ۇكىمەت • 05 شىلدە، 2022

تۇرعىن ءۇي ساياساتىنىڭ تىڭ تاسىلدەرى

88 رەت كورسەتىلدى

پرەمەر-مينيستر ءاليحان سمايىلوۆتىڭ توراعالىعىمەن ۇكىمەتتىڭ كەزەكتى وتىرىسى ءوتتى. وتىرىستىڭ كۇن تارتىبىندەگى ءبىرىنشى ماسەلە تۇرعىن ءۇي ساياساتىنداعى جاڭا تاسىلدەردى ىسكە اسىرۋ بولدى. بۇل ماسەلە تۋرالى يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ، «بايتەرەك» ۇبح» اق باسقارما توراعاسى قانات شارلاپاەۆ، سونداي-اق بىرقاتار ءوڭىر اكىمى بايانداما جاسادى.

قالالاردى كەشەندى سالۋ ستاندارتى ازىرلەندى

يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆتىڭ ايتۋىنشا، بيىل قازاقستاندا 15،1 ملن شارشى مەتر نەمەسە 138 مىڭ تۇرعىن ءۇي سالۋ جوسپارلانىپ وتىر. «جۇرگىزىلىپ جاتقان تۇرعىن ءۇي ساياساتى اياسىندا 7 مىڭنان استام ازامات ساتىپ الۋ قۇقى­عىنسىز جالعا بەرىلەتىن تۇرعىن ۇيمەن قام­تاماسىز ەتىلمەك. وڭىرلەردە كەزەكتە تۇرعاندار ءۇشىن وتباسى بانكىنىڭ نەسيەلىك باعدارلامالارى ارقىلى ساتىلاتىن 9،8 مىڭ پاتەر سالىنىپ جاتىر. بۇدان باسقا، «باقىتتى وتباسى» باعدارلاماسى بو­يىنشا جەڭىلدەتىلگەن قارىزدار تۇرىندەگى مەملەكەتتىك قولداۋ شارالارىمەن كەزەكتە تۇرعان 5 مىڭنان استام ادام مەن جەكە تۇرعىن ءۇي قورىنان باسپانانى جالعا العانى ءۇشىن تۇرعىن ءۇي تولەمدەرىن سۋبسيديالاۋمەن كەزەكتە تۇرعان 70 مىڭعا جۋىق ادامدى قامتۋدى جوسپارلاپ وتىرمىز»، دەدى ق.وسكەنباەۆ.

بيىلعى 5 ايدىڭ قورىتىندىسى بويىنشا تۇرعىن ءۇيدى پايدالانۋعا بەرۋ كولەمى 103،4%-عا جانە تۇرعىن ءۇي قۇرىلىسىنا ينۆەستيتسيالار 122،8%-عا ورىندالدى. الايدا ماڭعىستاۋ، پاۆلودار جانە سولتۇستىك قازاقستان وبلىستارىندا وتكەن جىلمەن سالىستىرعاندا تۇرعىن ءۇيدى پايدالانۋعا بەرۋ كورسەتكىشىنىڭ تومەندەگەنى بايقالادى. «اتالعان وبلىستاردا اكىمدىكتەردىڭ تۇرعىن ءۇي نىساندارىنداعى قۇرىلىس جۇمىستارىن جانداندىرۋى قاجەتتىگىن اتاپ وتەمىن»، دەدى ق.وسكەنباەۆ.

