قوعام • 03 شىلدە، 2022

مۇگەدەكتىگى بار جەتى مىڭنان استام ادام جۇمىسقا ورنالاستى

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا اياسىندا 2،2 مىڭنان استام مۇگەدەكتىگى بار ادام تۇراقتى جۇمىس ورنىنا جانە 5 مىڭنان استام ادام ۋاقىتشا جۇمىسقا ورنالاستىرىلدى.

راۋان قايدار

بۇعان قوسىمشا مۇگەدەكتىگى بار ادامدار ءۇشىن بەلگىلەنگەن جۇمىس ورىندارىنىڭ كۆوتاسى شەڭبەرىندە وسى جىلدىڭ ءى توقسانىندا حالىقتى جۇمىسپەن قامتۋ ورتالىقتارىنىڭ جولداماسى بويىنشا جۇمىس بەرۋشىلەر مۇگەدەكتىگى بار 348 ادامدى جۇمىسقا قابىلدادى.

«سونىمەن قاتار بيىل كورۋ، ەستۋ جانە تىرەك-قيمىل اپپاراتى بۇزىلعان ادامدار ءۇشىن 71 ارنايى جۇمىس ورنىن اشۋ قاراستىرىلعان. جۇمىس بەرۋشىلەردىڭ جابدىقتالۋىنا بايلانىستى شىعىندارىن سۋبسيديالاۋ كوزدەلگەن. سونداي-اق قازاقستان كاسىپوداقتار فەدەراتسياسىمەن بىرلەسىپ، مۇگەدەكتىگى بار ادامداردى «حالىق باقىلاۋشىلارى» رەتىندە تارتۋدى كوزدەيتىن الەۋمەتتىك ماڭىزدى «حالىقتىق باقىلاۋ» جوباسى ىسكە اسىرىلۋدا. بۇگىنگى تاڭدا جوباعا 164 كاسىپورىن جۇمىلدىرىلىپ، 521 قىزمەتكەر جۇمىسقا ورنالاستىرىلدى. جوبا اياسىندا مۇگەدەكتىگى بار ادامدار بەينەباقىلاۋ وپەراتورلارى رەتىندە جۇمىسقا قابىلدانادى، ولار اۋىسىممەن جۇمىس ورىندارىنداعى ەڭبەك قاۋىپسىزدىگى جانە ەڭبەكتى قورعاۋ تالاپتارىنىڭ ساقتالۋىن قاداعالايدى. جوباعا قاتىسۋ ءۇشىن كادرلاردى ىرىكتەۋ كەزىندە مۇگەدەكتىكتى (وندىرىستىك جاراقات، كاسىپتىك اۋرۋ، جالپى اۋرۋ) بەلگىلەۋ سەبەبى بويىنشا كاسىپورىندا جۇمىسىن تاستاپ كەتكەن قىزمەتكەرلەرگە باسىمدىق بەرىلەدى»، دەلىنگەن مينيسترلىك تاراتقان مالىمەتتە.

«حالىق باقىلاۋشىلارى» قازاقستان رەسپۋبليكاسىنىڭ زاڭناماسىنا سايكەس بارلىق ءتيىستى شەگەرىمدەرمەن جانە الەۋمەتتىك پاكەتتەرمەن قامتىلىپ، ەڭبەك شارتى بويىنشا شتاتقا قابىلدانادى.

جوبانى ىسكە اسىرۋ مۇگەدەكتىگى بار ادامدار ءۇشىن جۇمىس ورىندارىنىڭ بەلگىلەنگەن كۆوتاسى اياسىندا حالىقتى جۇمىسپەن قامتۋعا مۇمكىندىك بەرەدى. بۇل ءوز كەزەگىندە ەرەكشە قاجەتتىلىكتەرى بار ادامداردىڭ الەۋمەتتىك بەيىمدەلۋىنە ىقپال ەتەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز