قوعام • 05 شىلدە، 2022

جاستارعا ارنالعان جارمەڭكە

جاستارعا ارنالعان العاشقى ۇلتتىق جالپىرەسپۋبليكالىق ونلاين ەڭبەك جارمەڭكەسىنە 1،4 مىڭنان استام ادام قاتىستى. جۇمىس بەرۋشىلەر ۇسىنعان بوس جۇمىس ورىندارىنا ورنالاسۋعا نيەت بىلدىرگەن ازاماتتاردىڭ سانى 4 مىڭنان استى.

راۋان قايدار

27-29 ماۋسىم ارالىعىندا وتكەن جارمەڭكەگە قازاقستاندىق 23 ءىرى جۇمىس بەرۋشى قاتىسىپ، enbek.kz پورتالىنا 50-دەن استام ماماندىق بويىنشا 1 320 بوس جۇمىس ورنىن ۇسىندى، ولاردىڭ باسىم بولىگى تەحنيكالىق ماماندىقتارعا جاتادى. ءىس-شاراعا قاتىسقان جۇمىس بەرۋشىلەر اراسىندا ەۋرازيالىق توپقا (ERG) جانە تاۋ-كەن ءوندىرۋشى جانە تاۋ-كەن مەتاللۋرگيا كاسىپورىندارىنىڭ رەسپۋبليكالىق قاۋىمداستىعىنا كىرەتىن كاسىپورىنداردى، Kaspi.kz، «قازاقستان حالىق بانكى» اق، «كاتكو» بك جشس، «Ernst & Young Kazakhstan» جشس، «Eurasia Group Kazakhstan» جشس، «Magnum Cash & Carry» جشس، ء«بىرىنشى نەسيە بيۋروسى» جشس كومپانيالارىن جانە تاعى باسقالارىن اتاپ وتۋگە بولادى.

ايتا كەتۋ كەرەك، قانداي دا ءبىر ارنايى ورتا ءبىلىمى بار جۇمىس ىزدەۋشىلەرگە ۇسىنىلعان جۇمىس ورىندارىنىڭ جارتىسىنان كوبىنە ورنالاسۋعا (782) مۇمكىندىك بەرىلدى. ال 386 بوس جۇمىس ورنىنا تەك جوعارى ءبىلىمى بار ماماندار ۇمىتكەر بولدى. سونىمەن قاتار جۇمىس بەرۋشىلەر مەكتەپ ءبىلىمىن عانا قاجەت ەتەتىن 162 بوس جۇمىس ورنىن ۇسىندى.

«جۇمىس ىزدەۋشىلەر اراسىندا «كادرلىق اكىمشىلىك مامانى»، «تەحنيك-تەحنولوگ (تاعىلىمگەر)»، «كەڭسە مەنەدجەرى»، «تەحنولوگيالىق پروتسەستى باقىلاۋ جونىندەگى زەرتحاناشى» جانە ت.ب. بوس جۇمىس ورىندارى سۇرانىسقا يە بولدى. جارمەڭكە باسىندا ەڭبەك جولىن ەندى باستاعان جاس ماماندارعا ء«تيىمدى جۇمىس ىزدەۋ» تاقىرىبىندا ماستەر-كلاسس وتكىزىلدى. وندا ولارعا تۇيىندەمەنى قالاي دۇرىس جازۋ، جۇمىس بەرۋشىلەرمەن كەزدەسۋ كەزىندە ءوزىن قالاي ۇستاۋ كەرەكتىگى، قانداي ساتتەرگە نازار اۋدارۋ قاجەتتىگى ايتىلدى. ءۇش كۇن ىشىندە ۇيىمداردىڭ HR مەنەدجەرلەرى Youtube پورتالىنداعى تىكەلەي ەفيردە ءوز كومپانيالارىن تانىستىرىپ، جۇمىس شارتتارى، اشىق بوس جۇمىس ورىندارى، جۇمىسقا ورنالاسۋ ەرەكشەلىكتەرى جانە باسقالارى تۋرالى ايتتى. سونداي-اق جۇمىس ىزدەۋشىلەرمەن 110 ونلاين-اڭگىمەلەسۋ ءوتتى»، دەدى ءىس-شارانى ۇيىمداستىرۋشىلار.

ەستەرىڭىزگە سالا كەتەيىك، بۇل ءىس-شارا قازاقستاندا العاش رەت جاس مامانداردى جۇمىسقا ورنالاستىرۋ ماقساتىندا وتكىزىلدى. الداعى ۋاقىتتا حالىقتىڭ ءتۇرلى توپتارى ءۇشىن ونلاين ەڭبەك جارمەڭكەسىن اي سايىن وتكىزۋ جوسپارلانعان.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز