ەڭ اۋەلى مينيستر مامانداندىرىلعان وبلىس ورتالىعىنداعى حالىققا قىزمەت كورسەتۋ ورتالىعىندا ازاماتتاردى قابىلدادى. شاھار تۇرعىندارى كورسەتىلەتىن قىزمەتتەردىڭ ساپاسى جونىندە اڭگىمە ءوربىتىپ, ورتالىقتىڭ جۇمىسىنا كوڭىلدەرى تولاتىندارىن جەتكىزدى. ونلاين فورماتقا كوشۋ ناتيجەسىندە, مەملەكەتتىك قىزمەتتەردى الۋداعى جەدەلدىك پەن قولايلىلىقتىڭ ايتارلىقتاي ارتقانىن اتاپ ءوتتى.
دەيتۇرعانمەن, تۇرعىندار كەيبىر ماسەلەلەر ءالى دە بيۋروكراتيالاندىرىلعانىن جانە مينيسترلىك تاراپىنان نازار اۋدارۋدى تالاپ ەتەتىندىگىن ايتتى. ازاماتتاردىڭ ساۋالدارىنا جاۋاپ بەرە وتىرىپ, مينيستر جاقىن ارادا ەكىباستۇزدا مامانداندىرىلعان حقو اشىلاتىنىن سۇيىنشىلەدى. ەندىگى جەردە قالا مەن اۋدان تۇرعىندارىنا كولىك قۇرالدارىن رەسىمدەۋ ءۇشىن وبلىس ورتالىعىنا بارۋدىڭ قاجەتى بولا قويماس.
تورايعىروۆ ۋنيۆەرسيتەتىندە جۇرتشىلىقپەن كەزدەسۋ بارىسىندا ب.مۋسين ۆەدومستۆونىڭ مەملەكەتتىك قىزمەت كورسەتۋ, وبلىستى قولجەتىمدى ينتەرنەتپەن جانە بايلانىسپەن قامتاماسىز ەتۋ, عارىشتىق مونيتورينگ باعىتىندا جۇرگىزىلىپ جاتقان جۇمىستاردىڭ جوبالارى مەن جەتىستىكتەرى تۋرالى ايتتى.
ۆەدومستۆو باسشىسى قازىرگى تاڭدا قازاقستاندىقتارعا ونلاين فورماتتا 18 نەگىزگى قۇجات قولجەتىمدى ەكەنىن ايتتى. ولاردىڭ ىشىندە جەكە كۋالىك, جۇرگىزۋشى كۋالىگى, نەكە جانە تۋ تۋرالى كۋالىكتەر جانە تاعى باسقالارى بار. سونىمەن قاتار ب.مۋسين مەملەكەتتىك قىزمەتتەردى پرواكتيۆتى تۇردە كورسەتۋگە, بۇل جاڭاشىلدىق بولاشاقتا ادامي فاكتوردان مۇلدەم باس تارتۋعا باعىتتالعانىن اتاپ ءوتتى.
– ءبىز مەملەكەتتىك قىزمەتتەردى ۇسىنۋ پروتسەسىنەن ادامي فاكتوردى الىپ تاستاۋ ماقساتىن قويىپ وتىرمىز. جەكە كۋالىكتى الۋعا جانە ونى قايتا شىعارۋعا ارنالعان «قۇجاتتاندىرۋ تەرمينالى» سياقتى جوبالاردى ىسكە اسىرۋ جوسپارى بار. قازىرگى ۋاقىتتا بۇل جوبا نۇر-سۇلتان قالاسىنىڭ بىرقاتار حقو-سىندا ورناتىلۋدا. بۇل قادام تۇرعىندارعا كوشى-قون قىزمەتىنىڭ قىزمەتكەرىنە جۇگىنبەي, 5-10 مينۋت ىشىندە جەكە كۋالىككە تاپسىرىس بەرۋگە مۇمكىندىك بەرەدى, – دەدى ب.مۋسين.
مينيستر بۇگىندە پاۆلودار وبلىسى حالقىنىڭ 98 پايىزى, ياعني 758 مىڭ ادام ينتەرنەت جانە بايلانىس قىزمەتتەرىمەن قامتاماسىز ەتىلگەنىن اتاپ ءوتتى. قالعان 2 پايىزى جاقىن ارادا قوسىلادى.
