قازاقتىڭ ابايى, ورىستىڭ پۋشكينى, نەمىستىڭ گەتەسى قايدا قالدى دەمەي مە؟ ودان يمانبەكتىڭ دە, الگىندەي كوزقاراستاعى ادامداردىڭ دا ەشتەڭەسى كەتپەيدى. ماسەلە قازىرگى ونەر مەن مادەنيەتكە دەگەن كوزقاراستىڭ وزگەرگەندىگىندە شىعار.
ءبىز مىناداي عاجاپ سايكەستىكتىڭ ۇستىنەن تۇستىك. انشىلىگىنە الەم جۇرتشىلىعى تاڭىرقاعان ءبىزدىڭ ديماش قۇدايبەرگەندى دە, زامانىندا جەر-جاھانعا داڭقى جايىلعان مايكل دجەكسوندى دا تانىستىرىپ جاتپايمىز وقىرمانعا. الايدا ەكەۋىن جاقىنداستىراتىن دۇنيە از ەمەس ەكەن. ديماش مايكل دجەكسونعا ەلىكتەيدى دەسەك ارتىق بولار, بىراق ساحنا پەرىسىن اسا قۇرمەتتەپ, ونەرىن جوعارى باعالايتىنى انىق. ءتىپتى ديماش مايكلدىڭ ونەرىنە ارتىق قارايتىنىن سۇحباتتارىندا دا جاسىرماي ايتىپ جۇرەدى. «مەن مايكل دجەكسوننىڭ, دجەكي چاننىڭ, لۋچانو ءپاۆاروتتيدىڭ جانكۇيەرىمىن. ولاردىڭ بارلىعى تاباندىلىق پەن ماڭداي تەردىڭ ارقاسىندا تابىسقا جەتكەن. بارىنەن دە ماڭىزدىسى, ولار الەمدىك دەڭگەيدەگى جۇلدىزدار بولسا دا, ەرەكشە كىشىپەيىل, باۋىرمال جاندار. سوندىقتان مەن ولاردى ۇلگى تۇتامىن», دەگەن ءبىر سۇحباتىندا.
سونداي-اق العاشقى جەكە كونتسەرتىندە ديماش قۇدايبەرگەن ساحنا پاتشاسى مايكل دجەكسونعا قۇرمەت كورسەتتى. ول مايكل دجەكسوننىڭ Billie jean, Dangerous ءانىن ايتىپ, اتاقتى «اي ءجۇرىسىن» بەينەلەگەنى دە تىڭدارماندارىنىڭ ەسىندە شىعار. ال مىنا سايكەستىككە تاپ بولعاندا, وسىنىڭ ءبارى جاي بولىپ قالعانىن نەگە جاسىرايىق؟
بۇل دەرەكتى كاليفورنيا شتاتىنىڭ (اقش) سەكسەنگە اياق باسقان سيلۆيا ساندوۆال اتتى تۇرعىنى ءوز اۋزىنان اڭگىمەلەگەنى بەينەتاسپادا ءجۇر. سيلۆيا جاس كەزىندە مەدبيكە بولىپ جۇمىس ىستەگەن. ءارى جاس كۇنىنەن مايكل دجەكسوننىڭ ونەرى دەسە ىشكەن اسىن جەرگە قوياتىن تىڭدارمانى ەكەن. سوندىقتان بولار, الدە باسقا, ول ءبىراز ۋاقىت ساحنا جۇلدىزىنىڭ ۇيىندە تۇرىپتى. سوندا مايكل الدەبىر كونتسەرتىنەن كەيىن وعان ءوزىنىڭ سۋرەتى سالىنعان پلاكاتقا قولتاڭباسى مەن داتاسىن قاتار جازىپ, سىيعا تارتادى. سونىمەن ءومىر جالعاسا بەرەدى. مايكل دۇنيە سالعاندا بۇل كىسى دە ءبىر ادامداي قايعىرادى. ارادا 24 جىل ۋاقىت وتكەندە تەلەديداردان ديماشتىڭ داۋىسىن ەستيدى عوي ءبىزدىڭ كەيىپكەر. قايران قالادى. ء«ان سالعانداعى داۋىسى بىلاي تۇرسىن, اسىقپاي, باپپەن سويلەگەنى دە مايكلعا كەلەدى», دەيدى سيلۆيا. ەسىنە كەزىندە مايكل سىيعا تارتقان پلاكات تۇسەدى.
