ترەنينگتى قازاقستانداعى «بۇۇ-ايەلدەر» قۇرىلىمى مەن ۇلتتىق ەكونوميكا مينيسترلىگى بىرلەسىپ ۇيىمداستىردى. اشىلۋ راسىمىندە قازاقستانداعى «بۇۇ-ايەلدەر» قۇرىلىمنىڭ وكىلى ماريا دوتسەنكو ءسوز سويلەدى.
«گەندەرلىك باعدارلانعان بيۋدجەتتەۋ – بيۋدجەت پروتسەسىن جوسپارلاۋ بويىنشا گەندەرلىك تەڭدىككە قول جەتكىزۋدىڭ بىرەگەي قۇرالى بولىپ سانالادى. 2018 جىلى ۇلتتىق ەكونوميكا مينيسترلىگى «بۇۇ-ايەلدەر» قۇرىلىمىنىڭ قولداۋىمەن 2020-2025 جىلدارى قازاقستاندا گەندەرلىك باعدارلانعان بيۋدجەتتەۋدى ەنگىزۋ بويىنشا ۇلتتىق جوسپاردى قابىلدادى. اتالعان قۇجاتتا بيۋدجەتتى گەندەرلىك فاكتورلاردى ەسكەرە وتىرىپ مەملەكەتتىك جوسپارلاۋ تۇرعىسىنان جەتىلدىرۋ بويىنشا شارالار ءتىزىمى كورسەتىلگەن. قازىر ءبىز اتالعان جوسپاردى جەتىلدىرۋ بويىنشا قازاقستان ۇكىمەتىنە قولداۋ ءبىلدىرىپ وتىرمىز», دەيدى م.دوتسەنكو.
قاتىسۋشىلار دا مۇنداي باعىتتاعى ءىس-شارانىڭ ەلىمىزدە قولعا الىنعانىنا ريزاشىلىق ءبىلدىرىپ, ءوز پىكىرلەرىن جەتكىزدى.
«ترەنينگ اقپاراتتىق, تانىمدىق تۇرعىدا ءبىز ءۇشىن وتە پايدالى بولدى. بىزدە بۇرىن گەندەرلىك باعدارلانعان بيۋدجەتتەۋگە بايلانىستى سەمينار, ترەنينگتەر وتكىزىلگەن ەمەس. بۇل ءبىز ءۇشىن جاڭا تاجىريبە بولىپ جاتىر. قىزمەتىمىز بارىسىندا الەۋمەتتىك پروبلەماسى جەتىپ ارتىلاتىن قانشاما كوپبالالى ايەلدى كورەمىز. ارينە, الەۋمەتتىك پروبلەمانىڭ پوليتسياعا قاتىسى جوق. دەسە دە حالىق كەز كەلگەن تۇيتكىلدى پوليتسياعا ايتىپ, شەشىمىن تاپقىسى كەلەدى. بۇگىنگى ءىس-شارادان ءوزىمىز ءۇشىن كوپ پايدالى نارسەنى كوردىك, تۇيدىك, ەندى سونى جۇمىس بارىسىندا قولدانامىز», دەيدى نۇر-سۇلتان قالالىق پوليتسيا دەپارتامەنتىنىڭ ايەلدەردى زورلىق-زومبىلىقتان قورعاۋ توبىنىڭ اعا ينسپەكتورى گۇلميرا شراحمەتوۆا.
گەندەرلىك بيۋدجەتتەۋ دەگەنىمىز نە ءوزى؟ قىسقا-نۇسقا انىقتاما بەرىپ وتەر بولساق, بۇل – قوعامداعى ءار ازاماتتىڭ قاجەتتىلىگىن ەسكەرۋ جانە قارجىنى ۇتىمدى پايدالانۋ. بيۋدجەتتى قالىپتاستىرۋ كەزەڭىندە ەر مەن ايەل ازاماتتارىنىڭ مۇقتاجدىعى مەن قىزىعۋشىلىعى بىردەي ەسەپكە الىنۋى كەرەك. گەندەرلىك بيۋدجەت ءۇش ماقساتتى كوزدەيدى: قارجىلىق-جوسپارلىق ەسەپ بەرۋ مەن ونىڭ مولدىرلىگى, گەندەرلىك ماسەلەرگە ايەلدەردى كوبىرەك قاتىستىرۋ, مىسالى, بيۋدجەتتى قابىلداۋ ماسەلەسىنە ايەلدەردىڭ ەركەكتەرمەن بىرگە تەڭ قاتىسۋى جانە گەندەرلىك تەڭدىكپەن ايەلدەر قۇقىن دامىتۋ.
