­كەتارالىق ءتۇيىسۋ پۋنكتى مەن تاشكەنت تورابىندا ينفراقۇرىلىمدىق شەكتەۋلەردى «كەستەلەۋگە» مۇمكىندىك بەرەدى. جەتىگەن – قازىبەك بەك اينالما جەلىسى جۇك اعىنىن قايتا باعدارلاۋ ەسەبىنەن الماتى تورابى جۇكتەمەسىنىڭ تومەندەۋىن قامتاماسىز ەتەدى جانە جۇكتەردى جەتكىزۋ ۋاقىتىن قىسقارتادى. بۇل جوبالار جوعارى لوكاليزاتسياعا (85 پايىز) بايلانىستى ەكونوميكاعا ايتارلىقتاي مۋلتيپليكاتيۆتىك اسەر ەتەدى جانە قوسىمشا جۇمىس ورىندارىن قۇرۋعا جول اشادى, – دەيدى ۇلتتىق كومپانيانىڭ باسقارما توراعاسىنىڭ ورىنباسارى.

قازىرگى جاعدايدا ەلدىڭ كولىك-تران­زيت­تىك الەۋەتىن دامىتۋ جونىندەگى شارالاردى كۇشەيتۋ ءارى جانداندىرۋ قاجەت ەكەنى تۇسىنىكتى. بۇگىنگى تاڭدا قازاقستاندا تەمىر جول كولىك دالىزدەرىنىڭ تارماقتالعان جە­لىسى بار. بۇل رەتتە قازىرگى وتكىزۋ قابىلەتىنە قول جەتكىزىلدى دەۋگە بولادى. ياعني ءبىز ءوز مۇمكىندىكتەرىمىزدىڭ شەگىندە جۇمىس ىستەپ كەلەمىز. وسى ورايدا ترانزيتتىك-ەكسپورتتىق الەۋەتتى ارتتىرۋ ءۇشىن بەلگىلى ءبىر شارالار قابىلداۋ ماڭىزدى.

– قوسىمشا تەمىر جول ينفرا­قۇ­رىلىمىن, تەرمينالدىق قۋاتتاردى سالۋ بويىنشا جوسپارلار بار. تەڭىز سالاسىن دامىتۋعا ەرەكشە كوڭىل بولىنەدى. مەملەكەت باسشىسى بۇگىندە كاسپي تەڭىزىندەگى پوزيتسيامىزدى نىعايتىپ, اقتاۋ جانە قۇرىق تەڭىز پورتتارىن دامىتىپ, وتاندىق ساۋدا فلوتىن قۇرىپ, ودان ءارى دامىتاتىن ۋاقىت كەلگەنىن ەرەكشە اتاپ ءوتتى. ەگەر دالىزدەرگە جەكە توقتالاتىن بولساق, رەسەي مەن قىتاي اراسىنداعى ترانزيتتىك ەكسپورتتىق تاسىمالداردى دامىتۋ ءۇشىن دوستىق – مويىنتى تەمىر جول ۋچاسكەسىنىڭ ەكىنشى جولدارىنىڭ قۇرىلىسى جوسپارلانىپ وتىر. سونداي-اق الماتىنى اينالىپ وتەتىن اينالما تەمىر جول قۇرىلىسىن سالۋ كوزدەلگەن. بۇل الماتى تورابىن ورتا ەسەپپەن 30 پايىزعا جەڭىلدەتۋگە مۇمكىندىك بەرەدى. وعان قوسا باقتى – اياگوز تەمىر جول ۋچاسكەسى مەن ءۇشىنشى شەكارا وتكەلىنىڭ قۇرىلىسى ماسەلەسى قاراستىرىلىپ جاتىر. «قازاقستان تەمىر جولى» قازىرگى ۋاقىتتا رەسەيلىك سەرىكتەستەرمەن جانە قىتايلىق ارىپتەستەرمەن وسى جوبالاردى ىسكە اسىرۋ بويىنشا كەلىسسوزدەر جۇرگىزۋدە. ورتالىق ازيا وڭىرىنە قاتىستى ايتار بولساق, قازىرگى تاڭدا سارىاعاش ستانساسى تولىق قۋاتتىلىققا يە, رەزەرۆتەر شامامەن 1 ملن توننانى قۇرايدى. وسىعان بايلانىستى داربازا – ماقتاارال تەمىر جولىنىڭ قۇرىلىسى جوسپارلانعان. تەمىر جولدار ماقتاارال اۋدانىن نەگىزگى ماگيسترالدىق تەمىر جول جەلىسىمەن قوسۋعا مۇمكىندىك بەرەدى. تيىسىنشە, وسى ءوڭىردىڭ دامۋىنا وڭ اسەر ەتەدى, – دەيدى يندۋستريا جانە ينفراقۇرىلىمدىق دامۋ مينيسترلىگى كولىك كوميتەتى توراعاسىنىڭ مىندەتىن اتقارۋشى قاسىم تىلەپوۆ.

