بۇگىندە الماتىدا 32 مىڭنان استام كوپبالالى وتباسى تۇراتىن بولسا, ونىڭ 5 مىڭنان استامى «التىن القا» جانە «كۇمىس القا» يەگەرلەرى. «باقىتتى وتباسى» ورتالىعىنىڭ جەتەكشىسى زۋلفييا بايساقوۆانىڭ ايتۋىنشا, قالا تۇرعىندارىنىڭ ءبىر بولىگى ورتالىقتار كەڭەسىنە جۇگىنۋ ناتيجەسىندە جۇمىسپەن قامتىلىپ, مەديتسينالىق كومەك الۋ ءۇشىن وڭالتۋ مەكەمەلەرىنە جىبەرىلگەن. ال مىڭنان استامىنا دەمەۋشىلەر تاراپىنان ماتەريالدىق قولداۋ كورسەتىلدى.
«كوپبالالى وتباسىلارعا قولداۋ كورسەتۋدى ماقسات ەتەتىن ورتالىقتا الەۋمەتتىك باعدارلامالار تۋرالى كەڭەيتىلگەن اقپاراتتار بەرىلىپ, جۇمىسقا ورنالاسۋىنا قولايلى جاعدايلار جاسالعان. كوپبالالى جانە از قامتىلعان وتباسى مۇشەلەرىنىڭ دامۋى مەن تۇلعالىق ءوسۋى دە ورتالىق ماماندارىنىڭ وتباسىلىق قۇندىلىقتاردى دارىپتەۋ اياسىندا ۇنەمى قاپەردە تۇراتىن ماڭىزدى ماسەلە. ال ءداستۇرلى قولونەردى دامىتۋ ورتالىعىندا مىڭداعان ادام وقىتۋ كۋرستارىنان ءوتىپ, نازىك جاندىلار تىگىن شەبەرحانالارىن, اسپازدىق, باسپاحانالاردى, سۇلۋلىق ستۋديالارىن اشىپ, قايتارىمسىز گرانتتار العان. Isker Ana باعدارلاماسى بويىنشا انالار مەن ولاردىڭ وتباسىلارى بەيىندىك كۋرستاردان ءوتىپ, بيزنەس نەگىزدەرىن مەڭگەرىپ, ءوز ءىسىن اشۋعا مۇمكىندىك الۋدا», دەپ اتاپ ءوتتى ورتالىق جەتەكشىسى.
بۇل ورتالىقتارعا كوپبالالى انالار عانا ەمەس, سونىمەن قاتار دومبىرا ويناۋدى, اكتەرلىك شەبەرلىك, بي, قولونەردى ۇيرەنگىسى كەلەتىن بالالاردىڭ قاتىسۋىنا مۇمكىندىك بار. سونداي-اق بالالارعا ورىس جانە اعىلشىن تىلدەرى, ۆوكال, حورەوگرافيا بويىنشا كۋرستار دا قولجەتىمدى.
«باقىتتى وتباسى» ورتالىقتارىنىڭ ماماندارى حالىقتىڭ الەۋمەتتىك وسال توپتارىنا كومەك كورسەتە وتىرىپ, اعىلشىن ءتىلى, كومپيۋتەرلىك ساۋاتتىلىق, تىگىن ءىسى, بيزنەس-جوسپارلاۋ, كيىم ديزاينى, كاسىپكەرلىك, بۋحگالتەريا, اسپازدىق, كيىز باسۋ, ۆيزاج, شاشتاراز قىزمەتتەرى, Sمم-ماركەتينگ, ۇيالى تەلەفونداردى جوندەۋ, كونديتەر, اسپاز جانە باسقا دا كاسىپتەردى يگەرۋگە قولداۋ كورسەتەدى. جىل باسىنان بەرگى ارالىقتا بۇل كۋرستاردى 1 600-دەن استام ادام تامامداعان.
الماتى
