وڭىردە مەديتسينا سالاسىن دامىتۋ ءۇشىن شەتەلدەن زاماناۋي جابدىقتار ساتىپ الىنىپ, اق حالاتتىلار ەۋروپا ەلدەرىنە بىلىكتىلىكتەرىن ارتتىرۋعا اتتانىپ جاتىر. وتاندىق مەديتسينالىق ءوندىرىس تە نازاردان تىس قالماعان.
شىعىس قازاقستاندا حيرۋرگيالىق قۇرال-سايماندار شىعارۋ كوزدەلۋدە. بۇل ءۇشىن وسكەمەندەگى د.سەرىكباەۆ اتىنداعى شقتۋ مەن سەمەي مەديتسينالىق ۋنيۆەرسيتەتى كەلىسىمگە كەلىپ وتىر.
«مەديتسينالىق ۋنيۆەرسيتەتتىڭ ءتيىستى پاتەنتى بار. ولار بىزگە حابارلاسىپ, وسىنداي جوبا ۇسىندى. حيرۋرگيالىق وتا جاسايتىن قۇرال-سايماندار جاساۋ جوسپارلانعان. بىراق ول ءۇشىن ءتيىستى جابدىقتار قاجەت. قازىر ەكى ۋنيۆەرسيتەت اقىلداسىپ, اتقارىلاتىن جۇمىس الگوريتمىن قۇرىپ جاتىرمىز. سودان كەيىن قارجى بولەتىن ينۆەستور ىزدەيمىز», دەدى د.سەرىكباەۆ اتىنداعى شقتۋ قەاق باسقارما توراعاسى - رەكتورىنىڭ مىندەتىن اتقارۋشى ساۋلە راحمەتۋللينا.
