اتالعان ماسەلە بويىنشا پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ, ۆيتسە-پرەمەر – ساۋدا جانە ينتەگراتسيا ءمينيسترى باقىت سۇلتانوۆ, اۋىل شارۋاشىلىعى ءمينيسترى ەربول قاراشوكەەۆ, يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ, ەنەرگەتيكا ءمينيسترى بولات اقشولاقوۆ, ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا, دەنساۋلىق ساقتاۋ ءمينيسترى اجار عينيات, وقۋ-اعارتۋ ءمينيسترى اسحات ايماعامبەتوۆ, ۇلتتىق ەكونوميكا ءبىرىنشى ۆيتسە-ءمينيسترى تيمۋر جاقسىلىقوۆ بايانداما جاسادى.
ۇلتتىق ەكونوميكا ۆيتسە-ءمينيسترى ت.جاقسىلىقوۆتىڭ ايتۋىنشا, ينفلياتسيا دەڭگەيىن تۇراقتاندىرۋ ماقساتىندا 2022-2024 جىلدارعا ارنالعان شارالار كەشەنى ىسكە اسىرىلىپ جاتىر. ول 67 ءىس-شارانى قامتيدى, ونىڭ ىشىندە بيىل 38 ءىس-شارا جانە 2024 جىلعا دەيىن 29 ءىس-شارا ىسكە اسىرىلماق.
بۇگىنگى تاڭدا 13 جەدەل ءىس-شارا ورىندالدى, 25 ءىس-شارا – ورىندالۋ ۇستىندە, 20 ورتا مەرزىمدى ءىس-شارا تۇراقتى نەگىزدە ورىندالۋدا.
جاڭا سالىق-بيۋدجەت ساياساتى اياسىندا بيۋدجەتارالىق قاتىناستاردى رەفورمالاۋ جانە مەرزىمدەرى مەن كەزەڭدەرىن ەكى ەسەگە قىسقارتا وتىرىپ, بيۋدجەتتىك جوسپارلاۋدىڭ رەينجينيرينگى بويىنشا جۇمىس جۇرگىزىلۋدە. قارجى-ەكونوميكالىق فۋنكتسيالاردى وڭىرلەردىڭ پايداسىنا قاراي ورتالىقسىزداندىرۋ بويىنشا جۇمىس باستالدى. بۇگىنگى تاڭدا بيۋدجەت كودەكسىنە وڭىرلەردىڭ ءوزىن-ءوزى قامتاماسىز ەتۋىن كۇشەيتۋ بويىنشا, ونىڭ ىشىندە سالىقتىق جانە سالىقتىق ەمەس تۇسىمدەردىڭ قوسىمشا تۇرلەرىن جەرگىلىكتى دەڭگەيگە بەرۋ ارقىلى تۇزەتۋلەر ازىرلەندى.
ت.جاقسىلىقوۆتىڭ ايتۋىنشا, مەملەكەت باسشىسىنىڭ تاپسىرماسىن ىسكە اسىرۋ ماقساتىندا مينيسترلىك حالىققا كوممۋنالدىق قىزمەت تاريفتەرىن كوتەرۋگە 180 كۇنگە موراتوري ەنگىزدى. وسىعان بايلانىستى 100-دەن اسا تابيعي مونوپوليا سۋبەكتىسىنىڭ تاريفتەرى تۇزەتىلدى, بۇل حالىققا 3,2 ملرد تەڭگەدەن استام قاراجاتتى ۇنەمدەۋگە مۇمكىندىك بەردى.
بۇگىنگى تاڭدا تابيعي مونوپوليالار سالالارىندا 1 450-دەن استام قىزمەت كورسەتەتىن 1 250-دەن استام تمس قىزمەتىن جۇزەگە اسىرادى جانە 60-تان استام قىزمەت كورسەتەدى. 250-دەن استام تمس شەكتى (ۇزاق مەرزىمدى) تاريفتەر بويىنشا جۇمىس ىستەيدى, بۇل تۇتىنۋشىلارعا تاريفتەردىڭ بولجامدىلىعىن, ينۆەستيتسيالار سالۋ ەسەبىنەن قىزمەتتەردىڭ ساپاسىن ارتتىرۋدى قامتاماسىز ەتەدى. بۇگىنگى تاڭدا موراتوري اياقتالدى. ءىى جارتىجىلدىقتا تاريفتەردىڭ بيىلعى ينفلياتسيا ءدالىزى شەگىندە وزگەرۋى كۇتىلۋدە.