قارت قۇرلىققا اپارار جول

ق.تىلەپوۆتىڭ پىكىرىنشە, ترانسكاسپي حالىقارالىق كولىك باعىتىنىڭ الەۋەتى ءالى اشىلماعان. بۇل – نەگىزگى بالاما باعىتتاردىڭ ءبىرى. بۇعان دەيىن مەملەكەتتىك باعدارلامالار اياسىندا اقتاۋ پورتىندا پاروم كەشەنىن سالۋ بويىنشا جوبالار ىسكە اسىرىلدى, قولدانىستاعى پورتتىڭ وتكىزۋ قابىلەتىن كەڭەيتۋ بويىنشا شارالار قابىلداندى. اتاپ ايتقاندا, ءۇش قۇرعاق جۇك تەرمينالى سالىندى. بۇگىندە ينفراقۇرىلىمنىڭ وتكىزۋ قابىلەتى شامامەن 21 ملن توننانى قۇرايدى. وسى باعىتتا جۇكتىڭ كەز كەلگەن ءتۇرىن تاسىمالداۋعا مۇمكىندىك بار.

– سونداي-اق جەكە ساۋدا فلوتىمىز بار. اتاپ ايتقاندا, بۇگىندە كاسپيگە بەلسەندى قاتىساتىن ءتورت قۇرعاق جۇك كەمەسى اقتاۋ – باكۋ فيدەرلىك جەلىسى بويىنشا دا كونتەينەرلەر تاسىمالداۋدى قامتاماسىز ەتەدى. ۇزاق مەرزىمدى پەرسپەكتيۆادا جەكە پاروم فلوتىن سالۋعا نيەتتىمىز. ولاردىڭ سانى 10-عا جەتكىزىلمەك. قازىرگى تاڭدا نەگىزگى مونوپوليست – ازەربايجان كەمە شارۋاشىلىعى. كونتەينەرلىك اعىن ارتقان جاعدايدا اقتاۋ پورتىندا كونتەينەرلىك حاب سالۋ جوسپارلانىپ وتىر. وسى ماقساتتار ءۇشىن حالىقارالىق كولىك-لوگيستيكالىق كومپانياسىن تارتۋ كوزدەلگەن. وعان قوسا الەمدىك كونتەينەرلىك وپەراتورلار تارتىلادى. بۇل بىزگە ولاردىڭ كونتەينەرلىك پاركىن تارتۋعا مۇمكىندىك بەرەدى. بۇگىندە بىزدە كونتەينەرلەردىڭ جەتىسپەۋشىلىگى سەزىلىپ وتىر. ەگەر كونتەينەرلىك پارك­تى تارتا الساق, بۇل ەكسپورتتىق مۇمكىن­دىكتەردى ايتارلىقتاي ارتتىرۋعا جول اشادى. بۇل لوگيستيكا مەن سەرۆيس تۇرعىسىنان الدەقايدا ىڭعايلى ءارى جىلدام, – دەيدى ق.تىلەپوۆ.

