سەناتور سەرگەي ەرشوۆ قاراعاندى وبلىسىنا جۇمىس ساپارى بارىسىندا وساكاروۆ, بۇقار جىراۋ جانە قارقارالى اۋداندارىندا بولىپ, اۋدان اكىمدەرىمەن, سونداي-اق جەرگىلىكتى ءماسليحات حاتشىلارىمەن جانە اۋداندىق ىشكى ىستەر بولىمدەرىنىڭ باسشىلارىمەن كەزدەستى.
كەزدەسۋ بارىسىندا دەپۋتات جەرلەستەرىنە قازاقستان رەسپۋبليكاسى پارلامەنتى سەناتىنىڭ زاڭ شىعارۋ جۇمىستارى مەن وتكەن سەسسيادا سەنات قابىلداعان زاڭدار تۋرالى جان-جاقتى ايتىپ بەردى. سەناتور كوپتەگەن زاڭ جوبالارى ازاماتتارىمىزدىڭ ءال-اۋقاتىن ارتتىرۋعا باعىتتالعانىن باسا ايتتى.
* * *
سەنات دەپۋتاتتارى نۇرلان بەكنازاروۆ پەن ايگۇل قاپباروۆا شىمكەنت قالاسىنىڭ قوعامدىق كەڭەسىنىڭ مۇشەلەرىمەن كەزدەستى. سەناتورلار ولارعا VII شاقىرىلىمنىڭ 2 سەسسياسى بارىسىندا اتقارىلعان جۇمىستار تۋرالى ايتىپ, پارلامەنتتىڭ وسى سەسسياداعى قىزمەتى ازاماتتاردىڭ ءال-اۋقاتىن ارتتىرۋ جونىندەگى كەشەندى شارالار مەن قوعامدىق-ساياسي باستامالاردى ىسكە اسىرۋ ءۇشىن ۋاقىتىندا زاڭنامالىق قامتاماسىز ەتۋگە باعىتتالعانىن اتاپ ءوتتى.
* * *
سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى ۆلاديمير ۆولكوۆ قوناەۆ قالاسىندا بولدى. ول ايماق اكتيۆىمەن, وبلىستىق جانە قالالىق ءماسليحات دەپۋتاتتارىمەن كەزدەستى جانە ەلىمىزدىڭ ساياسي جۇيەسىن ساپالى ترانسفورماتسيالاۋعا باعىتتالعان كونستيتۋتسيالىق رەفورمانىڭ نەگىزگى ەرەجەلەرىن تالقىلادى. دەپۋتات قۇقىق قورعاۋ ورگاندارىنىڭ وكىلدەرىنە ارناعان سوزىندە جۇرتشىلىق قۇقىق قورعاۋ جانە سوت جۇيەلەرىنەن ناقتى وزگەرىستەر كۇتىپ وتىرعانىن ايتا كەلىپ, پوليتسيانىڭ وزبىرلىعىنا, بىلىكسىز پروكۋرورلار مەن ىمىراشىل سۋديالارعا ورىن بولماۋى كەرەكتىگىن اتاپ ءوتتى.
سەناتور ۆلاديمير ۆولكوۆ ءوز سوزىندە پارلامەنتتىڭ زاڭ شىعارۋ قىزمەتى تۋرالى تانىستىردى. ونىڭ ىشىندە قازاقستاندىقتاردى الەۋمەتتىك قورعاۋدى كۇشەيتۋ جانە ەلىمىزدىڭ الەۋمەتتىك-ەكونوميكالىق دامۋىنا باعىتتالعان زاڭنامالىق اكتىلەر تۋرالى ايتىلدى. ول سونداي-اق كونستيتۋتسيانىڭ جاڭارتىلعان نورمالارىن جانە ەلىمىز پرەزيدەنتىنىڭ باسقا دا باستامالارىن ىسكە اسىرۋ ءۇشىن 20-دان استام زاڭعا وزگەرىستەر ەنگىزۋ قاجەت ەكەنىن اتاپ ءوتتى.
* * *
سەنات دەپۋتاتى سۇلتان دۇيسەمبينوۆ جەتىسۋ وڭىرىنە جۇمىس ساپارىمەن باردى. سەناتور تالدىقورعان گۋمانيتارلىق-تەحنيكالىق كوللەدجىنىڭ وقىتۋشىلارىمەن ورتا ارناۋلى ءبىلىم بەرۋدى دامىتۋ ماسەلەسىن تالقىلادى. ءبىلىم وشاعىنىڭ كۇندىزگى بولىمىندە 370-تەن استام ستۋدەنت ءبىلىم الۋدا. سەناتور وقۋ ورنىنىڭ ماتەريالدىق-تەحنيكالىق جاعدايىمەن تانىسىپ, كوللەدج وقىتۋشىلارىمەن اڭگىمەلەستى. جيىن بارىسىندا ءبىلىم وشاعىنا قولداۋ كورسەتۋ ماسەلەسى جانە ستۋدەنتتەرگە ارنالعان شەبەرحانا قۇرىلىسىنا بيۋدجەتتەن قارجى ءبولۋ قاجەتتىگى تالقىلاندى.
* * *
سەنات دەپۋتاتتارى نۇرتورە ءجۇسىپ پەن دينار نوكەتاەۆا الماتى قالاسىندا «الماتىكىتاپ» باسپا ۇيىندە ەڭبەك ۇجىمىمەن كەزدەستى. سەناتورلار قازاقستانداعى باسپا نارىعىن دامىتۋ بارىسىمەن تانىسا كەلىپ, جاڭا تاجىريبەلەرگە نازار اۋداردى. الەم جانە تمد ەلدەرى اراسىندا كىتاپ باسىپ شىعارۋ سالاسىندا ۇزدىكتەر قاتارىنان كورىنىپ كەلە جاتقان «الماتىكىتاپ» باسپا ءۇيىنىڭ قىزمەتىن 200-دەن استام مەكتەپ پايدالانىپ وتىرعانى قۋانتادى. مەكتەپ مۇعالىمدەرى مەن وقۋشىلار «الماتىكىتاپ» ازىرلەگەن پلاتفورما ارقىلى ۇزدىكسىز ءبىلىم بەرۋدى جالعاستىرا الادى. سەناتورلار اباي اتىنداعى كىتاپ ۇيىندە بولىپ, كىتاپ ساۋداسىن جەتىلدىرۋ ماسەلەسىنە نازار اۋداردى.