قارجى ءمينيسترى ە.جاماۋباەۆ ۆەدومستۆونىڭ پرەزيدەنتتىڭ تاپسىرمالارىن دەرەۋ ورىنداۋدى قامتاماسىز ەتۋ ءۇشىن سالىق-بيۋدجەت ساياساتىن جەتىلدىرۋ بويىنشا مىنا شارالار قابىلداناتىنىن جەتكىزدى: قۇرىلىس جۇمىستارىن ورىنداۋ ءۇشىن جەتكىلىكتى ماتەريالدىق رەسۋرستارى بار مەردىگەرلەردى ىرىكتەۋ ماقساتىندا مەنشىكتى قۇرىلىس تەحنيكاسىنىڭ بولۋى تۋرالى مىندەتتى تالاپ بەلگىلەۋ, ول ءۇشىن مامانداندىرىلعان تەحنيكانىڭ بىرىڭعاي بازاسىن قۇرۋ جوسپارلانعان. بۇل ولاردىڭ بار-جوعىن اۆتوماتتى تۇردە تەكسەرۋگە مۇمكىندىك بەرەدى. مۇنداي شارالار قۇرىلىس جۇمىستارىن ورىنداۋ ءۇشىن ءوزىنىڭ بازالىق تەحنيكاسى جوق مەردىگەرلەردى ىرىكتەۋدەن وتكىزبەيدى.
ساۋدا جانە ينتەگراتسيا مينيسترلىگىنىڭ جۇمىسى بويىنشا مەملەكەت باسشىسى ازىق-ت ۇلىك ونىمدەرىنىڭ ناقتى جانە باعالىق قولجەتىمدىلىگىن قامتاماسىز ەتۋ, ازىق-ت ۇلىك قاۋىپسىزدىگىنىڭ ءىس جۇزىندەگى كورسەتكىشتەرىنە قول جەتكىزۋ بويىنشا بىرقاتار ناقتى تاپسىرما بەرگەن ەدى. «مەملەكەت باسشىسىنىڭ ۇلتتىق تاۋار وتكىزۋ جۇيەسىن قۇرۋدىڭ قولدانىستاعى مودەلىن قايتا قاراۋ جونىندەگى ەسكەرتۋلەرىنە وراي ءبىز مۇددەلى ينۆەستورلاردى تارتا وتىرىپ, كوتەرمە ساۋدا ورتالىقتارىن قۇرۋدىڭ بىرنەشە بالاما ستسەناريلەرىن قاراستىرۋ ۇستىندەمىز», دەدى ساۋدا جانە ينتەگراتسيا ءمينيسترى وسىعان وراي.
ونىڭ ايتۋىنشا, نارىق يەلەرىنىڭ جاۋاپكەرشىلىگىن كۇشەيتۋگە قاتىستى بيىل مامىر ايىندا 122 نارىقتى تەكسەرۋ اياقتالدى. ناتيجەسىندە, بىرقاتار جۇيەلى پروبلەما انىقتالدى. ولاردىڭ قىزمەتىن ودان ءارى جاڭعىرتۋ جونىندەگى زاڭناما نورمالارى ازىرلەندى.
اۋىل شارۋاشىلىعى ءمينيسترى ە.قاراشوكەەۆتىڭ ايتۋىنشا, مەملەكەت باسشىسىنىڭ تاپسىرمالارىن ورىنداۋ اياسىندا يمپورتتى الماستىرۋ ماسەلەسى كەشەندى تۇردە شەشىلەدى. 2022 جىلدىڭ سوڭىنا دەيىن اگروونەركاسىپ كەشەنىن دامىتۋ بويىنشا 295 ملرد تەڭگە سوماسىنا 237 ينۆەستيتسيالىق جوبانى ىسكە اسىرۋ جوسپارلانىپ وتىر, ونىڭ ىشىندە يمپورتتالاتىن پوزيتسيالاردىڭ 6 ءتۇرى بويىنشا 128,5 ملرد تەڭگە سوماسىنا 81 جوبا ىسكە اسىرىلادى. بۇل ءۇشىن وسى جوبالارعا جەڭىلدەتىلگەن كرەديت بەرۋ, سۋبسيديالاۋ, جەر رەسۋرستارى مەن ينفراقۇرىلىمدى بەرۋ قامتاماسىز ەتىلەدى.
