وبلىس اكىمى نۇرجان نۇرجىگىتوۆ اۋدان اكتيۆىنە جاڭا اكىمدى تانىستىرىپ, جۇمىسىنا ساتتىلىك تىلەپ, بىرقاتار تاپسىرمالار جۇكتەدى.
ايماق باسشىسى اۋداننىڭ الەۋەتىن ءتيمدى پايدالانىپ, الەۋمەتتىك-ەكونوميكالىق كورسەتكىشتەردى ارتتىرۋ, ينۆەستيتسيا تارتۋ, جاڭا جوبالاردى جۇزەگە اسىرۋ, جۇمىس ورىندارىن قۇرۋ, كاسىپكەرلىك, اۋىل شارۋاشىلىعى جانە باسقا دا سالالاردى تيىسىنشە دامىتۋدىڭ ماڭىزدىلىعىن اتاپ ءوتتى.
سونىمەن قاتار حالىقتىڭ تابىسىن ارتتىرۋ, تۇرمىسىن جاقسارتۋ, كەرى بايلانىستى نىعايتۋ, وزەكتى ماسەلەلەردى بارىنشا جەدەل شەشۋگە دەن قويۋ, قوعامدىق-ساياسي احۋالدىڭ تۇراقتىلىعىن قامتاماسىز ەتۋ جولىندا جۇيەلى جۇمىس جۇرگىزۋ كەرەكتىگىن ايتىپ, ول بويىنشا اۋداننىڭ جاڭا اكىمىنە ناقتى تاپسىرمالار بەردى.
ءوز كەزەگىندە جالعاس مۇرتازا ارتىلعان سەنىمدى اقتاۋعا بار كۇش-جىگەرىن جۇمسايتىنىن جەتكىزدى.
ايتا كەتەيىك, جالعاس ءاليجان ۇلى - حالىق جازۋشىسى شەرحان مۇرتازانىڭ نەمەرە ءىنىسى.
1988 جىلى جامبىل وبلىسى جۋالى اۋدانىندا تۋعان. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىن «مەملەكەتتىك جانە جەرگىلىكتى باسقارۋ», م.ح.دۋلاتي اتىنداعى تاراز وڭىرلىك ۋنيۆەرسيتەتىن «قۇرىلىس ماتەريالدارىن, بۇيىمدارىن جانە كونسترۋكتسيالارىن ءوندىرۋ» ماماندىعى بويىنشا بىتىرگەن.
ەڭبەك جولىن 2010 جىلى قۇرىلىس جانە تۇرعىن ءۇي-كومممۋنالدىق شارۋاشىلىق ىستەرى اگەنتتىگىندە ساراپشى بولىپ باستاعان.
ءار جىلدارى قازاقستان رەسپۋبليكاسى قۇرىلىس جانە تۇرعىن ءۇي-كومممۋنالدىق شارۋاشىلىق ىستەرى اگەنتتىگى قارجىلىق جۇمىس جانە بيۋدجەتتىك جوسپارلاۋ دەپارتامەنتىنىڭ ساراپشىسى, باس ساراپشىسى, جامبىل وبلىسى اكىمى اپپاراتىنىڭ ۇيىمداستىرۋ-ينسپەكتورلىق بولىمىندەگى وبلىس اكىمىنىڭ باس ينسپەكتورى, جامبىل اۋدانى اكىمىنىڭ ورىنباسارى, وبلىس اكىمى اپپاراتىنىڭ وڭىرلىك باقىلاۋ جانە ۇيىمداستىرۋ-ينسپەكتورلىق جۇمىسى ءبولىمىنىڭ باسشىسى قىزمەتتەرىن اتقارعان.
2021 جىلدىڭ ءساۋىر ايىنان باستاپ جامبىل وبلىسى اكىمدىگىنىڭ تۋريزم باسقارماسىنىڭ باسشىسى لاۋازىمىندا ەڭبەك ەتىپ كەلدى.