مينيستر جالپى رەسپۋبليكالىق كورسەتكىشكە قول جەتكىزۋ ءۇشىن وڭىرلەرگە ءتيىستى جوسپارلار جەتكىزىلىپ، ولاردىڭ ورىندالۋىن قامتاماسىز ەتۋ ءۇشىن اكىمدىكتەر ناقتى نىساندار مەن ولاردى ىسكە اسىرۋ مەرزىمدەرى كورسەتىلگەن جول كارتالارىن بەكىتكەنىن اتاپ ءوتتى. «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا جەكە قۇرىلىستى دامىتۋ ءۇشىن 2021-2025 جىلدارعا جەكە تۇرعىن ءۇي سالۋ ءۇشىن بەرىلەتىن 235 مىڭ جەر ۋچاسكەسىن ينجەنەرلىك كوممۋنيكاتسيالارمەن قامتۋ جوسپارلانعان. ونىڭ ىشىندە وبلىس ورتالىقتارىندا، شاعىن قالالاردا 125 مىڭ جەر ۋچاسكەسى جانە اۋىلدىق جەرلەردە 110 مىڭ جەر ۋچاسكەسى قاراستىرىلعان. «بيىل 50 257 جەر تەلىمىن ينجەنەرلىك كوممۋنيكاتسيالارمەن قامتۋ بويىنشا 180 جوبا ىسكە اسىرىلىپ جاتىر. ينفراقۇرىلىممەن قامتىلاتىن جەر ۋچاسكەلەرىنىڭ ەڭ كوپ سانى تۇركىستان، اقتوبە جانە ماڭعىستاۋ وبلىستارىندا ورنالاسقان»، دەدى ول.

اكىمدىكتەردىڭ دەرەكتەرىنە ساي بۇگىندە تۇرعىن ۇيگە مۇقتاج 613 مىڭنان استام ازامات كەزەكتە تۇر، ولاردىڭ 222 مىڭى – الەۋمەتتىك وسال ساناتتاعى ازاماتتار. 70 مىڭ ادامنىڭ تابىسى ءبىرىنشى ەڭ تومەنگى كۇنكورىس دەڭگەيىنەن تومەن، 51 مىڭى – كوپ بالالى وتباسىلار، 2 مىڭى – جەتىم بالالار، 10 مىڭى – ءى جانە ءىى توپتاعى مۇگەدەكتەر جانە 7 مىڭى – مۇگەدەك بالاسى بار وتباسىلار.

ايتا كەتۋ كەرەك، مەملەكەت باسشى­سىنىڭ تاپسىرماسىنا سايكەس جەكە تۇرعىن ءۇي قورىندا تۇرعىن ءۇيدى جالعا العانى ءۇشىن تۇرعىن ءۇي تولەمدەرىنىڭ تەتىگى ازىرلەندى، ءتيىستى قاعيدالار دايىندالىپ، وتباسى بانكى بازاسىندا تسيفرلى پلاتفورما ىسكە قوسىلدى. بۇگىندە 25 مىڭنان استام ءوتىنىم قابىلدانىپ، ولاردىڭ 6 مىڭعا جۋىعى ماقۇلداندى.

اتاۋلى كومەك قاعيداتى ازاماتتاردىڭ ورتاق جاۋاپكەرشىلىگىنە نەگىزدەلگەن. وسى بويىنشا تۇرعىنجايلارىنىڭ 50%-ى مەملەكەتتىك سۋبسيديالار ەسەبىنەن جابىلادى، قالعان 50%-ىن الۋشى ءوز بەتىنشە تولەيدى. جالداۋ تولەم مولشەرىنىڭ 50%-ىن وتەۋ رەسپۋبليكالىق بيۋدجەتتەن 80% جانە جەرگىلىكتى بيۋدجەتتەن 20% پروپورتسياسى بويىنشا جابىلادى. وسىعان وراي رەسپۋبليكالىق بيۋدجەتتە 40 ملرد تەڭگە مولشەرىندە قاجەتتى قارجىلاندىرۋ كولەمى كوزدەلگەن. وتباسى بانكىنە قار­جىلاندىرۋ جوسپارىنا سايكەس 3 ملرد تەڭگە اۋدارىلدى. وڭىرلەردەگى ءماسليحاتتار قاجەتتى 10 ملرد تەڭگەنىڭ جەرگىلىكتى بيۋدجەت شىعىستارى ەسەبىنەن 3،7 ملرد تەڭگەنى بەكىتتى.

ودان بولەك، مەملەكەت باسشىسىنىڭ تاپسىرماسى اياسىندا تۇرعىن ءۇي ساياساتىن رەفورمالاۋ ماسەلەلەرى بويىنشا زاڭ جوباسى ازىرلەندى، اتالعان زاڭ جوباسى بۇگىنگى تاڭدا پارلامەنت ءماجىلىسىنىڭ قاراۋىندا جاتىر. ونىڭ اياسىندا تۇرعىن ءۇي ساياساتىن تۇتاستاي رەفورمالاۋ جانە ونى ەكىنشى دەڭگەيدەگى بانكتەر جۇيەسىنەن شىعارا وتىرىپ، وتباسى بانكىن ۇلتتىق دامۋ ينس­تيتۋتى ەتىپ قايتا قۇرۋ ۇسىنىلادى.

