كوللاجدى جاساعان زاۋرەش سماعۇل, «EQ»
ال وسى «ەڭبەك» باعدارلاماسى اياسىندا ءوز كاسىبىن اشقان ابزال جانداردىڭ قاتارى ەڭبەكشىقازاق اۋدانىندا كوبەيىپ كەلەدى ەكەن. مىسالعا, سارىبۇلاق اۋىلىنىڭ تۇرعىنى, كوپبالالى انا اجارحان تاپاي ءوزىنىڭ جەكە كاسىبىن اشۋ ءۇشىن 200 ايلىق ەسەپتىك كورسەتكىش كولەمىندە گرانت ۇتىپ الدى. كوپبالالى انا وتكەن جىلدىڭ قىركۇيەك ايىندا حالىقتى جۇمىسپەن قامتۋ ورتالىعىنا بارىپ, «ەڭبەك» باعدارلاماسىنىڭ ەكىنشى باعىتى بويىنشا گرانت الۋ جولدارىن قاراستىرىپ, جاڭا يدەياسىن جۇزەگە اسىرۋ ماقساتىندا كونكۋرسقا قاتىسقان. ناتيجەسىندە, جوباسىن ويداعىداي قورعاپ شىعىپ, 583 مىڭ تەڭگە كولەمىندە گرانت يەگەرى اتاندى.
– ماعان گرانتتى قالاي الۋ, كونكۋرسقا قالاي ءتۇسۋ كەرەك ەكەنى جايلى حالىققا قىزمەت كورسەتۋ ورتالىعىنىڭ قىزمەتكەرلەرى جاقسىلاپ ءتۇسىندىرىپ بەردى. ءوزىم – اتامەكەنگە ورالعان قانداسپىن. ءبىز قىتايدا تۇرعان كەزدە اعاش وڭدەۋمەن اينالىستىق. سول ۋاقىتتا دومبىرا, استاۋ جاسايتىنبىز. سوندىقتان وتباسىمىزبەن كەلىسىپ, اعاش شەبەرحاناسىن اشۋعا بەل بۋدىق, – دەيدى كوپبالالى انا اجارحان تاپاي.
جالپى, اجارحان قىتايدان ەلگە كوشىپ كەلگەن سوڭ وتباسىن اسىراۋ ءۇشىن ءتۇرلى سالادا جۇمىس ىستەگەن. ال كاسىپ باستاۋدى ۇيرەنگەننەن كەيىن باعدارلاما بويىنشا ۇتىپ العان قاراجاتىنا اعاش وڭدەيتىن ستانوكتار مەن قاجەت قۇرال-جابدىقتاردى ساتىپ الدى.
سونداي-اق ەسىك قالاسىندا تۇراتىن كوپبالالى انا ءرازينا اسقانباي دا «ەڭبەك» باعدارلاماسىنىڭ يگىلىگىن كورىپ وتىر ەكەن. ءرازينا دا – قىتايدان ورالعان قانداسىمىز. ول كورشى ەلدى كوسمەتولوگيانىڭ قىر-سىرىن وقىپ, مەڭگەرگەن بولاتىن. ال ەلگە كەلگەسىن ءوز ءىسىن باستاۋدى ارمانداپ ءجۇردى. باستاپقىدا قارجى تاپشىلىعى قولبايلاۋ بولعانىمەن, ءوز ىزدەنىسىنىڭ ارقاسىندا مەملەكەتتىك باعدارلاما ارقىلى باستاپقى قاراجات الۋعا بولاتىنىن بىلگەن. قۇجاتتى ازىرلەپ, بيزنەس جوباسىن جاساعان رازيناعا «ەڭبەك» باعدارلاماسى ارقىلى قولداۋ قارجى بۇيىرعان. 200 ايلىق ەسەپتىك كورسەتكىش مولشەرىندەگى اقشا قولعا تيگەن سوڭ بىردەن كوسموتولگيا كابينەتىن جاساقتاپتى. قازىر ەسىك قالاسىنداعى ادام اياعى ۇزىلمەيتىن سۇلۋلىق سالونىنىڭ ءبىرى – وسى ءرازيانىڭ يەلىگىندە.
جالپى, ايماقتا قىز-كەلىنشەكتەر كاسىبىنىڭ دامۋى جولعا قويىلعانى انىق. بۇل باعىتتا وبلىستىق كاسىپكەرلەر پالاتاسى جانىنداعى ايەلدەر كاسىپكەرلىگىن دامىتۋ ورتالىعىنىڭ باستاماسى باياندى دەۋگە تولىق نەگىز بار. وڭىردە ايەلدەردى تىگىن ءىسى مەن كونديتەرلىك ءونىم ءوندىرىسى بويىنشا وقىتۋ جولعا قويىلدى. دەرەكتەرگە نازار سالساق, قازىر تىگىن ءىسى بويىنشا 25 ايەل جانە كونديتەرلىك ءوندىرىس بويىنشا 26 ايەل جاڭا ماماندىق مەڭگەرۋگە كىرىسكەن. ارنايى كۋرستاردا كاسىپكەرلەر, كوپبالالى انالار, حالىقتىڭ الەۋمەتتىك وسال توپتارىنان شىققان ايەلدەر ءبىلىم الۋدا.
– وبلىسىمىزدا ايەلدەر كاسىپكەرلىگى بەلسەندى دامىپ كەلەدى. بىلتىر دامىتۋ ورتالىعى اشىلدى, وندا كەڭەستەر مەن جوبالاردى سۇيەمەلدەۋ تۇرىندە قولداۋ كورسەتىلەدى. وقىتۋ ايەلدەر كاسىپكەرلىگىن دامىتۋ ورتالىعىنا ءوتىنىش بىلدىرگەندەردىڭ ۇسىنىستارى ەسكەرىلە وتىرىپ ۇيىمداستىرىلۋدا. تەگىن كۋرستى تامامداعان سوڭ ولار مامان رەتىندە ءوز كاسىبىن اشۋعا نەمەسە جۇمىسقا ورنالاسۋعا مۇمكىندىك الادى, – دەيدى الماتى وبلىستىق كاسىپكەرلەر پالاتاسىنىڭ ءبولىم باسشىسى ءسانيا ناۋرىزباەۆا.
الماتى وبلىسى
