«تورتجىلدىقتىڭ باستى باسەكەسىندە وتانداستارىمىز الەمنىڭ ەڭ مىقتى سپورتشىلارىمەن كۇش سىناسىپ, ەلگە ابىرويمەن ورالدى. تاريحي جەڭىسكە تولى سۋردليمپيادادا قازاقستاندىق اتلەتتەر ەرەكشە بەلسەندىلىك تانىتىپ, جوعارى جەتىستىكتەرگە قول جەتكىزدى. اتاپ ايتقاندا, شونكۋ حايراتحاان ەكى التىن مەدال يەلەنىپ, سەنساتسيا جاساعانىمەن ەرەكشە قۇتتىقتايمىن. بۇل ناتيجە ەلدەگى سۋردليمپيادا سپورتىنىڭ دامۋىنا كەرەمەت سەرپىن بەرەدى دەگەن ۇمىتتەمىن», دەدى مادەنيەت جانە سپورت ءمينيسترى د.اباەۆ جيىننىڭ اشىلۋ راسىمىندە.
سالتاناتتى ءىس-شارا بارىسىندا مادەنيەت جانە سپورت مينيسترلىگىنىڭ اتىنان سۋردليمپيادا ويىندارىنىڭ جەڭىمپازدارى, جۇلدەگەرلەرى جانە ولاردىڭ جاتتىقتىرۋشىلارى العىس حاتپەن ماراپاتتالدى. سونداي-اق سۋردليمپيادالىق سپورت تۇرلەرىن قولداۋ ماقساتىندا مەملەكەت تاراپىنان بەرىلەتىن قارجىلاي سىياقى مولشەرى وليمپيادا جانە پاراليمپيادامەن تەڭەستىرىلگەن. ياعني اتالعان جارىستا ءبىرىنشى ورىن العان سپورتشىعا – 250 000, ەكىنشى ورىنعا – 150 000, ءۇشىنشى ورىنعا – 75 000, ءتورتىنشى ورىنعا – 30 000, بەسىنشى ورىنعا – 10 000 جانە التىنشى ورىنعا 5 000 اقش دوللارى بەرىلدى.
«بۇگىن ەلوردا تورىندە سۋردليمپيادا جەڭىمپازدارىنا كوڭىل ءبولىپ, قۇرمەت كورسەتكەنىنە العىسىمىز شەكسىز. جەڭىسكە جەتۋىمە قولداۋ كورسەتكەن مادەنيەت جانە سپورت مينيسترلىگىنە, قازاقستان رەسپۋبليكاسىنىڭ ۇكىمەتىنە العىس ايتامىن. بارلىق جەڭىمپازدى جەتىستىگىمەن قۇتتىقتايمىن», دەدى XXIV جازعى سۋردليمپيادا ويىندارىنىڭ ەكى دۇركىن جەڭىمپازى شونكۋ حايراتحاان.
ايتا كەتەيىك, بيىلعى سۋردليمپيا ويىندارى مامىردىڭ 1-15 ارالىعىندا برازيلياداعى كاشياس-دۋ-سۋل قالاسىندا ۇيىمداستىرىلدى. الەمنىڭ 100 ەلىنەن 4 000-نان استام سپورتشى قاتىسقان جارىستا جەرلەستەرىمىز جالپى سانى 28 جۇلدە (3 التىن, 7 كۇمىس, 18 قولا) ەنشىلەپ, جالپىكوماندالىق ەسەپتە 13-ورىنعا تابان تىرەدى.
مەدال كورسەتكىشى بويىنشا ۋكراينا سپورتشىلارىنا تەڭ كەلەر قارسىلاس تابىلمادى. ولار 138 (62 التىن, 38 كۇمىس, 38 قولا) مەدال جيىنتىعىن ولجالاپ, تۋرنير كەستەسىندە توپ جاردى. ەكىنشى ورىن العان اقش قۇراماسىنىڭ قورجىنىندا 55 (20, 11, 14) مەدال بار بولسا, ءۇشىنشى ورىنداعى يران سپورتشىلارى 40 (14, 12, 14) جۇلدە جەڭىپ الدى.
