باتىس قازاقستان وبلىسىنىڭ بارلىق اۋدانى مەن قالا ورتالىعىندا مادەني-كوپشىلىك شارالار, كونتسەرتتىك باعدارلامالار, كورمەلەر, سپورتتىق شارالار ۇيىمداستىرىلماق.
اتاپ ايتقاندا تەرەكتى اۋدانىندا «تۋعان كۇنىڭمەن, ەلوردا!», سىرىم اۋدانىندا «ەڭسەسى بيىك ەلوردا – تاتۋلىق بەسىگى» اتتى كونتسەرتتەر, «جاينا, جاسا ەلوردام» اتتى جاستارعا ارنالعان شوۋ-باعدارلاما, قازتالوۆ اۋدانى ورتالىعىنداعى «دوستىق» ساياباعىندا «جاساي بەر, جاينا, استانا» مەرەكەلىك كونتسەرتى, جاڭاقالا اۋدانىندا «ەڭسەسى بيىك ەلوردا», تاسقالا اۋدانىندا «باعانالى وردا – باستى وردا», شىڭعىرلاۋ اۋدانىندا «سالەم, ەلوردا», بوكەي ورداسىندا «نۇر-سۇلتان – ۇلتىمىزدىڭ رۋحاني ورداسى», ءبورلى اۋدانىندا «ەڭسەسى بيىك ەلوردا», قاراتوبە اۋدانىندا «ەل جۇرەگى – نۇر-سۇلتان» اتتى مەرەكەلىك كونتسەرتتەر وتەدى. ءبورلى اۋدانىنىڭ قارتتار ۇيىندە «مەيىرىم ساۋلەسى» اتتى مەرەكەلىك كونتسەرت ءوتىپ, وبلىس كىتاپحانالارى مەن مۋزەيلەرىندە تاقىرىپتىق كورمەلەر, بالالارعا ارنالعان ەرتەڭگىلىكتەر, ادەبي-تانىمدىق ساعاتتار, ۆيكتورينالىق ويىندار ۇيىمداستىرىلماق. ورال قالاسىنىڭ ىقشام اۋداندارىندا, مادەني-اعارتۋ بىرلەستىگىنىڭ اۋلا كلۋبتارىندا «ەلوردام – ارۋ قالام اسقاقتاعان», «اسقاقتا ايبىندى ەلدىڭ ەلورداسى» اتتى كونتسەرتتىك باعدارلاما, سپورتتىق شارالار كورەرمەنىن كۇتۋدە.
استانا كۇنىنە وراي ەڭ باستى ءىس-شارا 6 شىلدە كۇنى كەشتە «ەل جۇرەگى – ەلوردا» اتاۋىمەن تۇڭعىش پرەزيدەنتى الاڭىندا وتەدى. الاڭدا قولونەر شەبەرلەرىنىڭ كورمەسى بولادى. ال كونتسەرتتىك باعدارلامادا قارلىعاش قادىربەكوۆا بي ستۋدياسى, «نازەركە» حالىق بي ءانسامبلى, «سەرىلەر» كۆارتەتى, ونەرپاز بالالاردىڭ «اۋەن» توبى, «قاراقات», «اينالايىن» مەكتەپ-ستۋديالارى, «دد رەكوردس» ورتالىعىنىڭ انشىلەرى ونەر كورسەتپەك.
