ال وبلىستىق پوليتسيا دەپارتامەنتىنىڭ ىشكى جانە سىرتقى كوممۋنيكاتسيا باسقارماسىنىڭ باسشىسى باقىتجان قۇدياروۆ بولسا, ءوزىنىڭ جۇمىسىنداعى باستى ماقسات مەملەكەتتىك ورگان مەن جۋرناليستەر اراسىنداعى «التىن كوپىر» بولۋعا ۇمتىلۋ ەكەندىگىن ايتادى.
باقىتجاننىڭ كىندىك قانى تامعان اقمولا وبلىسىنداعى بۋراباي اۋدانىنىڭ مادەنيەت اۋىلىندا جالعىز تەلەكانال – «حابار» ارناسى عانا كورسەتۋشى ەدى. بالا باقىتجان كوگىلدىر ەكراننان كۇندە حابار تاراتاتىن زەيىن الىپبەكتى اۋزىن اشىپ, كوزىن جۇمىپ تىڭدايتىن. وسكەندە وسى اعاداي بولسام دەپ ارمان ەتتى, ەلىكتەگەنى دە راس ەدى...
ورتا مەكتەپتى بىتىرگەننەن كەيىن جۋرناليست بولسام دەگەن ارمان قاراعاندى قالاسىنداعى اكادەميك ە.بوكەتوۆ اتىنداعى قارمۋ-دىڭ جۋرناليستيكا بولىمىنە الىپ كەلگەن. ۋنيۆەرسيتەت قابىرعاسىندا جۇرگەنىندە ماراتبەك توقمىرزا سىندى جۋرناليستيكاداعى ۇلاعاتتى ۇستازىنا ۇقساپ باققانى دا راس-تۇعىن.
ال قولىنا ديپلوم الىپ, ول كەزدە «قازاقستان-قاراعاندى» دەپ اتالاتىن وبلىستىق تەلەارناعا كەلگەنىندە, سونداعى بەلگىلى جۋرناليستەر جەڭىس سارمۇرزين مەن نۇرلان ءابىلدين سىندى تاجىريبەلى مامانداردان ءتالىم-تاربيە الىپ, تەلەۆيزياعا قاتىستى كوپ دۇنيەنى بويىنا ءسىڭىردى.
البەتتە, وبلىستىڭ ماڭدايالدى تەلەارناسى بۇل سياقتى وندىردەي جاستى بىردەن جۇمىسقا الماعان. اۋەلى وندىرىستىك ءىس-تاجىريبەدەن ءوتتى. ءسويتىپ جۇرگەنىندە, بىردە اۆتوكولىكتەرگە قاتىستى الاياقتاردىڭ اتىشۋلى «اۆتوپيراميدا» دەپ اتالعان قىلمىستىق توبى قولعا ءتۇسىپ, سول جونىندەگى ءباسپاسوز ءماسليحاتىنا قازاق رەداكتسياسى اتىنان جاس باقىتجاندى دا جىبەرگەن رەداكتورلار.
ءباسپاسوز ءماسليحاتىنان كەيىن سول كەزدە وبلىستىق ءىىب باستىعىنىڭ ورىنباسارى بولىپ قىزمەت ەتكەن قايرات دۇيسەنبەكوۆكە قازاق تىلىندە سۇراق قويعانى بار-تىن. ءدال وسى ساتتە جانىنا دەمبەلشە كەلگەن جىگىت اعاسى كەلىپ, مۇنىڭ سۇراقتارىنا ءوزى جاۋاپ بەرەتىنىن ايتىپ, شەتكە قاراي وڭاشا شىعارىپ العان. سويتسە, بۇل ازامات وبلىستىق ءىىب-نىڭ ءباسپاسوز حاتشىسى جاڭاتاي سەمبەكوۆ ەكەن. تاجىريبەلى مامان جاس جىگىتتىڭ جۇمىسقا دەگەن قۇلشىنىسىن بايقاپ قالعان بولسا كەرەك, ىشكى ىستەر ورگاندارىنا قىزمەتكە شاقىرعان.
ءسويتىپ, 2008 جىلدىڭ قازان ايىندا قازىرگى ءاليحان بوكەيحان, بۇرىنعى وكتيابر اۋداندىق ىشكى ىستەر بولىمىندەگى مەملەكەتتىك ءتىل جانە اقپارات توبىنىڭ ينسپەكتورى بولىپ جۇمىسقا تۇردى. كەيىن بۇل قۇرىلىم جابىلىپ, قاراعاندى قالالىق ءىى باسقارماسى بولىپ قۇرىلدى دا, بۇل وسىندا جۇمىسقا اۋىستى.
