ۋاكىل قىزمەتىنىڭ مىندەتتەرى - ادامنىڭ جانە ازاماتتىڭ بۇزىلعان قۇقىقتارى مەن بوستاندىقتارىن قالپىنا كەلتىرۋگە جاردەمدەسۋ, قر نورماتيۆتىك قۇقىقتىق اكتىلەرىن جەتىلدىرۋ, ادامنىڭ جانە ازاماتتىڭ قۇقىقتارى مەن بوستاندىقتارىن كوتەرمەلەۋ جانە ىلگەرىلەتۋ.
قۇجاتقا سايكەس, ۋاكىل ءوز قىزمەتىن جۇزەگە اسىرۋ كەزىندە زاڭدىلىق, ادىلدىك, بەيتاراپتىق, وبەكتيۆتىلىك, جاريالىلىق, اشىقتىق, ايقىندىق قاعيداتتارىن جانە قر كونستيتۋتسياسىندا بەكىتىلگەن باسقا دا قاعيداتتاردى باسشىلىققا الادى.
بۇل رەتتە ۋاكىل ءوز وكىلەتتىكتەرىن جۇزەگە اسىرۋ كەزىندە تاۋەلسىز بولىپ, قانداي دا ءبىر مەملەكەتتىك ورگاندار مەن لاۋازىمدى ادامدارعا ەسەپ بەرمەيدى.
سونداي-اق قىلمىس ۇستىندە ۇستالعان نە اۋىر نەمەسە اسا اۋىر قىلمىستار جاساعان جاعدايلاردى قوسپاعاندا, ۋاكىل ءوزىنىڭ وكىلەتتىك مەرزىمى ىشىندە قر پارلامەنتى سەناتىنىڭ كەلىسىمىنسىز ۇستاپ الۋعا, كۇزەتپەن ۇستاۋعا, ۇيقاماققا الۋعا, كۇشتەپ اكەلۋگە, سوت تارتىبىمەن قولدانىلاتىن اكىمشىلىك جازالاۋ شارالارىن قولدانۋعا, قىلمىستىق جاۋاپتىلىققا تارتۋعا بولمايدى دەلىنگەن.
سونداي-اق ۋاكىل ءوزىنىڭ لاۋازىمدىق مىندەتتەرىن ورىنداۋعا بايلانىستى وزىنە بەلگىلى بولعان ءمان-جايلار تۋرالى كۋا رەتىندە جاۋاپ الۋعا جاتپايدى.
وعان ءوز قىزمەتىن جۇزەگە اسىرۋ كەزىندە رەسپۋبليكا زاڭدارىنا سايكەس قاۋىپسىزدىكتى قامتاماسىز ەتۋ قۇقىعىنا كەپىلدىك بەرىلەدى.
ۋاكىلدى قازاقستان پرەزيدەنتىنىڭ ۇسىنۋى بويىنشا قر پارلامەنتى سەناتى بەس جىل مەرزىمگە قىزمەتكە سايلايدى.
ۋاكىل قىزمەتىنە سايلاناتىن ادام كەلەسى تالاپتارعا جاۋاپ بەرۋگە ءتيىس:
- قر ازاماتتىعىنا يە بولۋ جانە ونىڭ اۋماعىندا سوڭعى ون جىل بويى تۇراقتى تۇرۋ;
- جوعارى ءبىلىم;
- ادامنىڭ جانە ازاماتتىڭ قۇقىقتارى مەن بوستاندىقتارىن قورعاۋ بويىنشا كەمىندە بەس جىل جۇمىس تاجىريبەسىنىڭ بولۋى;
- 30 جاستان كىشى ەمەس;
- مەملەكەتتىك ءتىلدى مەڭگەرۋ;
- ءىس-ارەكەتكە قابىلەتتىلىك.
قىزمەتكە كىرىسكەن كەزدە ۋاكىل انت بەرەدى.
زاڭ جوباسىندا ۋاكىلدىڭ ساياسي قىزمەتپەن اينالىسۋعا قۇقىعى جوق دەپ كوزدەلگەن. ءوز وكىلەتتىگىن جۇزەگە اسىرۋ ۋاقىتىندا ول ساياسي پارتياعا مۇشەلىگىن توقتاتا تۇرادى.
بۇدان باسقا, ول مەملەكەتتىك قىزمەتتە بولۋعا, كاسىپكەرلىك قىزمەتپەن اينالىسۋعا, ۇيىمدىق-قۇقىقتىق نىسانىنا قاراماستان كوممەرتسيالىق ۇيىمدى, سونداي-اق وقىتۋشىلىق, عىلىمي نە وزگە دە شىعارماشىلىق قىزمەتتى قوسپاعاندا, باسقا دا اقى تولەنەتىن قىزمەتتى باسقارۋعا قاتىسا المايدى.
ول سونداي-اق وكىلدى ورگاننىڭ دەپۋتاتى بولا المايدى.
قۇجات 15 شىلدەگە دەيىن اشىق نقا سايتىندا جاريا تالقىلاۋ ءۇشىن ورنالاستىرىلعان.