سونداي-اق وتباسى بانكىنىڭ بازاسىندا «تۇرعىن ۇيمەن قامتاماسىز ەتۋ ورتالىعىن» قۇرۋ جوسپارلانىپ وتىر، ول ساناتىنا قاراماستان رەسپۋبليكا اۋماعىندا تۇرعىن ءۇيى جوق بارلىق ازاماتتى ورتالىقتاندىرىلعان تۇردە ەسەپكە الۋدى جۇزەگە اسىرادى. ۇسىنىلىپ وتىرعان جاڭا مودەلدە تۇرعىن ءۇي جاعدايلارىن جاقسارتۋ جونىندەگى مەملەكەتتىك قولداۋ شارالارى ەسەپكە قويۋ كۇنىنە، تابىستىڭ بولۋىنا جانە بەرىلگەن وتىنىمگە بايلانىستى جۇزەگە اسىرىلماق. «بۇل جاڭاشىلدىقتار حالىقتى تۇرعىن ۇيمەن قامتاماسىز ەتۋدىڭ تيىمدىلىگىن ارتتىرۋعا، ازاماتتاردىڭ تۇرعىن ءۇي الۋ ءراسىمىن وڭتايلاندىرۋعا، سونداي-اق ازاماتتاردىڭ بارلىق ساناتى اراسىندا تۇرعىن ءۇيدى ءادىل ءبولۋدىڭ بىرىڭعاي تەتىگىن ەنگىزۋگە مۇمكىندىك بەرەدى»، دەدى يدم باسشىسى.

«قالالاردى كەشەندى سالۋ ستاندارتى» ادىستەمەلىك قۇجاتىنىڭ جوباسىن يندۋستريا جانە ينفراقۇرىلىمدىق دامۋ مينيسترلىگى مەن عىلىمي ساراپشىلار ازىرلەپ، بەكىتتى. اتالعان جوبا قۇرىلىستى جوسپارلاۋ كەزىندە جاياۋ جۇرگىنشىلەر مەن ۆەلوسيپەد ينفراقۇرىلىمىن دامىتۋدى ەسكەرە وتىرىپ، تارتىمدى جانە جايلى قوعامدىق كەڭىستىكتەردى قالىپتاستىرۋعا تولىق مۇمكىندىك بەرەدى.

كوپتەگەن شاعىمعا بايلانىستى مينيسترلىك زاڭناماعا مىناداي بىرقاتار تۇزەتۋ ازىرلەدى: اۋماقتا قۇرىلىس سالۋدى ساپاسىز جوسپارلاۋدى بولدىرماۋ ماقساتىندا قالا قۇرىلىسى ساراپتاماسىن ەنگىزۋ; قۇرىلىستىڭ بارلىق كەزەڭىندە وبەكتىگە جوسپارلى باقىلاۋ جۇرگىزۋ جانە مەملەكەتتىك ساۋلەت-قۇرىلىس باقىلاۋ باسقارماسىنىڭ نىسانداردى پايدالانۋعا قابىلداۋعا قاتىسۋى; پايدالانىلاتىن ماتەريالدار مەن ورىندالعان جۇمىستاردىڭ ساپاسىنا زەرتحانالىق جانە تەحنيكالىق تەكسەرىس جۇرگىزۋ ءۇشىن تاۋەلسىز مەملەكەتتىك زەرتحانالىق قىزمەتتى قۇرۋ.

«بايتەرەك» ۇبح» اق باسقارما توراعاسى قانات شارلاپاەۆتىڭ ايتۋىنشا، بيىلعى 6 ايدا حولدينگ تۇرعىن ءۇي قۇرىلىسى سالاسىندا مىناداي ناتيجەلەرگە قول جەتكىزدى:

وبليگاتسيالاردى ساتىپ الۋ مەحانيزمى ارقىلى نەسيەلىك تۇرعىن ءۇي سالۋ باعىتى بويىنشا اكىمدىكتەر جالپى سوماسى 126،4 ملرد تەڭگە قاراجات ۇسىندى. بۇعان قوسا، وسى جىلدىڭ سوڭىنا دەيىن 162،2 ملرد تەڭگەگە جەرگىلىكتى اتقارۋشى ورگانداردىڭ وبليگاتسيالارى ساتىپ الىنباق.

تۇرعىن ءۇي قۇرىلىس جيناق جۇيەسى بويىنشا 2022 جىلدىڭ ءبىرىنشى جارتىجىلدىعىندا حالىققا جالپى سوماسى 649،7 ملرد تەڭگەگە جەڭىلدىكپەن 38،9 مىڭ قارىز بەرىلدى. وتباسى بانكى جۇيەسىندە 1،89 ترلن تەڭگەگە 2،39 ملن كەلىسىمشارت جاسالعان.

ۇلەستىك تۇرعىن ءۇي قۇرىلىسى باعىتى بويىنشا 589 مىڭ شارشى مەتر تۇرعىن ءۇي، جالپى سوماسى 97 ملرد تەڭگەگە 15 جوبا كەپىلدەندىرىلدى. بۇل 7 مىڭ ازاماتتىڭ سالىمدارىن قورعاۋعا مۇمكىندىك بەردى.

جەكە قۇرىلىس سالۋشىلاردىڭ كرەديتتەرىن سۋبسيديالاۋ باعىتى بو­يىنشا جالپى سوماسى 3،5 ملرد تەڭگەگە 170 مىڭ شارشى مەتر تۇرعىن ءۇي جوباسى ماقۇلداندى. «مەملەكەت باسشىسىنىڭ تاپسىرماسى بويىنشا جەكە تۇرعىن ءۇي قورىنىڭ جالداۋ اقىسىن سۋبسيديالاۋ تەتىگى ىسكە اسىرىلۋدا. بۇگىندە وتباسى بانك 6 مىڭنان استام ءوتىنىمدى ماقۇلدادى»، دەدى ق.شارلاپاەۆ.

ءوتىنىم بەرۋ پروتسەسى اۆتوماتتان­دىرىلعان، otbasybank.kz پلاتفورماسىندا باعدارلاما تالاپتارىنا سايكەس كەلەتىن كەز كەلگەن قازاقستاندىق ەتسق ارقىلى سۋبسيديالاۋعا ءوتىنىم بەرە الادى. «قازىر قارالىپ جاتقان وزگەرىستەر الەۋمەتتىك تولەمدەر مەن جاردەماقىلارعا قاتىستى. ولار جالاقى، جەكە كاسىپكەرلىكتەن تۇسەتىن كىرىس جانە اقىلى قىزمەت كورسەتۋ تۋرالى شارت بويىنشا كىرىسپەن قاتار تابىس رەتىندە ەسەپتەلىپ وتىر. ءدال وسى سەبەپپەن باعدارلامانىڭ 1 مىڭنان استام قاتىسۋشىسىنىڭ ءوتىنىشى قابىلدانبادى»، دەدى «بايتەرەك» حولدينگىنىڭ باسشىسى.

وسىعان بايلانىستى بۇگىنگى تاڭدا ءتيىستى قۇقىقتىق اكتىلەرگە الەۋمەتتىك تولەمدەر مەن جاردەماقىلاردى تابىس ساناتىنان الىپ تاستاۋ بويىنشا وزگەرىستەر ەنگىزۋ ماسەلەسى پىسىقتالۋ ۇستىندە. بۇل بۇرىن وسى سەبەپپەن وتىنىشتەرى قابىلدانباعان ازاماتتارعا قايتادان ءوتىنىم بەرىپ، سۋبسيديا الۋىنا مۇمكىندىك بەرەدى.

