بقو پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەنىندەي, وقيعا 6 شىلدە كۇنى ساعات 19:00-دە سامارا-شىمكەنت جولىنداعى 3-ساياجاي قوعامى ايالداماسى تۇسىندا بولعان.
«50 جاستاعى جۇرگىزۋشى «فولكسۆاگەن پاسسات» اۆتوكولىگىنىڭ رۋلىنە يە بولا الماي, قارسى بەتكە شىعىپ كەتكەن. سونىڭ سالدارىنان 53 جاستاعى جۇرگىزۋشى ايداپ كەلە جاتقان «تويوتا اۆەنسيس» اۆتوكولىگىمەن سوقتىعىسادى. جول اپاتى سالدارىنان 50 جاستاعى جۇرگىزۋشى وقيعا ورنىندا كوز جۇمدى. «تويوتا اۆەنسيس» اۆتوكولىگىندە وتىرعان 1988 جىلعى جولاۋشى ايەل اۋرۋحاناعا جەتكىزىلدى. قازىرگى كەزدە قر قك 345-بابى 3-بولىگىنە سايكەس سوتقا دەيىنگى تەرگەۋ امالدارى جۇرگىزىلىپ جاتىر», دەپ حابارلادى دەپارتامەنتتەن.
وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ ناقتىلاۋىنشا, جەدەل جاردەم ساعات 19:27-دە شاقىرتىلعان. جۇرگىزۋشى جەدەل جاردەم جەتكەنگە دەيىن قايتىس بولدى.
اۋرۋحاناعا جەتكىزىلگەن التى ادامعا باستاپقىدا قويىلعان دياگنوزدار راستالمادى. ولاردىڭ ءبارى دە امبۋلاتورلىق ەم الۋعا جىبەرىلدى.
