اتالعان جوبانىڭ ىسكە قوسىلۋ راسىمىنە ۇلتتىق بانكتىڭ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ, سول سەكىلدى قازاقستان قارجىگەرلەر قاۋىمداستىعىنىڭ وكىلدەرى قاتىستى. جوبادا ءوز ۇلەسىن يەلەنگەن بانكتەردىڭ قاتارىندا – «ەۋرازيالىق بانك», «حالىق بانكى» جانە Altyn Bank بار. سونداي-اق بۇعان احقو قۇرامىندا تىركەلگەن كريپتوبيرجالار مەن الەمدىك جانە قازاقستاندىق كريپتو-ويىنشىلار تارتىلعان.
كريپتويندۋستريا مەن بلوكچەين تەحنولوگيالارىن دامىتۋ ءىس-شارالارى اياسىندا ارنايى جۇمىس توبى احقو-عى كريپتوبيرجالار مەن ەلىمىزدەگى ەكىنشى دەڭگەيلى بانكتەردىڭ ىنتىماقتاستىعىن كوزدەيتىن ەرەجەلەردى بەكىتكەن ەدى.
تسيفرلىق دامۋ ۆيتسە ءمينيسترى جاسلان ماديەۆتىڭ ايتۋىنشا, قازاقستاننىڭ كريپتوحابقا اينالۋعا مۇمكىندىگى جوعارى.
«ەلىمىزدە وسى باعىتتا ادامي كاپيتال قارقىندى دامىپ كەلەدى. سونىمەن قاتار بلوكچەين تەحنولوگيالارىن بەلسەندى تۇردە ىلگەرىلەتىپ كەلەمىز. قازىر مەملەكەتتىك قىزمەت كورسەتۋ سالاسىندا بلوكچەيندى ەنگىزىپ جاتىرمىز», دەدى ج.ماديەۆ.
بۇل جوبا بيىل قاناتقاقتى رەجىمدە جۇمىس ىستەيدى. وعان احقو-نىڭ قارجىلىق قىزمەتتەردى رەتتەۋ جونىندەگى كوميتەتىنەن تسيفرلى اكتيۆتەر پلاتفورماسىن باسقارۋعا ليتسەنزياسىن العان كريپتوبيرجالار قاتىسا الادى.
قارجىلىق مونيتورينگ اگەنتتىگىنىڭ قارجىلىق مونيتورينگ سۋبەكتىلەرىمەن جۇمىس جۇرگىزۋ جونىندەگى دەپارتامەنتىنىڭ باسشىسى عابيت لەسبەكوۆ ايتقانداي, تسيفرلى جۇيەلەر – ورتالىقسىزداندىرىلعان جانە تىڭ تەحنولوگيالارعا نەگىزدەلگەن. سوندىقتان ولاردىڭ اقشانى جىلىستاتۋدا تاۋەكەلى جوعارى. ال بانك سەكتورى اقشانى جىلىستاتۋمەن كۇرەس باعىتىندا بەلسەندى قاتىسۋشى سانالادى.
«بارلىق كۇدىكتى وپەراتسيا تۋرالى اقپاراتتىڭ 95%-ىن ەكىنشى دەڭگەيلى بانكتەردەن الامىز. ولاردىڭ بۇل ماسەلەدە تەكسەرۋ جۇيەسى ساپالى تۇردە جولعا قويىلعان. تەك تسيفرلى تەحنولوگيالاردىڭ ەرەكشەلىكتەرىن مەڭگەرۋ كەرەك. ءبىزدىڭ بارلىق ستاندارتىمىزدى ساقتاي وتىرا بانكتەرگە وپەراتسيالاردى جۇزەگە اسىرۋعا اسا قيىندىقتار تۋىندامايدى دەپ سانايمىز. وسى جوبا كريپتويندۋستريانى ودان ءارى دامىتىپ, قازاقستاننىڭ ينۆەستيتسيالىق تارتىمدىلىعىن ارتتىرۋ ءۇشىن ۇلكەن سەرپىن بەرەدى دەپ ۇمىتتەنەمىز», دەدى ع.لەسبەكوۆ.
اتالعان جوبانىڭ تاعى ءبىر ارتىقشىلىعى – تسيفرلى اكتيۆتەر ساۋداسىن ۇيىمداستىرۋ. بۇل ءوز كەزەگىندە بولشەك جانە كاسىبي ينۆەستورلاردىڭ قۇقىقتارىن قورعاۋدى قامتاماسىز ەتەدى. وسى جۇمىس تابىستى ىسكە اسىرىلعان جاعدايدا ۇلتتىق زاڭناماعا جانە احقو اكتىلەرىنە وزگەرىستەر ەنگىزىلەدى دەپ كوزدەلىپ وتىر.
احقو قارجى ۇيىمدارىن رەتتەۋ كوميتەتىنىڭ (AFSA) باس ديرەكتورى نۇرحات كوشىموۆتىڭ سوزىنە سۇيەنسەك, كريپتوبيرجالار ىسكە قوسىلعان كەزەڭنەن باستاپ مەملەكەتتىك ورگاندار مەن رەتتەۋشى ۇيىمدار تىعىز بايلانىستا جۇمىس ىستەۋگە كىرىستى. بۇل جوبانىڭ ءساتتى جۇزەگە اساتىندىعىنىڭ بەلگىسى دەيدى.
«بانك سەكتورى كريپتويندۋستريانى ساپالى كومپلاەنس پەن جۇيەلەرمەن قامتاماسىز ەتەدى. بۇل قورعاۋدىڭ قوسىمشا جۇيەسى. كريپتوبيرجالار مەن بانكتەر بارىنشا ءتيىمدى ەكەنىن كورسەتۋى كەرەك. تسيفرلى اكتيۆتەر ەندى قارقىن الا باستاعان باعىت, سوندىقتان ءبىز ارىپتەستەرىمىزبەن ۇنەمى پىكىر الماسىپ, بىرلەسىپ جۇمىس ىستەۋگە ءازىرمىز. ال رەتتەۋگە كەلەر بولساق, نارىقتى ۋىسىمىزدان شىعارىپ الماۋىمىز قاجەت», دەدى ن.كوشىموۆ.