كولىك كوميتەتى توراعاسىنىڭ مىن­دەتىن اتقارۋشى اتاپ وتكەندەي, قازاق­ستاندى ورتالىق ازياداعى نەگىزگى كو­لىك-لوگيستيكالىق حابقا اينالدىرۋ جوس­پارلانعان. ەۋروپاعا جول اشاتىن جوسپارلار جەتەرلىك.

– بولاشاعى زور, بىراق تولىق قول­دا­نىلماي وتىرعان باعىتتىڭ ءبىرى – يران. الەۋەتتىڭ 19 پايىزى عانا پايدالانىلىپ وتىر. سوندىقتان بۇل باعىتتى پايدالانۋعا ۇلكەن مۇمكىندىك بار. بۇل پارسى شىعاناعىنا, تيىسىنشە, ءۇندىستان نارىعىنا, ودان ءارى اشىق جولدارمەن ەۋروپالىق نارىقتارعا شىعۋعا مۇمكىندىك بەرەدى. جاقىندا مەملەكەت باسشىسىنىڭ ساپارى بارىسىندا دەمونستراتسيالىق كونتەينەرلىك پويىز ۇيىمداستىرىلدى. ول قازاقستان, تۇرىكمەنستان, يران, ۆان كولى ارقىلى تىكەلەي تۇركياعا ءوتتى. بۇل – دامىتۋعا جانە پايدالانۋعا بولاتىن تاعى ءبىر ىقتيمال جاقسى باعىت. جالپى, ءبىزدىڭ جوسپارىمىز – قازاقستاندى ور­تالىق ازيا وڭىرىندەگى نەگىزگى كولىك-لوگيستيكالىق حاب رەتىندە قايتا قۇرۋ. بۇل ءۇشىن بارلىق العىشارتتار بار, كولىك ينفراقۇرىلىمىنىڭ سۇلباسى جاسالدى. قازىر تەمىر جول ينفراقۇرىلىمىن, تەرمينالدىق جەلىلەردى ودان ءارى ۇلعايتۋ بويىنشا شارالاردى قارقىندى قا­بىلداۋ قاجەت. ونىڭ ىشىندە جىلجىمالى قۇرامدى جاڭارتۋ كەرەك. بەلگىلى ءبىر جوس­پارلار بار. مەملەكەت باسشىسى ءبىزدىڭ ۇسىنعان باستامالارىمىزدى قولدادى. قازىر ۇزاق مەرزىمدى پەرسپەكتيۆاعا جۇمىس توبىن قۇرىپ جاتىرمىز, – دەيدى ق.تىلەپوۆ.

«ترانسكاسپي حالىقارالىق كولىك باعىتى» حالىقارالىق قاۋىمداستىعىنىڭ باس حاتشىسى گايدار ابدىكەرىموۆتىڭ ايتۋىنشا, ترانسكاسپي حالىقارالىق كولىك باعىتى دەگەنىمىز – 8 مەملەكەتتىڭ اۋماعىندا 11 مىڭ شاقىرىمعا سوزىلعان جول باعدارى. بۇل جول قىتاي حالىق رەسپۋبليكاسىنىڭ شىعىس جاعالاۋىندا ورنالاسقان ليانيۋنگان پورتىنان باستالىپ, ەۋرووداققا دەيىن جەتەدى. جول قىتاي, قازاقستان, كاسپي تەڭىزى, ازەربايجان, گرۋزيا, تۇركيا, ۋكراينا, پولشا, رۋمىنيا سەكىلدى مەملەكەتتەردى باسىپ وتەدى. شىعىس پەن باتىستى جالعايتىن اسا ماڭىزدى كولىك ءدالىزى بولىپ سانالادى.