پرەزيدەنت ەنەرگەتيكا مينيسترلىگىنە ترانزيتتىك كولىك جانە شەكارا پەريمەترى بويىنشا مۇناي ونىمدەرىنە سارالانعان باعا ازىرلەۋدى تاپسىرعان ەدى. ەنەرگەتيكا ءمينيسترى بولات اقشولاقوۆتىڭ ايتۋىنشا, قازىرگى ۋاقىتتا ۆەدومستۆو ديزەل وتىنىنا سارالانعان باعا بەلگىلەۋدىڭ بىرنەشە نۇسقاسىن قاراستىرۋدا. وتىننىڭ شىعارىلۋىنا جانە تۇتىنۋ سۋبەكتىسىنە قاراي سارالاۋ بويىنشا تاسىلدەر زەردەلەنبەك. بۇدان باسقا, شەكارالاس ايماقتاردا ورنالاسقان جانارماي قۇيۋ ستانسالارى ءۇشىن سارالانعان باعا بەلگىلەۋدىڭ نۇسقالارى, سونداي-اق يمپورتتىق ديزەل وتىنىن ورتا باعامەن ساتۋدىڭ جولدارى قاراستىرىلادى.
يندۋستريا جانە ينفراقۇرىلىمدىق دامۋ ءمينيسترى ق.وسكەنباەۆ اۋىل شارۋاشىلىعى تەحنيكاسى پاركىن جاڭارتۋ بويىنشا جۇرگىزىلىپ جاتقان جۇمىستار تۋرالى ايتىپ بەردى. ونىڭ ايتۋىنشا, مەملەكەت باسشىسىنىڭ تاپسىرماسىن ورىنداۋ شەڭبەرىندە ەكولوگيا, گەولوگيا جانە تابيعي رەسۋرستار مينيسترلىگىمەن بىرلەسىپ, وندىرۋشىلەردىڭ كەڭەيتىلگەن مىندەتتەمەلەرى وپەراتورىنىڭ (روپ) قاراجاتىن پايدالانۋ ارقىلى وتاندىق اۋىل شارۋاشىلىعى تەحنيكاسىن ساتىپ الۋ ءۇشىن جەڭىلدەتىلگەن كرەديت بەرۋ تەتىگىن ەنگىزۋ ماسەلەسى پىسىقتالۋ ۇستىندە. «سونىمەن قاتار اعىمداعى ليزينگتىك قارجىلاندىرۋ باعدارلاماسى اياسىندا اۋىل شارۋاشىلىعى تەحنيكالارى پاركىن جاڭارتۋدى جوسپارلاپ وتىرمىز. 2022 جىلى وسى باعدارلامانى ىسكە اسىرۋعا 3,5 ملرد تەڭگە كوزدەلگەن», دەدى ق.وسكەنباەۆ.
ق.وسكەنباەۆ مينەرالدى تىڭايتقىشتار ءوندىرۋ بويىنشا ونەركاسىپتى يگەرۋ ءۇش جەر قويناۋىن پايدالانۋشىمەن جۇرگىزىلىپ جاتقانىن اتاپ ءوتتى. ءوندىرۋدىڭ جيىنتىق كولەمى 4 ملن توننانى قۇرايدى. كالي تىڭايتقىشتارى بويىنشا 4 كەن ورنى بار, ولاردىڭ ۇشەۋى باتىس قازاقستان وبلىسىندا جانە بىرەۋى اقتوبە وبلىسىندا. «بيىلدان باستاپ 2026 جىلعا قاراي ىشكى نارىقتىڭ فوسفور جانە ازوت تىڭايتقىشتارىنا قاجەتتىلىگىن تولىعىمەن وتەيتىن جوبالاردى باستايمىز», دەدى ق.وسكەنباەۆ.
