«سوڭعى 10 جىلدا ءبىز 1100-دەن استام جولاۋشىلار ۆاگونىن جاڭارتتىق. جولاۋشى ۆاگوندارىنىڭ ورتاشا توزۋى - شامامەن 46%. بيىل تاعى 73 جولاۋشىلار ۆاگونىن ساتىپ الۋدى جوسپارلاپ وتىرمىز. سونداي-اق بيزنەستى, ياعني, جەكە تاسىمالداۋشىلاردى قولداۋ جانە ىنتالاندىرۋ ماقساتىندا جولاۋشىلار تاسىمالىن سۋبسيديالاۋ, جولاۋشى ۆاگوندارىن ساتىپ الۋ كەزىندە سىياقى مولشەرلەمەسىن سۋبسيديالاۋ ەنگىزىلدى. قازىر شۆەيتساريالىق «شتادلەر» كومپانياسىمەن ەۋروپالىق ستاندارت بويىنشا جولاۋشى ۆاگوندارىن شىعارۋ ماسەلەسى پىسىقتالىپ جاتىر», دەدى قاسىم تىلەپوۆ ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا.
ونىڭ ايتۋىنشا, 2029 جىلعا دەيىن ەلىمىزدە 530-دان استام ۆاگون ساتىپ الىنادى.
«پويىزدارعا قاتىستى بەلگىلى ءبىر كولەمدە ارىز-شاعىم بارىن بىلەمىز. سوندىقتان بۇگىنگى الاڭعا تاسىمالداۋشى كومپانيالاردىڭ وكىلدەرىن شاقىردىق. سوڭعى 5 ايدا بىزگە 1000-نان استام ءوتىنىش, ارىز كەلىپ ءتۇستى. ءاربىر ءوتىنىش جەكە قارالىپ, ءتيىستى شارالار قابىلداندى. اتاپ ايتقاندا, اتالعان 5 ايدا 200-دەن استام ۆاگون تەكسەرىلدى, ولاردان 431 ءتارتىپ بۇزۋ فاكتىسى انىقتالدى. ناتيجەسىندە شامامەن 32 ملن تەڭگە سوماعا ايىپپۇل سالىندى», دەدى ۆەدومستۆو وكىلى.