– 2017 جىلعى 30 قازاندا جۇكتەردى وتكىزۋ ماقساتىندا باكۋ – تبيليسي – كارس تەمىر جول تەلىمى اشىلدى. ول قازىر اياقتالۋعا جاقىن. ودان باسقا, 340 شاقىرىم اۋماقتى قامتيتىن زانگەزۋر جاڭا كولىك ءدالىزى سالىنادى. بۇل دا  قازاقستاننىڭ جۇك جونەلتۋشىلەرى ءۇشىن تاعى ءبىر زور مۇمكىندىك. ول 5 جىلدا بىتەدى دەپ جوسپارلانىپ وتىر. سەبەبى التى ەلدىڭ مينيسترلەرى باكۋ قالاسىندا كەزدەسىپ, ۇشجاقتى كەلىسىمگە قول قويىپ, دەكلاراتسيا جاريالادى. اتالعان كولىك ءدالىزى دە قازىرگى جۇك اعىنىنىڭ ەكپىنىن قارقىندى ەتەدى دەپ ويلايمىز. بۇدان  باسقا, تۇركيا مەملەكەتىندە ءىرى ينفراقۇرىلىمدىق جوبالار جۇزەگە اسىرىلۋدا. وسىلايشا, ءبىز ەۋرووداق ەلدەرىنە تىكەلەي شىعۋعا مۇمكىندىك الامىز. ءىرى ينتەگراتسيالانعان كولىك-لوگيستيكالىق كومپانيا قۇرۋ – قازىرگى زاماننىڭ تالابى. بۇل جاقسى ناتيجەلەرگە جەتەلەيدى. اتالعان باستاما جۇزەگە اسىرىلسا, قازاقستاننىڭ الەمدەگى لوگيستيكالىق يندەكسى ءبىرشاما وسەدى, – دەيدى گ.ابدىكەرىموۆ.

ونىڭ ايتۋىنشا, قازىرگى تاڭدا كولىك دالىزىندە تەڭىز, تەمىر جول سالاسىن قام­تيتىن جۇمىستار اتقارىلۋدا. بۇل مۋلتيمودالدى, ينتەرمودالدى كولىك ءدالىزى بولىپ ەسەپتەلەدى. سەبەبى وندا تاسىمالداۋ بىرنەشە كولىك تۇرىنە تيەسىلى تەح­نولوگيالارعا ساي جۇزەگە اسىرىلادى.

جول قۇرىلىسىن ساپالى اياقتاۋ ماڭىزدى

پرەزيدەنت, ەڭ الدىمەن, قۇرىلىسى باستالعان ماگيسترالدى باعىتتارداعى قايتا جاڭارتۋ جۇمىستارىن ۋاقتىلى ءارى ساپالى اياقتاۋ قاجەت ەكەنىن مالىمدەدى. بۇل جەردەگى اڭگىمە الماتى – قاراعاندى, اقتوبە – قاندىاعاش – ماقات جانە تالدىقورعان – وسكەمەن باعىتتارى تۋرالى بولىپ وتىر. 

يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ توراعاسى تولەگەن ءابدۋلليننىڭ ايتۋىنشا, الماتى – قاراعاندى جوباسىنىڭ ماڭىزى زور. جالپى ۇزىندىعى 946 شاقىرىم بولاتىن «ورتالىق – وڭتۇستىك» كولىك ءدالىزىن رەكونسترۋكتسيالاۋ نەگىزگى 4 ۋچاسكەگە بولىنگەن. ولار – قاراعاندى – بالقاش (363 شاقىرىم), بالقاش – بۋرىلبايتال (288 شاقىرىم), بۋرىلبايتال – قۇرتى» (228 شاقىرىم) جانە قۇرتى – قاپشاعاي (67 شاقىرىم).

– قازىرگى ۋاقىتتا جاڭا اسفالتبەتون جابىنى بويىنشا قاراعاندى – بالقاش ۋچاسكەسىنىڭ 277 شاقىرىمىندا قوزعالىس جۇزەگە اسىرىلۋدا. وسى جىلدىڭ 20 مامىرىنان باستاپ 10 شاقىرىمىندا نەگىزدىڭ تومەنگى قاباتى جانە 32 شاقىرىمىندا جابىننىڭ تومەنگى قاباتى توسەلدى. جىل سوڭىنا دەيىن قوزعالىستى تولىق اشۋ جوس­پارلانىپ وتىر. ايتا كەتەيىك, ۋچاسكەدە 198 قۇرىلىس تەحنيكاسى مەن 375 ادام جۇمىلدىرىلعان, – دەيدى ت.ابدۋللين.