ونەركاسىپتىك كووپەراتسيا جانە ءوندىرىستى رەلوكاتسيا بويىنشا بۇگىنگى تاڭدا رەسەي فەدەراتسياسىمەن ونەركاسىپتىك كووپەراتسيا شەڭبەرىندە جالپى قۇنى 22,2 ملرد اقش دوللارىن قۇرايتىن 24,9 مىڭ جۇمىس ورنىن قۇرۋمەن 62 جوبا بار. 14 جوبا ىسكە اسىرىلدى, 11 جوبا ىسكە اسىرىلۋ ساتىسىندا, 14 جوبا پىسىقتالىپ جاتىر. ءىشىنارا رەلوكاتسيانى ەسكەرە وتىرىپ, 8,9 ملرد اقش دوللارىنا 12,6 مىڭ جۇمىس ورنىن قۇرۋمەن 23 جوبا پىسىقتالۋدا. «قاتتى پايدالى قازبالار بويىنشا جەر قويناۋىن پايدالانۋ سالاسىندا 509 كەلىسىمشارت جانە 1 738 ليتسەنزيا بار. بارلىق كەلىسىمشارت پەن ليتسەنزياعا تالداۋ جۇرگىزىلدى. قاتتى پايدالى قازبالار بويىنشا 263 كەلىسىمشارت تىڭدالىپ, قورىتىندىسى بويىنشا 58 كەلىسىمشارت بۇزىلدى جانە 5 كەلىسىمشارتتى بۇزۋ پروتسەسىن جۇرگىزۋدەمىز. بۇزۋشىلىقتاردى جويۋ تۋرالى 78 حابارلاما جولداندى. سونداي-اق 118 ليتسەنزيا قايتارىپ الىندى. بۇل باعىتتا جۇمىستار جالعاسۋدا. تەكسەرۋ قورىتىندىلارى تۋرالى ارالىق ەسەپ وسى جىلدىڭ تامىز ايىندا ەنگىزىلەدى», دەدى ق.وسكەنباەۆ. سونداي-اق ول پرەزيدەنت سىنىنا وراي سوڭعى 10 جىلدا ىسكە قوسىلعان اۆتوجول جوبالارىن تەكسەرۋ جونىندەگى كوميسسيا قۇرىلاتىندىعىن مالىمدەدى.
ەكولوگيا, گەولوگيا جانە تابيعي رەسۋرستار ءمينيسترى س.برەكەشەۆ مينەرالدىق رەسۋرستاردىڭ ۇلتتىق دەرەكتەر بانكىنىڭ ىسكە قوسۋىنىڭ سوزىلۋى مەردىگەردىڭ مىندەتتەمەلەرىن ورىنداماۋىمەن بايلانىستى ەكەنىن اتاپ ءوتتى. «كونكۋرس 2019 جىلى وتكىزىلىپ, «ترانستەلەكوم» اق جەڭىمپاز اتاندى. قارجى ءبولۋدى بەكىتۋ جانە مەردىگەردى تاڭداۋ راسىمدەرىنىڭ ۇزاقتىعىنان, جوبانى ىسكە اسىرۋ مەرزىمى 2021 جىلعى شىلدەگە اۋىستىرىلدى. بىلتىر اقپاراتتىق جۇيەنىڭ جۇمىس قابىلەتتىلىگىن تەستىلەۋ بىرنەشە رەت وتكىزىلىپ, ونىڭ دايىن ەمەستىگى انىقتالدى. «KPMG» تاۋەلسىز جوبالىق كەڭسەسىنىڭ باعالاۋى بويىنشا جوبا تەك 60%-عا عانا ىسكە اسىرىلدى», دەدى ەكولوگيالىق ۆەدومستۆو باسشىسى.