وسى باعدارلامانى ىسكە اسىرۋ اياسىندا قاراجاتتى ۋاقتىلى اۋدارۋ ماقساتىندا جەرگىلىكتى اتقارۋشى ورگاندارمەن جۇمىس جۇرگىزىلىپ جاتىر. قازىرگى ۋاقىتتا قوستاناي وبلىسىنان قاراجات كەلىپ ءتۇستى، بەس وڭىردە (نۇر-سۇلتان ق.، الماتى، اتىراۋ، شىعىس قازاقستان، پاۆلودار وبلىستارى) كەلىسىمدەرگە قول قويىلدى، سەگىز وڭىردە (الماتى جانە شىمكەنت قالالارى، اقمولا، اقتوبە، جامبىل، سولتۇستىك قازاقستان، تۇركىستان، قىزىلوردا وبلىستارى) قاراجاتتى اۋدارۋ جونىندەگى شارتقا قول قويىلۋدا، باتىس قازاقستان، قاراعاندى جانە ماڭعىستاۋ وبلىستارىندا ءماسليحات سەسسياسى وتپەگەن.

سونىمەن قاتار وتباسى بانك مەم­لەكەتتىك تۇرعىن ءۇي قورىنان تۇرعىن ءۇي الۋعا كەزەكتە تۇرعانداردىڭ ءتىزىمىن جۇرگىزۋ ماقساتىندا ء«بىرىنشى تۇرعىن ۇي­مەن قامتاماسىز ەتۋ ورتالىعى» ەلەكتروندى بازاسى اقپاراتتىق جۇيەسىن ازىرلەۋدە.

كەزەكتەگىلەرگە تۇرعىن ءۇيدى ءبولۋ ءبىر ورتالىقتان جۇرگىزىلەدى

ماسەلەنى قورىتىندىلاعان ۇكىمەت باسشىسى ءاليحان سمايىلوۆ بيىل 15 ملن شارشى مەتر تۇرعىن ءۇيدى پايدالانۋعا بەرۋ جوسپارلانعانىن، بۇل 138 مىڭ وتباسىعا تۇرعىن ءۇي جاعدايىن جاقسارتۋعا مۇمكىندىك بەرەتىنىن اتاپ ءوتتى. وتكەن بەس ايدا 4،7 ملن شارشى مەتر تۇرعىن ءۇي (وتكەن جىلمەن سالىستىرعاندا 103،4%) پايدالانۋعا بەرىلدى.

«مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ءبىز تۇرعىن ءۇي ساياساتىنىڭ جاڭا تاسىلدەرىن ازىرلەدىك. ول، ءبىرىنشى كەزەكتە، ازاماتتار ءۇشىن تۇرعىن ءۇيدىڭ قولجەتىمدى بولۋىن قامتاماسىز ەتۋگە، سونداي-اق ولاردىڭ تۇرمىس جاعدايىن جاقسارتۋعا باعىتتالىپ وتىر. ەندى باسپانا كەزەگىندە تۇرعاندار ءۇشىن تۇرعىن ءۇيدى ءبولۋ ء«بىر تەرەزە» قاعيداتى بويىنشا ءبىر ورتالىقتان، اشىق تۇردە جۇرگىزىلەتىن بولادى. ونىڭ نەگىزگى وپەراتورى – وتباسى بانكى»، دەدى ءا.سمايىلوۆ.

سونىمەن قاتار پرەمەر-مينيستر ازاماتتاردى تۇرعىن ۇيمەن قامتاماسىز ەتۋدىڭ جاڭا مەحانيزمدەرى تۋرالى مالىمدەدى. وندا ارەندالىق تولەمدى سۋبسيديالاۋ جانە اۋىلدىق جەرلەردە تۇرعىن ءۇي سالۋ سياقتى قولداۋ شارالارى بار. بيىل جاڭا مەحانيزمدەر ەسەبىنەن 70 مىڭ ازاماتقا ءۇيدى جالعا الۋ ءۇشىن سۋبسيديا بەرۋ جانە اۋىلدىق جەرلەردە 2،8 مىڭعا جۋىق ادامدى جاڭا باسپانامەن قامتاماسىز ەتۋ جوس­پارلانىپ وتىر.