بالقاش – بۋرىلبايتال جوباسى بو­يىنشا قازىرگى كۇنى 123 شاقىرىمىندا (43 پايىز) جابىن, 143 شاقىرىمىندا (50 پايىز) نەگىز جانە 13,2 ملن تەكشە مەترىندە (75 پايىز) جەر جۇمىستارى ورىندالىپتى. بيىل 114 شاقىرىم بو­يىنشا قوزعالىستى اشۋ جوسپارلانۋدا. جۇمىستار 2023 جىلى تولىق اياقتالماق.

– قازىرگى ۋاقىتتا بۋرىلبايتال – قۇرتى ۋچاسكەسىنىڭ 102 شاقىرىمىندا (71 پايىز) جابىن, 111 شاقىرىمىندا (78 پايىز) نەگىز جانە 6,7 ملن تەكشە مەترىندە (90 پايىز) جەر جۇمىستارى ورىندالدى. جوبانى ىسكە اسىرۋعا 200-دەن استام تەحنيكا مەن 312 ادام جۇمىلدىرىلعان. 2023 جىلى جۇمىستاردى تولىق اياقتاي وتىرىپ, 143 شاقىرىم بويىنشا قوزعالىستى اشۋ جوسپارلانعان. قۇرتى – قاپشاعاي ۋچاسكەسىندە قۇرىلىس-مونتاجداۋ جۇ­مىستارى جۇرگىزىلۋدە. قازىرگى ۋاقىتتا جوبانى ىسكە اسىرۋ ءۇشىن ينجەنەرلىك جانە وندىرىستىك پەرسونالدىڭ 277 مامانى جانە جول-قۇرىلىس تەحنيكاسىنىڭ 131 بىرلىگى جۇمىس ىستەۋدە. ايتا كەتۋ كەرەك, قۇرىلىس جۇمىستارى باستالعاننان بەرى 4 شاقىرىمىندا (6 پايىز) جابىن, 8 شاقىرىمىندا (12 پايىز) نەگىز جانە 3 ملن تەكشە مەترىندە (71 پا­يىز) جەر جۇمىستارى ورىندالدى. وسى جىلى توسەمنىڭ تومەنگى قاباتى بويىنشا ءبىر باعىتتا ءجۇرۋدى قامتاماسىز ەتۋ مىندەتى قويىلدى. نىساندى پايدالانۋعا بەرۋ 2024 جىلعا جوسپارلانعان, – دەپ ناقتىلادى كوميتەت توراعاسى.

تاعى ءبىر ماڭىزدى اۆتوموبيل ءدالىزى – اقتوبە – قاندىاعاش – ماقات با­عىتىنىڭ جالپى ۇزىندىعى 436 شاقىرىم. ءدالىز ەكى ۋچاسكەگە بولىنگەن اقتوبە – قاندىاعاش (96 شاقىرىم) جانە قاندىاعاش – ماقات (340 شاقىرىم).

– قاندىاعاش – ماقات ۋچاسكەسىندەگى قۇرىلىس-مونتاجداۋ جۇمىستارى 2018 جىلى باستالعان. قازىرگى تاڭدا جا­ڭا اسفالتبەتون جابىندىسى بو­يىن­شا قوزعالىس اشىلدى. وسى جىلى جۇ­مىس­تاردى تولىق اياقتاۋ جانە پايدالانۋعا بەرۋ كوزدەلۋدە. بۇدان بولەك, جوبا اياسىندا ماقات اۋدانى دوسسور كەنتىنىڭ ۇزىندىعى 5 شاقىرىم بولاتىن اينالما جولىنىڭ قۇرىلىسى جۇزەگە اسىرىلدى. اقتوبە – قاندىاعاش ۋچاسكەسىن رەكونسترۋ­كتسيالاۋ 2021 جىلدىڭ ءساۋىر ايىن­دا باستالدى. قازىرگى ۋاقىتتا قۇرىلىس جۇمىستارى تۇتاس ۇزىندىق بويىنشا جۇرگىزىلۋدە. وسىلايشا, 5 مىڭ تەكشە مەتردەن استام جەر توسەمى, 28 شاقى­رىم تومەنگى جابىن قاباتى توسەلدى جانە 36 سۋ وتكىزۋ قۇبىرى مونتاجدالدى.   جىل سوڭىنا دەيىن جاڭا جابىن بويىنشا 46 شاقىرىم بويى قوزعالىس اشۋ جوسپارلانۋدا. جۇمىستاردى تولىق اياقتاۋ 2023 جىلعا كوزدەلگەن, – دەيدى اۆتوموبيل جول­دارى كوميتەتىنىڭ توراعاسى.

