«بۇگىندە مەملەكەت باسشىسىنىڭ تاپسىرماسىمەن تۇرعىن ءۇي ساياساتىن رەفورمالاۋ ماسەلەلەرى بويىنشا قر زاڭىنىڭ جوباسى ازىرلەندى, ول قر پارلامەنتى ءماجىلىسىنىڭ قاراۋىندا جاتىر. زاڭ جوباسى شەڭبەرىندە تۇرعىن ءۇي ساياساتىن تۇتاستاي رەفورمالاۋ جانە ونى ەكىنشى دەڭگەيدەگى بانكتەر جۇيەسىنەن شىعارا وتىرىپ, «وتباسى بانكىن» ۇلتتىق دامۋ ينستيتۋتى ەتىپ قايتا قۇرۋ ۇسىنىلادى. سونداي-اق «وتباسى بانكى» بازاسىندا «تۇرعىن ۇيمەن قامتاماسىز ەتۋ ورتالىعىن» قۇرۋ جوسپارلانۋدا, ول ساناتتارعا تيەسىلىگىنە قاراماستان, رەسپۋبليكا اۋماعىندا تۇرعىن ءۇيى جوق ازاماتتاردى ەسەپكە الۋدى جۇزەگە اسىرادى», دەدى قايىربەك وسكەنباەۆ.
ونىڭ ايتۋىنشا, ۇسىنىلىپ وتىرعان جاڭا مودەلدە تۇرعىن ءۇي جاعدايلارىن جاقسارتۋ بويىنشا مەملەكەتتىك قولداۋ شارالارى ەسەپكە قويۋ كۇنىنە, تابىستىڭ بولۋىنا جانە بەرىلگەن وتىنىمگە بايلانىستى جۇزەگە اسىرىلادى.
«تۇتاستاي العاندا, بۇل جاڭاشىلدىقتار حالىقتى تۇرعىن ۇيمەن قامتاماسىز ەتۋدىڭ تيىمدىلىگىن ارتتىرۋعا, ازاماتتاردىڭ تۇرعىن ءۇي الۋ ءراسىمىن وڭتايلاندىرۋعا, سونداي-اق ازاماتتاردىڭ بارلىق ساناتتارى اراسىندا تۇرعىن ءۇيدى ءادىل ءبولۋدىڭ بىرىڭعاي تەتىگىن ەنگىزۋگە مۇمكىندىك بەرەدى», دەدى مينيستر.
قر يدم مالىمەتتەرى بويىنشا, قازىرگى ۋاقىتتا زاڭ جوباسىن تالقىلاۋ بويىنشا جۇمىس توبىنىڭ 8 وتىرىسى ءوتتى, ونىڭ شەڭبەرىندە 258 تۇزەتۋ ۇسىنىلىپ, 155-ءى قابىلداندى.
ۆەدومستۆو باسشىسى اتاپ وتكەندەي, بۇگىندە اكىمدىكتەردە 613 مىڭ ازامات كەزەكتە تۇر, ونىڭ ىشىندە 222 مىڭ ادام - الەۋمەتتىك وسال ساناتتاعى كەزەكتە. سونداي-اق تابىسى ەڭ تومەنگى كۇنكورىس دەڭگەيىنەن تومەن 70 مىڭ ادام - كوپ بالالى وتباسىلار, جەتىم بالالار, 1 جانە 2-توپتاعى مۇگەدەك ادامدار جانە مۇگەدەك بالالارى بار وتباسىلار دا بار.
ول مەملەكەت باسشىسىنىڭ تاپسىرماسى بويىنشا جەكە تۇرعىن ءۇي قورىندا تۇرعىن ءۇيدى جالعا العانى ءۇشىن تۇرعىن ءۇي تولەمدەرىنىڭ تەتىگى ازىرلەنگەنىن, ءتيىستى قاعيدالار مەن «وتباسى بانكى» بازاسىندا تسيفرلىق پلاتفورما ازىرلەنگەنىن ەسكە سالدى.
«بۇگىندە 25 مىڭنان استام ءوتىنىم قابىلدانىپ, ولاردىڭ 6 مىڭعا جۋىعى ماقۇلداندى. رەسپۋبليكالىق بيۋدجەتتە 40 ملرد تەڭگە كولەمىندە قاجەتتى قارجىلاندىرۋ كولەمى قاراستىرىلعان جانە بۇگىنگى كۇنى «وتباسى بانككە» قارجىلاندىرۋ جوسپارىنا سايكەس 3 ملرد تەڭگە اۋدارىلدى. وڭىرلەردەگى ءماسليحاتتار قاجەتتى 10 ملرد تەڭگەنىڭ 3,7 ملرد تەڭگەسىنە جەرگىلىكتى بيۋدجەت شىعىندارىن بەكىتتى. سونىمەن قاتار باتىس قازاقستان وبلىسى بويىنشا وسى كۇنگە دەيىن جەتكىزىلگەن ليميتكە سايكەس تۇرعىن ءۇي تولەمدەرى ءۇشىن جەرگىلىكتى بيۋدجەتتەن قارجىلاندىرۋ قاراستىرىلماعان», دەدى قايىربەك وسكەنباەۆ.