جالپى، ءاليحان سمايىلوۆتىڭ ايتۋىنشا، تۇرعىن ءۇي سالاسىنداعى تاسىلدەردى توپتاستىرىپ، ءبىر رەتكە كەلتىرۋ ءۇشىن تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2026 جىلعا دەيىنگى تۇجىرىمداماسىن قابىلداۋ جۇمىستارى باستالىپ كەتتى.

ءسوزىن اياقتاي كەلە، پرەمەر-مينيستر يندۋستريا جانە ينفراقۇرىلىمدىق دامۋ مينيسترلىگى مەن مۇددەلى مەملەكەتتىك ورگاندارعا تۇرعىن ءۇي ساياساتىنداعى جاڭا تاسىلدەر بويىنشا زاڭ جوباسىنىڭ بارلىق ەرەجەسىن پارلامەنتپەن ساپالى ءارى جەدەل پىسىقتاۋ; قاجەتتى دەرەكقورلارمەن تولىققاندى ينتەگراتسيالاپ، تۇرعىن ءۇي سالاسىندا بارلىق اقپاراتتىق جۇيەلەردى ىسكە قوسۋ جۇمىستارىن اياقتاۋ; باسپاناعا مۇقتاج ادامداردى تۇرعىن ۇيمەن قامتاماسىز ەتۋ ماقساتىندا تۇرعىن ءۇي جانە ينجەنەرلىك ينفراقۇرىلىمنىڭ جوسپارلانعان كولەمىن ۋاقتىلى ىسكە قوسۋ ءۇشىن شارالار قابىلداۋ جونىندە ناقتى تاپسىرمالار بەردى.

قولايلى ورتا قالىپتاستىرۋدىڭ ۇلتتىق بىرىڭعاي ستاندارتى

ۇكىمەت وتىرىسىندا مۇگەدەكتىگى بار ادامداردىڭ تۇرمىس ساپاسىن جاق­سارتۋ بويىنشا قابىلدانىپ جاتقان شارا­لار قارالدى. بۇل ماسەلە تۋرالى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا، دەنساۋ­لىق ساقتاۋ ءمينيسترى اجار عينيات، ين­دۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ، نۇر-سۇلتان قالاسىنىڭ اكىمى التاي كولگىنوۆ پەن اقمولا وبلىسىنىڭ اكىمى ەرمەك مارجىقپاەۆ باياندادى.

پرەمەر-مينيستر مۇگەدەكتەرگە مەملەكەت تاراپىنان ۇنەمى قولداۋ كورسە­تىلەتىنىن اتاپ ءوتتى. ءتيىستى زاڭنامالىق تۇزەتۋلەر قابىلدانىپ، مۇگەدەكتىگى بار ادامدار مەن ولاردىڭ وتباسىلارىنىڭ تابىسىن ارتتىرۋ، ءومىر ساپاسىن جاق­سار­تۋ باعىتىندا اۋقىمدى جۇمىستار اتقارىلدى.

«مەملەكەت باسشىسى مۇگەدەكتىكتى بەلگىلەۋ ءراسىمىن جەڭىلدەتۋدى تاپسىردى. بيىلعى جىل باسىنان بەرى مۇگەدەكتىكتى سىرتتاي بەلگىلەۋدىڭ قاناتقاقتى جوباسى بۇكىل رەسپۋبليكا بويىنشا كەڭەيتىلدى»، دەدى پرەمەر-مينيستر.

سونىمەن قاتار الەۋمەتتىك قىزمەتتەر پورتالى ارقىلى تەحنيكالىق قۇرالدار مەن ەمدىك-ساۋىقتىرۋ قىز­مەت­تەرىن الۋ مەرزىمى 8 ايدان 30 كۇنگە دەيىن قىسقاردى.

بيىل جىلدىڭ سوڭىنا دەيىن 17 ەرتە وڭالتۋ-ارالاسۋ ورتالىعى اشىلادى. ولار جاڭا تۋعان نارەستەلەردەگى پاتولوگيانى دەر كەزىندە انىقتاۋعا جانە ەمدەۋدى قامتاماسىز ەتۋگە مۇمكىندىك بەرەدى.

سونىمەن قاتار وڭىرلەردە مۇگەدەكتىگى بار ادامدارعا ارنالعان 12 ساۋىقتىرۋ ورتالىعىن سالۋ جۇمىستارى جۇرۋدە. بۇل الەۋمەتتىك قورعاۋ جۇيەسىندە قوسىمشا 25 مىڭ ادامدى ەمدىك-ساۋىقتىرۋ شارالارىمەن قامتۋعا مۇمكىندىك بەرەدى.

ءاليحان سمايىلوۆ بىرقاتار تاپسىرما بەرىپ، مۇمكىندىگى شەكتەۋلى ادامداردى قولداۋدىڭ كەشەندى شارالارىن ىسكە اسىرۋدى جالعاستىرۋ قاجەت ەكەن اتاپ ءوتتى.

ءبىرىنشى. ەڭبەكمينى دەنساۋلىق ساقتاۋ جانە تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىكتەرىمەن بىرگە سىرتتاي كۋالاندىرۋدى ەنگىزۋ ءۇشىن اقپاراتتىق جۇيەلەردى ينتەگراتسيالاۋ جانە الەۋمەتتىك قىزمەتتەر پورتالىن جەتىلدىرۋ جۇمىستارىن جالعاستىرۋى كەرەك.

ەكىنشى. ءوڭىر اكىمدىكتەرى جىل سوڭىنا دەيىن مۇقتاج ادامداردى تەحنيكالىق قۇرالدارمەن جانە ساۋىقتىرۋ قىزمەت­تەرىمەن قامتۋ كورسەتكىشىن 90%-عا جانە 2023 جىلدىڭ سوڭىنا قاراي 100%-عا جەت­كىزۋى كەرەك. «مۇگەدەكتىگى بار ادامداردى كۇندىز قابىلدايتىن بولىمشەلەر جەلىسىن كەڭەيتىپ، الەۋمەتتىك قىزمەت كورسەتەتىن شاعىن ۇيلەر قۇرۋ قاجەت»، دەپ اتاپ ءوتتى ءا.سمايىلوۆ اتالعان ماسەلەگە توقتالا كەلە.

ءۇشىنشى. دەنساۋلىق ساقتاۋ مينيسترلىگى اكىمدىكتەرمەن بىرگە ناۋقاستاردى ەرتەرەك دياگنوستيكالاۋعا جانە مۇگەدەكتىكتىڭ الدىن الۋ ءۇشىن ەرتە وڭالتۋعا ەرەكشە نازار اۋدارۋى كەرەك.

پرەمەر-مينيستر بارلىق مۇددەلى مەملەكەتتىك ورگاندارعا اكىمدىكتەرمەن بىرلەسىپ، مۇگەدەكتىگى بار ادامدار ءۇشىن بەيىمدەۋ جانە قولجەتىمدى ورتانى قالىپتاستىرۋدىڭ ۇلتتىق بىرىڭعاي ستاندارتىن ازىرلەۋدى تاپسىردى. وسىعان وراي پرەمەر-مينيستر ۇكىمەتتىڭ مىندەتى – مۇگەدەكتىگى بار ادامدار ءۇشىن ءومىر سۇرۋگە قولايلى ورتا قالىپتاستىرۋ ەكەنىن، سوندىقتان ولاردىڭ تۇرمىس ساپاسىن جاقسارتۋ ماسەلەلەرى مينيسترلەر مەن اكىمدەردىڭ ۇدايى باقىلاۋىندا بولۋعا ءتيىس ەكەنىن اتاپ كورسەتتى.

سوڭعى جاڭالىقتار

اباي مۇراسى اسقاقتادى

اباي • بۇگىن، 00:04

ۇلتتىق مەرەكە

اباي • بۇگىن، 00:02

ەت ماسەلەسىنە ەپ كەرەك

ەكونوميكا • بۇگىن، 00:01

ۇلت ۇستازى جانە باتپاقتى مەكتەبى

احمەت بايتۇرسىن ۇلى • كەشە

جاۋىنگەر جىر

تانىم • كەشە

تالانت پەن تاعدىر

ونەر • كەشە

شيپالى سۋلار شەجىرەسى

ايماقتار • كەشە

تاڭبالى تانىمى

تانىم • كەشە

تسيرك

ونەر • كەشە

ۇقساس جاڭالىقتار