اۋداندىق «كوممۋنيزم تاڭى» (قازىرگى «مويىنقۇم تاڭى») گازەتىنىڭ ءفوتوتىلشىسى, مارقۇم قالي تاتتىبەكوۆ تۇسىرگەن مىنا سۋرەتتە اسەتتىڭ ادەمى ءبىر جاڭا ءانىن مويىنقۇمنىڭ جەزتاڭداي ءانشىسى اتانعان, مارقۇم زيناكۇل قايماقوۆانىڭ ۇيرەنۋ ءساتى بەينەلەنگەن. ول بۇرىن دا كومپوزيتوردىڭ «التىنىم», «ارمانداستار, قۇرداستار» جانە تاعى باسقا تۋىندىلارىن ناقىشىنا كەلتىرە ورىندايتىن-دى.
سول جاقتا ميكروفوندى ۇستاپ تۇرعان اۋداندىق مۋزىكا مەكتەبىنىڭ ديرەكتورى قىزمەتىن اتقارعان, جەرگىلىكتى حالىق اسپاپتارى وركەسترىنىڭ ديريجەرى بولعان, اۋداندىق مادەنيەت ءبولىمىن باسقارعان وڭتۇستىكقازاقستاندىق باۋىرىمىز تورەبەك ماجىباەۆ (كەيىننەن, ياعني توقسانىنشى جىلداردىڭ اياق جاعىندا تۋعان وڭىرىنە قونىس اۋدارعان), ال اسەكەڭنىڭ جانىندا نوتاعا كوز سالىپ قاتار تۇرعان سان ءتۇرلى اسپاپتا كەرەمەت وينايتىن شەبەر مۋزىكانت, مارقۇم تورەحان نۇرمانباەۆ.
زيناكۇل 1978-1979 جىلداردا «مويىنقۇم» ءان-بي ءانسامبلىنىڭ قۇرامىندا ماسكەۋدە, پورتۋگاليادا ونەر كورسەتىپ, لاۋرەات اتانعان بولاتىن. سول سياقتى تورەبەك پەن تورەحان دا اتالعان جەرلەردەگى كورەرمەندەر ەرەكشە ريزا بولعان كونتسەرتتەرگە بەلسەنە قاتىسقان ەدى.
بەرىكباي قادىقوۆ,
جۋرناليست
الماتى وبلىسى,
قاراساي اۋدانى