ءدال وسى تۇستا پوليتسيانىڭ ءيميدجىن كوتەرۋ ماقساتىندا وبلىستىق «قازاقستان-قاراعاندى» تەلەارناسىندا «زاڭ جانە زامان» باعدارلاماسى اشىلعان بولاتىن. مۇنى جۇرگىزۋ بۇل كەزدە اجەپتاۋىر تاجىريبە جيناقتاپ, تانىمال بولىپ قالعان باقىتجان قۇدياروۆقا جۇكتەلدى. وسىنداي جاۋاپكەرشىلىك جۇگى مەن زور سەنىم ارتىلعان جاس ماماننىڭ قىزمەتى دە اۋىسىپ, ەندى ول وبلىستىق ءىىب-دا جۇمىس ىستەي باستادى. مەملەكەتتىك ءتىل جانە اقپارات توبىنىڭ ينسپەكتورى, اعا ينسپەكتورى بولدى.
ال 2012 جىلى سول كەزدەگى قاراعاندى وبلىستىق ءىىب باستىعى نۇرلان راحىمبەرليننىڭ بۇيرىعىمەن مەملەكەتتىك ءتىل جانە اقپارات باسقارماسى باسشىسىنىڭ ورىنباسارى بولىپ تاعايىندالدى. ال 2016 جىلدان بەرى ىشكى جانە سىرتقى كوممۋنيكاتسيا باسقارماسى دەپ اتالاتىن قۇرىلىمداعى توعىز قىزمەتكەردەن تۇراتىن ۇجىمعا جەتەكشىلىك ەتىپ كەلەدى.
پوليتسيانىڭ ەل ىشىندەگى ءيميدجىنىڭ جاقسارۋىنا قوعام دا مۇددەلى بولۋى كەرەك دەپ سانايدى باقىتجان قۇدياروۆ. ەكى تاراپتىڭ مۇددەسى تۇيىسكەن جەردە ءتۇبى تۇسىنىستىكتىڭ ورنايتىنىنا سەنىمدى ول. «مىنا سولتۇستىكتەگى كورشىمىزگە قاراساڭىز, پوليتسيا تۋرالى نەبىر جاعىمدى سەريالدار, دەرەكتى فيلمدەر ءتۇسىرىپ تاستاعان. بۇل تاقىرىپقا قاتىستى باعدارلامالارىنىڭ ءوزى قانشاما دەسەڭىزشى؟! ياعني بىزگە دە بۇل سالادا ساقشىلاردىڭ ابىروي-بەدەلىن كوتەرەتىن دۇنيەلەرگە كوڭىل بولە باستاعانىمىز ءجون شىعار», دەپ وي تۇجىرادى ب.قۇدياروۆ.
باقىتجان سوڭعى كەزدەرى كەيبىر بلوگەرلەردىڭ كەلسىن-كەلمەسىن پوليتسيا قىزمەتكەرلەرىن كەلەمەجدەپ, اتاق شىعارعىسى كەلەتىن تەرىس قىلىقتارىنا قىنجىلادى. «البەتتە, بۇعان ءتارتىپ ساقشىلارى وزدەرىنىڭ ءمىنسىز قىزمەتىمەن, كاسىبي بىلىكتىلىگىمەن تويتارىس بەرۋى كەرەك», دەپ سانايدى ب.قۇدياروۆ.
وسى ماقالا رەداكتسياعا ەندى جول تارتايىن دەپ تۇرعاندا, «ەگەمەننىڭ» قاراعاندىداعى قوسىنىنا مىناداي قۋانىشتى حابار جەتتى. قاراعاندى وبلىستىق پد ىشكى جانە سىرتقى كوممۋنيكاتسيا باسقارماسىنىڭ باسشىسى باقىتجان قۇدياروۆقا پودپولكوۆنيك شەنى بەرىلگەن ەكەن. سول-اق ەكەن, جوعارىدا ايتقان جۋرناليستەر چاتىندا ورىسشا-قازاقشا ارالاس ء«سىز ءۇشىن شىن قۋانىشتىمىن. قاڭتار وقيعاسى كەزىندە حابار تاراتايىن دەپ كەلگەنىمدە, ءسىزدىڭ ءوزىڭىزدى ادام رەتىندە جاقسى قىرىڭىزدان كورسەتكەنىڭىز ەسىمدە», «جاقسى ادامداردىڭ جاقسىلىعىنا قۋانامىز!», «لايىقتىسىز!», «گەنەرال بولىڭىز!» دەگەن سىڭايداعى اقجارما تىلەكتەر قارشا جاۋىپ كەتتى.
قاراعاندى