سونىمەن قاتار س.برەكەشەۆ 2,5 ملرد تەڭگە بيۋدجەت قاراجاتى قازىناشىلىق كوميتەتىنىڭ شوتتارىندا جاتقانىن ايتتى. مەردىگەردىڭ مىندەتتەمەسى ورىندالماي, قاراجات تولەنبەدى. سونىمەن قاتار وسىماقى 249 ملن تەڭگەنى قۇرايدى. «بيىل ناۋرىز ايىندا ەكونوميكانى جاڭعىرتۋ جونىندەگى ۇلتتىق كوميسسيانىڭ وتىرىسىندا Kaznedra جەر قويناۋىن پايدالانۋدىڭ بىرىڭعاي پلاتفورماسى شەڭبەرىڭدە وسى اقپاراتتىق جۇيەنى ودان ءارى ىسكە اسىرۋ تۋرالى ۇسىنىس قولداندى. بۇل – ۆەدومستۆوارالىق پلاتفورما, جەر قويناۋىن پايدالانۋشىلارمەن جۇمىس ىستەيتىن مەملەكەتتىك ورگاندار قاتىسادى. قازىر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن جۇمىس ىستەپ جاتىرمىز», دەدى ەكولوگيا, گەولوگيا جانە تابيعي رەسۋرستار ءمينيسترى.
مينيستر كيىك پوپۋلياتسياسىن باسقارۋعا قاتىستى 14 شىلدەدە عىلىم جانە سالالىق اسسوتسياتسيالاردىڭ قاتىسۋىمەن جينالىس وتكىزگەنىن ايتتى. بۇل ماسەلەنى شەشۋ اياسىندا ءبىرىنشى كەزەكتە كيىك پوپۋلياتسياسى ارەالىنداعى ەكوجۇيەلەردى كەشەندى باعالاۋ ءۇشىن تەرەڭ عىلىمي-زەرتتەۋلەر جۇرگىزۋگە باسا نازار اۋدارىلدى. بۇل كيىك پوپۋلياتسياسىن ءتيىمدى باقىلاۋ جانە ونىڭ رەسۋرستارىن تۇراقتى باسقارۋ ءۇشىن قاجەت. «وسىعان بايلانىستى, ءاليحان اسحان ۇلى, عىلىم جانە جوعارى ءبىلىم, قارجى مينيسترلىكتەرىنە وسى زەرتتەۋلەردى قارجىلاندىرۋدى بيىلدان باستاپ قاراستىرۋ مۇمكىندىگىن تاپسىرۋىڭىزدى سۇرايمىز», دەدى س.برەكەشەۆ.
دەنساۋلىق ساقتاۋ ءمينيسترى ا.عينياتتىڭ ايتۋىنشا, جۇكتى ايەلدەر مەن بالالارعا كەشەندى, جوعارى مامانداندىرىلعان مەديتسينالىق كومەك كورسەتۋ ءۇشىن نۇر-سۇلتان, قوستاناي, جەزقازعان, اتىراۋ, ورال, شىمكەنت قالالارىندا, تۇركىستان وبلىسىنىڭ سارىاعاش قالاسىندا جانە ورداباسى اۋدانىندا 8 زاماناۋي پەريناتالدىق ورتالىق سالۋ كوزدەلىپ وتىر. جەرگىلىكتى اتقارۋشى ورگاندار پەرزەنتحانالار مەن بالالار اۋرۋحانالارىنىڭ قازىرگى جانە كۇردەلى جوندەۋىن, ماتەريالدىق-تەحنيكالىق جاراقتاندىرىلۋىن, كادرلارمەن جاساقتالۋىن قامتاماسىز ەتۋى قاجەت. «مەديتسينالىق ساقتاندىرۋ جۇيەسىن جەتىلدىرۋ ءۇشىن ءبىز ستراتەگيالىق جوسپارلاۋ جانە رەفورمالار جونىندەگى اگەنتتىگىمەن بىرلەسىپ, مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋ ناتيجەلەرىنە تالداۋ جۇرگىزەمىز جانە ونى ىسكە اسىرۋدىڭ تيىمدىلىگىن ارتتىرۋ جونىندە ۇسىنىستار ەنگىزەمىز», دەدى ا.عينيات. ونىڭ ايتۋىنشا, سونداي-اق ءمامس جۇيەسىنە كىرۋ ءۇشىن دەربەس تولەۋشىلەر جارنانى 12 اي بۇرىن تولەۋ مەحانيزمى ەنگىزىلەدى. بۇل حالىقتى جۇيەگە كەڭ تارتۋعا مۇمكىندىك بەرەدى.
