ايماقتار • 01 شىلدە، 2022

قاراعاندىدا عارىش مونيتورينگى بازادا تىركەلمەگەن 11 مىڭ جەر ۋچاسكەسىن تاپتى

28 رەت كورسەتىلدى

تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترىنىڭ ورىنباسارى اسحات ورازبەك قاراعاندى وبلىسىنىڭ حالقىمەن كەزدەسۋ بارىسىندا قولجەتىمدى ينتەرنەت، مەملەكەتتىك قىزمەتتەردى تسيفرلاندىرۋ، عارىشتىق مونيتورينگ جانە يننوۆاتسيالاردى ەنگىزۋ جايلى ايتتى، دەپ حابارلايدى Egemen.kz.

ەڭ الدىمەن ۆيتسە-مينيستر تسيفرلىق شەشىمدەر ەنگىزۋ ارقىلى حالىقتىڭ جاعدايىن جاقسارتۋ ماسەلەسىنە توقتالدى. ونىڭ ايتۋىنشا، مينيسترلىك جۇزەگە اسىرىپ جاتقان جوبالار ادامداردىڭ ءومىر ساپاسىن ارتتىرۋعا باعىتتالعان. بۇل ورايدا كوپتەگەن مەملەكەتتىك قىزمەتتەرگە ەGov پورتالى مەن مGov ءموبيلدى قوسىمشاسى ارقىلى قول جەتكىزۋگە بولادى. سونداي-اق كەڭ قولدانىستاعى 18 قۇجاتتىڭ - جەكە كۋالىك، ۆاكتسينالاۋ پاسپورتى، تۋ تۋرالى كۋالىك جانە تاعى باسقا قۇجاتتىڭ تسيفرلىق نۇسقاسىن پايدالانۋعا بولادى. ونىڭ ۇستىنە، ازاماتتارعا قولايلى جاعداي جاساۋ ماقساتىندا، مەملەكەتتىك قىزمەتتەردى ەكىنشى دەڭگەيلى بانكتەردىڭ قوسىمشاسى ارقىلى الۋ مۇمكىندىگى قاراستىرىلعان. اسحات ورازبەك بىرقاتار مەملەكەتتىك قىزمەتتى حقكو-عا بارماي-اق پرواكتيۆتى تۇردە الۋعا بولاتىنىن اتاپ ءوتتى.

«بۇگىنگى تاڭدا الەۋمەتتىك ماڭىزى بار 23 قىزمەت پرواكتيۆتى نۇسقادا ۇسىنىلادى. مىسالى، بالا تۋعاندا، اتا-اناسىنا سمس-حابارلاما جولدانىپ، ءتيىستى اقپارات سۇراتىلادى دا، تۋ تۋرالى كۋالىك اۆتوماتتى تۇردە رەسىمدەلەدى»، دەدى ۆيتسە-مينيستر.

سونىمەن قاتار قارجىنى ۇنەمدەۋگە جانە سىبايلاس جەمقورلىقتىڭ الدىن الۋعا مۇمكىندىك بەرەتىن بيومەتريا تەحنولوگياسى مەن QR-كود ارقىلى تولەم جاساۋ، جەر قاتىناستارىن تسيفرلاندىرۋ، تسيفرلىق يپوتەكا، «ۆيدەو-حقو» جانە باسقا دا قىزمەتتەر ىسكە قوسىلدى.

اسحات ورازبەكتىڭ ايتۋىنشا، مينيسترلىكتىڭ ماقساتى – مەملەكەتتىك قىزمەت كورسەتۋ پروتسەسىندەگى ادامي فاكتوردى الىپ تاستاۋ. بۇل رەتتە جەكە كۋالىكتى ميگراتسيا قىزمەتىنە جۇگىنبەي-اق، 5-10 مينۋتتا الۋ جانە قايتا جاساتۋ ءۇشىن «قۇجاتتاندىرۋ تەرمينالىن» ەنگىزۋ جوسپارلانعان.

كەزدەسۋدە بايلانىس جانە ينتەرنەت ماسەلەسى دە قوزعالدى. قر ءتسدياوم حابارلاۋىنشا، قازىر قاراعاندى وبلىسى حالقىنىڭ 99 پايىزى ينتەرنەتپەن قامتىلعان. قالعان 1 پايىزىنا ينتەرنەت كەڭ جولاقتى جانە گەوستاتسيونارلىق سپۋتنيك جۇيەلەرى ارقىلى 2024 جىلعا دەيىن جەتكىزىلەدى. ساتباەۆ قالاسىندا ينتەرنەت 2023 جىلدىڭ سوڭىنا دەيىن وتكىزىلەدى.

سونداي-اق ۆيتسە-مينيستر جايىلىمدار مەن ورمانداردى زەرتتەۋ، زاڭسىز باسىپ الىنعان نەمەسە ماقساتسىز پايدالانىلىپ جاتقان جەرلەر، زاڭسىز اعاش كەسۋ جايتتارىن انىقتاۋ ءۇشىن وبلىس تەرريتورياسىنا عارىشتىق مونيتورينگ جاسالاتىنىن ايتتى. مىسالى، اعاش كەسۋدىڭ 44 پوليگونى، جەر كاداسترى بازاسىنا ەنگىزىلمەگەن 11 مىڭ جەر تەلىمى، ماقساتسىز قولدانىلىپ جاتقان 34 گا جەر اۋماعى انىقتالعان.

«ونىڭ ۇستىنە عارىشتان مونيتورينگ جاساۋ ارقىلى ءورت وشاقتارى مەن ماڭايىندا ورنالاسقان ەلدى مەكەندەردىڭ، سونداي-اق اسا ماڭىزدى نىسانداردىڭ، جولداردىڭ جانە ت.ب. ناقتى گەوگرافيالىق كوورديناتتارىن انىقتاۋعا بولادى. 2021 جىلى 1، 098 گا ورماندى دالا ورتەنگەن، 2022 جىلعى ءساۋىر-مامىر ايلارىندا – 31،3 گا، تاسقىن سۋ قاۋىپى بار 154 ۋچاسكى»، دەدى اسحات ورازبەك.

ۆيتسە-مينيستر تەمىرتاۋ قالاسىنىڭ حالىققا قىزمەت كورسەتۋ ورتالىعىندا ازاماتتاردى قابىلدادى. ۆيتسە-مينيستر حالىقتىڭ ساۋالدارىنا جاۋاپ بەرىپ، مينيسترلىك قۇزىرەتىنە كىرمەيتىن سۇراقتار بويىنشا ءتيىستى مەكەمەلەرمەن كەلىسسوز جۇرگىزىپ، ماسەلەنى شەشۋگە اتسالىساتىنىن ايتتى.

سوڭعى جاڭالىقتار

ەلوردا «جاسىل» ايماققا ءوتتى

كوروناۆيرۋس • كەشە

ۇقساس جاڭالىقتار