پالۋان گۇزەل مانيۋروۆا ازيانىڭ چەمپيونى اتاندى

استانا. 26 ءساۋىر. قازىرگى كۇندەرى استانادا ءوتىپ جاتقان كۇرەستەن ازيا چەمپيوناتىندا 75 كيلوعا دەيىنگى سالماقتا قازاقستاننىڭ ايەلدەر قۇراماسىنىڭ باس جاتتىقتىرۋشىسى, لوندون وليمپياداسىنىڭ قولا جۇلدەگەرى گۇزەل مانيۋروۆا التىن مەدالدى جەڭىپ الدى. بۇل تۋرالى egemen.kz ءتىلشىسى حابارلادى. وسىمەن مانيۋروۆا قۇرلىقتىڭ ءتورتىنشى مارتە چەمپيونى اتانىپ وتىر. ءوز سالماعىندا استانا كىلەمىندە گۇزەلگە شاق كەلەتىن قارسىلاس بولعان جوق. ول ءبىرىنشى اينالىمدا وزبەك گۇلميرا يسماتوۆانى وڭاي ۇتتى. ال جارتىلاي فينالدا ۇندىستاندىق دجويتي دجويتيدەن ايلاسى مەن كۇشىن اسىرا ءبىلدى. فينالدىق ايقاستى قىتاي فەنگ چجوۋمەن وتكىزگەن ءبىزدىڭ پالۋانىمىز تاعى دا باسىمدىق تانىتتى. بۇعان دەيىن گ.مانيۋروۆانىڭ 2010, 2011 جانە 2012 جىلدارى ازيانىڭ چەمپيونى بولعانىن دا ايتا كەتەيىك. وسىمەن قۇرلىق چەمپيوناتىنداعى ايەلدەر كۇرەسى دە مارەگە جەتتى. جارىستىڭ ءبىرىنشى كۇنى 48 كيلوداعى تاتيانا امانجول التىن مەدال العان ەدى. كەلەسى كۇنى ەكاتەرينا لاريونوۆا, ايىم ءابدىلدينا جانە ەلميرا سىزدىقوۆا قولا مەدالدەرگە قول جەتكىزدى. ايەلدەر اراسىنداعى جارىستا 3 التىن مەدالى بار جاپونيا قۇراماسى ءبىرىنشى ورىن السا, ەكىنشى ورىنعا قىتاي, ال ءۇشىنشى ورىنعا قازاقستان كوماندالارى ورنالاستى. چەمپيونات 27 ءساۋىر كۇنى اياقتالادى. دامير قوجامقۇل. دەرەككوز: egemen.kz. فوتو: Vesti.kz.