ءبىلىم بەرۋ بويىنشا مەملەكەت باسشىسىنىڭ تاپسىرمالارىن ورىنداۋ تۋرالى وقۋ-اعارتۋ ءمينيسترى ا.ايماعامبەتوۆتىڭ ايتۋىنشا, 2011 جىلدان بەرى بالاباقشالار جۇمىسىن باستاۋ ءۇشىن ليتسەنزيا المايدى, تەك قانا جۇمىسىن باستاعانى تۋرالى حابارلاما بەرەدى. 2021 جىلعا دەيىن ولار مەملەكەتتىك باقىلاۋ ياعني اتتەستاتتاۋدان دا تولىعىمەن بوساتىلعان بولاتىن. «ليتسەنزيادان بوساتۋ تۋرالى شەشىم جەكەمەنشىك سەكتوردىڭ جىلدام دامۋىنا, بالاباقشامەن قامتۋدى 99 پايىزعا جەتكىزۋگە اسەر ەتتى. بىراق سونىمەن قاتار ول ساپانى قامتاماسىز ەتۋگە تەرىس اسەرىن تيگىزدى. سوڭعى كەزدە كەيبىر بالاباقشالاردىڭ جۇمىسى بويىنشا اتا-انالاردىڭ ارىزدارى جيىلەپ كەتكەنى ەشكىمگە قۇپيا ەمەس. وسىعان وراي 2021 جىلى مەملەكەتتىك باقىلاۋدى قايتا ەنگىزدىك. ونىڭ ناتيجەلەرى دە پروبلەمالاردى كورسەتىپ وتىر, بالاباقشالاردىڭ 80%-ى باقىلاۋدان وتە المادى», دەدى ا.ايماعامبەتوۆ.
ولار اتتەستاتسيادان وتپەۋىنە بايلانىستى فورمالدى تۇردە جابىلادى, بىراق ليتسەنزيا بويىنشا تالاپ بولماعاننان كەيىن سول پروبلەمالارمەن قايتا اشىلىپ جۇمىسىن جالعاستىرا بەرەدى. وسىعان وراي بالالاردىڭ قاۋىپسىزدىگىن قامتاماسىز ەتۋ, تاربيە ساپاسىن ارتتىرۋ, ماقساتىندا بالاباقشالاردى كەزەڭ-كەزەڭمەن ليتسەنزيالاۋ ەنگىزىلەدى.
ال مەكتەپتەردە قازىرگى ۋاقىتتا 259 مىڭ وقۋشى ورنىنا تاپشىلىق بار. بولجام بويىنشا 2026 جىلعا قاراي وقۋشى ورنىنا سۇرانىس شامامەن 1 ملن 200 مىڭعا دەيىن وسەدى. سوندىقتان مەملەكەت باسشىسىنىڭ تاپسىرماسى نەگىزىندە بىلتىر 277 مەكتەپ اشىلدى. بيىل تاعى 225 مەكتەپ سالۋ جوسپارلاندى. سوندا وسى ەكى جىلدا كەم دەگەندە 326 مىڭنان اسا جاڭا ورىن اشىلادى.
ەڭبەك جانە حالىقتى الەۋمەتتىك قورعاۋ ءمينيسترى ت.دۇيسەنوۆا مەملەكەت باسشىسىنىڭ تاپسىرماسى بويىنشا وتباسىنىڭ تسيفرلى كارتاسىن ازىرلەنىپ جاتقانىن ايتتى. تسيفرلى كارتا رەسپۋبليكا حالقىن تۇگەل قامتيدى: 19,4 ملن ادام نەمەسە 6,5 ملن وتباسى. «15 تامىزعا دەيىن حالىقتى الەۋمەتتىك قولداۋ سالاسىنداعى وتباسىلاردىڭ اقپاراتى وزەكتەندىرىلەدى. 1 قىركۇيەكتەن باستاپ جىل سوڭىنا دەيىن ااك جانە تولەمدەردىڭ 9 ءتۇرى بويىنشا وتباسىنىڭ تسيفرلى كارتاسىنىڭ جۇمىسى سىناقتان وتكىزىلەدى, 2023 جىلعى 1 قاڭتاردان باستاپ الەۋمەتتىك قورعاۋ سالاسىنداعى بارلىق تاعايىنداۋ مەن تولەم پرواكتيۆتى فورماتتا كورسەتىلەتىن بولادى», دەدى ت.دۇيسەنوۆا.
ەحاقم باسشىسى ەڭبەك نارىعىن رەتتەۋ جانە دامىتۋ 8 باعىت بويىنشا جۇزەگە اساتىنىن اتاپ ءوتتى. 10 مىڭ تۇرعىنعا 100 جاڭا جۇمىس ورنىن قامتاماسىز ەتۋ ءۇشىن بارلىق ۇلتتىق جوبا مەن بيزنەستىڭ جەكە باستامالارى اياسىندا جۇرگىزىلەتىن جوبالار مەن جۇمىس ورىندارى ەلەكتروندى ەڭبەك بيرجاسىندا ورنالاستىرىلادى. ەلەكتروندى ەڭبەك بيرجاسى بارشاعا قولجەتىمدى بوس جۇمىس ورىندارىنىڭ الاڭىنا اينالادى.
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى ب.مۋسين مەملەكەت باسشىسىنىڭ تسيفرلاندىرۋعا قاتىستى سىندارى ورىندى ەكەنىن ايتا كەلە: «مەملەكەت باسشىسى اتاپ وتكەندەي, تسيفرلار بويىنشا كەيبىر سالالاردا اقاۋلىقتار بار. ولار – گەولوگيالىق بازا, جەر قويناۋىن پايدالانۋشىلارمەن قارىم-قاتىناس, دەنساۋلىق ساقتاۋ سالاسىنداعى قاعازباستىلىق پەن بيۋروكراتيا. وسىعان وراي مينيسترلىك قۇزىرەتتى مەملەكەتتىك ورگان رەتىندە وسى سالالارداعى ءتيىستى جوبالاردى تەحنيكالىق تۇرعىدان جۇزەگە اسىرۋدى ءوز باسقارۋىنا الادى», دەدى.
بۇل رەتتە باعدات مۋسين 3 جىلدىق كەلىسىمشارتقا قول قويۋعا مۇمكىندىك بەرەتىن زاڭ جوباسىنا دايىندالىپ جاتقانىن مالىمدەدى. «سونداي-اق جىلدىڭ اياعىنا دەيىن اقپاراتتىق جۇيەلەردىڭ قۇرۋ ۋاقىتىن 6 ايعا دەيىن قىسقارتامىز. مەملەكەتتىك ورگاندارعا قوسىمشا رەسۋرس بەرەتىن ۇلتتىق ينفراقۇرىلىم 2023 جىلدىڭ ورتاسىندا ىسكە قوسىلادى جانە ءاربىر سالا بويىنشا تسيفرلى ستراتەگيا ازىرلەنىپ, بەكىتىلەدى», دەدى.
Kaz-Nedra ەلەكتروندى پلاتفورماسى جوباسىنىڭ ىسكە اسىرۋعا قاتىستى قازىرگى ۋاقىتتا 48 بيزنەس-پروتسەستىڭ رەينجينيرينگى جۇرگىزىلىپ, ولاردى بەكىتۋ جونىندەگى جۇمىس سالالىق مەملەكەتتىك ورگاندارمەن پىسىقتالىپ جاتىر. «تەحنيكالىق تۇرعىدان ىسكە اسىرۋدى ءوز قولىمىزعا الا وتىرىپ, بىرقاتار ءمودۋلدى, ونىڭ ىشىندە جەكە كابينەت, ينتەراكتيۆتى كارتا, ليتسەنزيالارعا تاپسىرىس بەرۋ جانە ت.ب. قىزمەتتەر وسى جىلدىڭ سوڭىنا دەيىن قولجەتىمدى بولادى. ال «تسيفرلى جەر قويناۋى» دەرەكتەر قورى 2023 جىلدىڭ ءبىرىنشى جارتىجىلدىعىندا ىسكە قوسىلادى», دەدى ب.مۋسين.
