شىعىس قازاقستان وبلىستىق پوليتسيا دەپارتامەنتى جپقب تابيعاتتى قورعاۋ پوليتسياسى ءبولىمى قورشاعان ورتانى, جانۋارلار دۇنيەسىن قورعاۋ, ءوسىمىن مولايتۋ جانە پايدالانۋ سالاسىندا مەملەكەتتىك باقىلاۋدى جۇزەگە اسىراتىن ۋاكىلەتتى مەملەكەتتىك ورگاندارمەن بىرلەسىپ, براكونەرلىك فاكتىلەرىنىڭ جولىن كەسۋ بويىنشا تۇراقتى نەگىزدە رەيدتىك ءىس-شارالار جۇرگىزەدى.
اتالعان پوليتسيا ءبولىمىنىڭ قىزمەتكەرلەرى جىل باسىنان بەرى جابايى اڭداردى زاڭسىز اۋلاۋدىڭ 11 فاكتىسىن انىقتادى. بۇل قىلمىستىق كودەكستىڭ
337-بابى, ياعني «زاڭسىز اڭ اۋلاۋ» ءىسى بويىنشا قارالادى.
مىسالى, اياگوز اۋدانى تارباعاتاي اۋىلدىق وكرۋگىنىڭ اۋماعىندا تابيعات قورعاۋ پوليتسياسىنىڭ قىزمەتكەرلەرى «وحوتزوپروم» ينسپەكتورلارىمەن بىرلەسىپ, رەيدتىك ءىس-شارالار وتكىزگەن كەزدە ارقار مەن كۇزەندەردى زاڭسىز اۋلاعان اققوجا اۋىلىنىڭ 38 جاستاعى تۇرعىنى ۇستالدى.
قاسكۇنەم اقشوقى اۋىلىنىڭ شەتىندە تەگىس ۇڭعىلى تىركەلمەگەن 28 كاليبرلى قارۋمەن «ولجاسىن» اتىپ ولتىرگەن. قورشاعان ورتاعا كەلتىرىلگەن زالال 13 ميلليون تەڭگەدەن استى.
اتالعان فاكتى بويىنشا قر قك 337-بابى 4-بولىگىمەن (جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن تۇرلەرىنە, سونداي-اق ءىرى زالال كەلتىرە وتىرىپ پايدالانۋعا تىيىم سالۋ ەنگىزىلگەن جانۋارلارعا قاتىستى زاڭسىز اڭ اۋلاۋ سانكتسياسىندا 6 مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋ نە سول مولشەردە تۇزەۋ جۇمىستارىنا نە 3-تەن 6 جىلعا دەيىنگى مەرزىمگە باس بوستاندىعىن شەكتەۋ كوزدەلگەن; مۇلكى تاركىلەنىپ, بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان 7 جىلعا دەيىنگى مەرزىمگە ايىرا وتىرىپ, سول مەرزىمگە باس بوستاندىعىنان ايىرۋعا جازالانادى) قىلمىستىق ءىس قوزعالدى.
اباي وبلىسى