ءبىر كۇنى كاليفورنيادا دوستارىمەن دەمالىپ جۇرگەن سيلۆيا تۋ سىرتىنان ديماشتى كورىپ قالىپ, دوستارىنان ونى توقتاتۋىن سۇراپ, تىلدەسەدى. «قۇرمەتتى ديماش, مەندە وسىدان 24 جىل بۇرىن ماعان مايكل دجەكسون سىيعا تارتقان پلاكات بار قولتاڭباسىمەن. سونى ساعان كەتەرىڭدە اۋەجايعا جەتكىزىپ بەرسەم قالاي قارايسىڭ؟» دەسە, ءبىزدىڭ ديماش: «جوق, ونى مەن قازىر العىم كەلەدى», دەپتى.
ديماش پەن سيلۆيا ەرتەسىنە جولىعىسىپ, جادىگەر يەسىن تابادى. مۇنداعى ەڭ عاجابى – پلاكاتتاعى ءانشىنىڭ سۋرەتى مەن قولتاڭباسى ەمەس, ونى سىيعا تارتقان كۇن, اي, جىل – ديماشتىڭ تۋعان كۇنى بولىپ شىعادى (24.05.1994). جانە مايكل سيلۆياعا: ء«بىر كۇندەرى بۇل پلاكاتتى بىرەۋگە بەرگىڭ كەلسە, مەنى قۇرمەت تۇتاتىن جانعا سىيلارسىڭ», دەسە كەرەك.
باسقا قۇرلىقتىڭ وكىلى, ارانى الىپ مۇحيت ءبولىپ جاتسا دا ونەردەن ۇشقىن اتقان رۋحاني بايلانىسقا ەشتەڭە بوگەت بولا المايدى ەكەن عوي. مايكل پلاكاتقا قولتاڭبا قالدىرىپ جاتقاندا وزىنەن كەيىن تاڭعاجايىپ الەمدىك ءانشى دۇنيەگە كەلىپ جاتقانىن سەزبەسە دە, ءبىر دۇنيە بەلگىسىنە جارار دەگەن سەنىم بولعان شىعار. «قۇدايسىز قۋراي سىنبايدى» دەيدى قازاق.
ايتپاقشى, مايكل بۇل پلاكاتتى رامكادان شىعارىپ جاتقاندا بايقاماي شەتىن جىرتىپ الىپتى. «شەت جاعىندا ەپتەگەن جىرتىلعان تۇسىن جاماپ بەرەيىن», دەپتى ديماشقا سيلۆيا بەرەردە.
ديماش «جوق, بۇل ماعان مايكلدىڭ قولى جىرتقانىمەن قۇندى», دەپ جاۋاپ قاتقان ەكەن.
ء«سىز بۇل پلاكاتتى قالاي ساتىپ جىبەرمەگەنسىز؟» دەپ قايران قالىپتى ديماش.
«قازىر دە ساتىپ جىبەرسەم كەش ەمەس, قالدىرىپ كەتەسىڭ بە؟» دەپتى.
ارينە ديماش وعان كەلىسپەگەن. مۇنداي زاتتاردىڭ باعاسى كۇن وتكەن سايىن ارتاتىنى انىق قوي. بالكىم ونەر جارمەڭكەسىندە اۋكتسيونعا قويىلار ما ەدى؟ باستىسى شيرەك عاسىردان سوڭ جادىگەر يەسىن تاۋىپ تۇر. دەمەك بۇل تەگىن بولماعانى.