دەنساۋلىق ساقتاۋدى تسيفرلاندىرۋ بويىنشا مينيستر ەHealth دەنساۋلىق ساقتاۋدىڭ جاڭا ەلەكتروندى ارحيتەكتۋراسىنا كوشۋ بويىنشا جۇمىستار باستالعانىن مالىمدەدى. «ازاماتتار ءۇشىن بۇل ۇلتتىق دەنساۋلىق پاسپورتىن قالىپتاستىرۋعا مۇمكىندىك بەرەدى. ال دارىگەرگە, پاتسيەنت جونىندەگى تولىق اقپاراتتى قولجەتىمدى ەتەدى. باستى مىندەت – دەنساۋلىق ساقتاۋ مينيسترلىگىنە باعىناتىن ۇيىمداردىڭ اقپاراتتىق جۇيەلەرىن بىرىكتىرۋ», دەدى.
«زەردە» حولدينگىن رەفورمالاۋ تۋرالى ءسوز قوزعالدى. ونى رەفورمالاۋ جىلدىڭ باسىندا باستالعان بولاتىن. ونىڭ ءبىرى جۇيەلىك ينتەگراتوردىڭ قىزمەتى «تسيفرلى ۇكىمەتتى قولداۋ ورتالىعىنا» بەرىلدى. «يننوۆاتسيالاردى دامىتۋدىڭ بىرىڭعاي ەكوجۇيەسىن قۇرۋ ماقساتىندا QazInnovations اگەنتتىگى مەن استانا حاب تەحنوپاركىن ءبىر ۇيىمعا, ياعني يننوۆاتسيالىق تەحنولوگيالار پاركىنىڭ قۇرامىنا بىرىكتىرۋ ارقىلى وڭتايلاندىرۋ ۇسىنىلادى. ال ۇلتتىق اقپاراتتىق تەحنولوگيالار اكتسيونەرلىك قوعامىن تىكەلەي تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ قول استىنا بەرىپ, «زەردە» حولدينگىن تاراتىپ جىبەرۋ ۇسىنىلادى», دەدى ۆەدومستۆو باسشىسى.
ماسەلەنى قورىتىندىلاعان پرەمەر – مينيستر ءاليحان سمايىلوۆ مەملەكەت باسشىسى بەرگەن تاپسىرمالاردىڭ جەدەل ءارى ناتيجەلى ورىندالۋى كەرەك ەكەنىن ەسكەرتتى. «پرەزيدەنتتىڭ ءبىزدىڭ جۇمىسىمىزعا قاتىستى ايتىلعان سىنى وتە ماڭىزدى ەكەنىن اتاپ وتكىم كەلەدى. بارلىق مەملەكەتتىك ورگاندار, اكىمدىكتەر مەن كۆازيمەملەكەتتىك سەكتور بەلسەندىلىگىن ارتتىرۋى قاجەت. ءبىرىنشى باسشىلار مەملەكەت باسشىسىنىڭ تاپسىرمالارىنىڭ ءاربىر تارماعىن جەكە باقىلاۋعا السىن», دەدى ءا.سمايىلوۆ.
سونداي-اق ۇكىمەت باسشىسى مينيسترلەر كابينەتى مەن وبلىستاردىڭ اكىمدەرى ءوزارا تىعىز بايلانىس ورناتىپ, ءاربىر ماسەلەنى بىرلەسىپ شەشۋدىڭ ماڭىزدى ەكەنىن ايتتى. «جالپى, ۇكىمەت جۇمىسىنىڭ ناتيجەلى بولۋى ارقايسىمىزدىڭ ءتيىمدى جۇمىس ىستەۋىمىزگە بايلانىستى. ەل ەكونوميكاسىنىڭ دامۋى, ازاماتتاردىڭ تۇرمىس ساپاسىنىڭ جاقسارعانىن سەزىنۋى ءۇشىن جوسپارلانعان جۇمىستى بىرلەسىپ جۇزەگە اسىرۋعا كۇش سالۋىمىز كەرەك», دەپ تۇيىندەدى ءسوزىن پرەمەر-مينيستر.
