قالاي دەسەك تە, كارتينانىڭ باعىت-باعدارى, كەسكىن-كەلبەتى وزگەشە. قازاق بەينەلەۋ ونەرىنىڭ ءبىرتۋار تۇلەگى, شوقتىعى بيىك سۋرەتشى جاڭاتاي شاردەنوۆتىڭ قولتاڭباسى بىردەن بايقالادى. تابيعاتقا كەلگەندە تاعالاعان جورعاداي جۇيتكيتىن شەبەردىڭ ەڭبەگى وراسان. 1978 جىلى جازىلعان «كۇننىڭ باتۋ سيمفونياسى» بۇگىنگە دەيىن ءوز قۇنىن جوعالتقان جوق.
قىلقالام شەبەرىنىڭ ەرەكشەلىگى دە سول, تابيعات كورىنىستەرىن بەينەلەي وتىرىپ, بوياۋدى قالىڭ ءارى بىرنەشە قاباتتا قولدانۋ ارقىلى, تاۋدىڭ قىرلارىن, بولشەكتەرىن ءبىر-بىرىمەن ۇيلەستىرىپ, شىنايى بەينەسىن تاپقان. تەك تاۋلاردىڭ عانا ەمەس, اعاش جاپىراقتارىن ءدال ورنىقتىرىپ, گۇلدەردىڭ كۇلتەلەرىنە قونعان كولەڭكەگە دەيىن ماعىنا بەرگەن. ەركىن جاعۋ تاسىلىمەن ولاردىڭ فاكتۋراسىن دا ناق تاۋىپتى. سونىڭ اسەرىنەن بەينەلەر كەنەپتىڭ سىرتىنان جارىپ شىعىپ, شىنايى تۇردە جاندانا, تىرىلە تۇسەدى. ءبىر سوزبەن ايتقاندا, قازىرگى زاماناۋي 3D فورماتتا ۇسىنىلىپ تۇرعانداي اسەر قالدىرادى.
سۋرەتكەردىڭ ءار شىعارماسى جەكە ءبىر الەم. ونەرتانۋشىلار دا سولاي دەپ پايىمدايدى. سان الۋان تۇستەردى قولدانا وتىرىپ, جىلدىڭ ءار مەزگىلىنە وزگەشە ءوڭ بەرگەن. تىلسىمعا تولى تابيعاتتىڭ كەرەمەتىن تاۋ كورىنىستەرىمەن اسەرلى جەتكىزگەن.
باقساڭىز, «كۇننىڭ باتۋ سيمفونياسى» شىعارماسىنداعى شىرىندى جاسىل, قىزعىلت, قارا-كوك, قوڭىر, ياعني كەشكى ۋاقىتتى بەينەلەيتىن قانىق تۇستەردىڭ گامماسى رەت-رەتىمەن جوعارىلاي جاعىلعان. ءتىپتى ءبىر-بىرىمەن بىرلەسە وتىرىپ, كۋلميناتسيا جاساپ, قورىتىندى اككوردتارى قانىق قىزىل رەڭگكە ۇلاسادى. وسىلايشا سالتاناتتى تۇردە شىعارما ءتامامدالادى.