تاعى ءبىر ماڭىزدى ماسەلە – جايىلىمدىق جەرلەردىڭ جاي-كۇيىن سپۋتنيكتەن باعالاۋ. سونىڭ ناتيجەسىندە, وبلىستا 1,8 ملن گا جايىلىمدىق جەردى زاڭسىز باسىپ الۋ جاعدايلارى اشكەرە بولعان.
ورمان رەسۋرستارىنا جاسالعان كوسمومونيتورينگ دەرەكتەرىنە سايكەس, 731 اعاش كەسۋ پوليگونى انىقتالىپتى. پاۆلودار وبلىسىنىڭ مەملەكەتتىك ورمان قورى اۋماعىندا 144 قۇرىلىس تسيفرلاندىرىلعان. قۇرىلىستاردىڭ زاڭدىلىعىن تەكسەرۋ ماقساتىندا دەرەكتەر ەكولوگيا, گەولوگيا جانە تابيعي رەسۋرستار مينيسترلىگىنە جولدانعان. تسيفرلانعان ورمان القاپتارىنىڭ جالپى اۋدانى 225,9 مىڭ گا قۇرايدى.
ب.مۋسين «اقىلدى قالا» جۇيەسىن دامىتۋ ماسەلەسىنە دە توقتالدى. ونىڭ مالىمەتىنشە, پاۆلودار Smart city رەيتينگىسىندە 13-ورىندا تۇر. ياعني جەتىلدىرەتىن سالالار جەتەرلىك.
– پاۆلودار قالاسىندا ءار 100 ادامعا 2 بەينەكامەرادان كەلەدى. بۇل الەمدىك كورسەتكىشتەردەن 7 ەسە از. مىسالى, اقش-تا 100 ادامعا 15 كامەرادان كەلەدى. سونداي-اق پاۆلوداردا باسقا وڭىرلەرمەن سالىستىرعاندا تۇرعىن ءۇي-كوممۋنالدىق سەكتور ۇيىمدارىنىڭ قىزمەتتەرىن بەرۋ ءالى كۇنگە دەيىن اۆتوماتتاندىرىلماعان. تۇرعىن ءۇي-كوممۋنالدىق سەكتور قىزمەتتەرىن تسيفرلاندىرۋ بويىنشا جۇمىستار وڭىرلىك گەواقپاراتتىق پورتالدار بازاسىندا جۇرگىزىلۋدە, – دەپ اتاپ ءوتتى مينيستر.
ساپار بارىسىندا تسيفرلى ۆەدومستۆو باسشىسى «Jylygai-Teplitsa» وڭىرلىك IT-Hub-تىڭ جۇمىسىمەن تانىسىپ, پاۆلودار وبلىسىنىڭ IT-قاۋىمداستىعىمەن كەزدەستى. جيىن بارىسىندا ب.مۋسين تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى 2025 جىلعا دەيىن 100 مىڭ IT-مامان دايارلاۋ كوزدەلگەنىن ايتتى. بۇل ءۇشىن باعدارلامالاۋ مەكتەپتەرىنە گرانتتار ۇلەستىرىلمەك. وتكەن جىلدىڭ سوڭىندا 13 IT-مەكتەپكە 100 گرانت بەرىلىپتى. گرانتتىڭ قۇنى 600 مىڭ تەڭگەنى قۇرايدى. بيىل تاعى 3 مىڭ گرانت بولىنەدى دەپ كۇتىلۋدە.
2021 جىلى تورايعىروۆ ۋنيۆەرسيتەتى بازاسىندا اشىلعان IT-مەكتەپ بۇگىننىڭ وزىندە 7 كۋرس بويىنشا ماماندار دايارلايدى ەكەن. قازىرگى ۋاقىتتا 108 سەرتيفيكات بەرىلگەن. ونىڭ 63-ءى IT سالاسىنداعى كۋرستار بويىنشا ۇلەستىرىلگەن. بىلىكتى IT-مامانداردى دايارلاۋ بويىنشا وڭ ديناميكانى ەسكەرە وتىرىپ, پاۆلودار وبلىسىندا IT-حاب قۇرۋ جانە ەكوجۇيەنى دامىتۋ قاجەت ەكەنى ايتىلدى.
جۇمىس ساپارىنىڭ سوڭىندا باعدات مۋسين پاۆلودار وبلىسىنىڭ اكىمى ابىلقايىر سقاقوۆپەن كەزدەسىپ, ءوڭىردى تسيفرلاندىرۋ سالاسىن دامىتۋ جونىندەگى وزەكتى ماسەلەلەردى تالقىلادى.
پاۆلودار وبلىسى