مەملەكەت باسشىسىنىڭ ءوزى ماڭىز بەرگەن باعىتتىڭ ءبىرى – تالدىقورعان مەن وسكەمەندى بايلانىستىراتىن جوبا. تالدىقورعان – قالباتاۋ – وسكەمەن اۆتوموبيل جولىنىڭ جالپى ۇزىندىعى – 768 شاقىرىم. سونىڭ 37 شاقىرىمى ءى تەحنيكالىق ساناتقا جاتسا, 731 شاقى­رىمى ءىى ساناتقا تيەسىلى. جوباعا سايكەس اۆتوموبيل جولى 16 ۋچاسكەگە بولىنگەن.

– مۇنداعى رەكونسترۋكتسيالاۋ جۇ­مىس­تارى 2019 جىلى باستالعان. قازىرگى تاڭدا قوزعالىس جولدىڭ تومەنگى قاباتىنىڭ 593 شاقىرىمى بويىنشا اشىلعان. بارلىق ۇزىندىعى بويىنشا قوزعالىستى اشۋ وسى جىلدىڭ سوڭىنا تامان كوزدەلىپ وتىر. ال جۇمىستاردى تولىق اياقتاۋ 2023 جىلعا جوسپارلانعان. ايتا كەتۋ كەرەك, جۇمىستىڭ اياقتالۋ مەرزىمىنە COVID-19 پاندەمياسى جانە CITIC Construction Co.LTD, «ك-دورستروي» اق جانە «تو­ديني تسەنترال ازيا» قۇرامىنداعى كون­سورتسيۋمعا قاتىسۋشىلاردىڭ جۇمىستى جوسىقسىز ورىنداۋى سياقتى فاكتورلار اسەر ەتتى. CITIC Construction Co.LTD كونسورتسيۋمىنىڭ باسشىسى جۇمىستى ءوز كۇشىمەن جالعاستىرۋعا نيەت ءبىلدىردى. وسىلايشا, قۇرىلىس جۇمىستارى قايتا جاڭارتىلدى, تەحنيكانى موبيليزاتسيالاۋ, ماتەريالداردى ازىرلەۋ ىسكە اسىرىلۋدا, – دەيدى ت.ابدۋللين.

سونىمەن قاتار قىزىلوردا – قارابۇتاق – اقتوبە – رەسەي فەدە­را­تسياسىنىڭ شەكاراسى اۆتوجولى ەكى كەزەڭدە رەكونسترۋكتسيالانادى. ءبىرىنشى كەزەڭدە ۇزىندىعى 262 شاقى­رىم بولاتىن «اقتوبە – ۇلعايسىن» اۆتو­جولىنىڭ ۋچاسكەسىن رەكونسترۋكتسيا­لاۋ كوزدەلىپ وتىر. قازىرگى ۋاقىتتا جو­بالىق-سمەتالىق قۇجاتتاما ازىر­لە­نۋدە. ول 2023 جىلى دايىن بولادى دەپ كۇتىلۋدە. ال ەكىنشى كەزەڭدە, ياع­ني 2025 جىلدان كەيىن ۇزىندىعى
1 101 شاقىرىمدى قۇرايتىن قالعان ۋچاس­كەلەردى قايتا جاڭارتۋ جوسپارلانعان.