كاسىپقوي بوكس • 26 ماۋسىم، 2022

GGG – CANELO: ەر كەزەگى ۇشكە دەيىن...

1209 رەت كورسەتىلدى

قازاقتىڭ كوك شاپانىن جاھانعا تانىتقان گەننادي گولوۆكين 2006 جىلى كاسىپقوي بوكسشى رەتىندەگى مانسابىن باستاعاندا («Universum Box-Promotion» ۇيىمىندا) زاۋ بيىكتەردى باعىندىرۋعا ۇمتىلعانى ايتپاسا دا تۇسىنىكتى. الايدا پروموۋتەرلىك ۇيىم باسشىلارى ۋادەنى ءۇيىپ-توككەنىمەن، قازاق وعلانىن كىل «قاپشىقتارمەن» شىعاردى. وسىلايشا، گەننادي گولوۆكين بىرنەشە جىلىن تەككە وتكىزدى. كەيىن المانيالىق ۇيىمنان كەتىپ، مۇحيت استى.

HBO-داعى العاشقى ايقاس

مۇحيت اسقاننان كەيىن قازاق بوكس­شىسىن HBO نەمەسە Showtime تەلەارناسىنان كورگىسى كەلگەندەردىڭ قاراسى كوپ بولدى. ويتكەنى ءدال سول كەزەڭدە اتالعان تەلەارنالاردىڭ ءباسى باسىم ەدى. پروموۋتەر توم لەففلەردىڭ قاسىنان تابىلعان قازاق سايىپقىرانى اقش رىنوگىنداعى HBO تەلەارناسىندا جۇدىرىقتاسۋعا مۇمكىندىك الدى. 2012 جىلدىڭ كۇرەڭ كۇزىندە گەننادي گولوۆكيننىڭ امەريكالىق تەلەارناداعى دەبيۋتتىك جەكپە-جەگى جوعارى دەڭگەيدە ءوتتى. پولشالىق گجەگوج پروكسانى بىرنەشە مارتە رينگ تورىنە سۇلق تۇسىرگەن ساڭلاق ءوزىنىڭ شىن مىقتى ەكەنىن دالەلدەپ، امەريكاداعى كاسىپقوي بوكس فاناتتارىنىڭ سۇيىكتىسىنە اينالدى.

گابريەل روسادو، نوبۋحيرو يسيدو، مەتتيۋ ماكلين، وسۋمان اداما، دەنيەل گيل، مارتين ميۋررەي، ۆيللي مونرو، داۆيد لەمە... جالعاساق ءتىزىم جالعاسا بەرەدى. بۇلاردىڭ ءبارى دە گولوۆكين جۇدىرىعىنىڭ سالماعىن سەزىندى. مارتين ميۋررەي 11 راۋند شىداس بەردى، دەنيەل دجەيكوبس گولوۆكينمەن 12 راۋند قولعاپ تۇيىستىرگەن العاشقى بوكسشى اتاندى دەمەسەك، ءبارى دە جەڭىلىستىڭ كەرمەك ءدامىن تاتتى. گەنانىڭ رەكوردتى سەرياسى ارمەن قاراي جالعاستى.

قازاقستاندىق بوكسشى شارشى الاڭدا ميگەل كوتتو، ساۋل الۆارەس سەكىلدى الەم تانيتىن جۇلدىزدارمەن قولعاپ تۇيىستىرگىسى كەلدى. ودان بۇرىن WBC تۇجىرىمى بويىنشا ورتا سالماقتاعى الەم چەمپيونى، ارگەنتينالىق سەرحيو مارتينەسپەن جۇدىرىقتاسۋعا نيەتتەندى. الايدا سەرحيو ماراۆيللا مارتينەس ميگەل كوتتونى قارسىلاس رەتىندە تاڭداپ، پۋەرتو-ريكولىق وعلاننان وڭباي جەڭىلدى. ارالىق سالماقتا قولعاپ تۇيىستىرۋگە ماشىقتانىپ العان ميگەل كوتتو قارسىلاس رەتىندە مەكسيكالىق جۇلدىز ساۋل الۆارەسپەن قولعاپ تۇيىستىرگەندى ءجون دەپ تاپتى. قارسىلاسىنا ۇپاي سانىمەن ەسە جىبەردى. كەيىننەن گولوۆكين الۆارەستىڭ مىندەتتى قارسىلاسى اتاندى. الايدا ۋاقىتتى سوزۋعا كوشكەن مەكسيكالىق بوكسشى بىرەر ايدان سوڭ چەمپيوندىق بەلدىكتى بوساتىپ بەرە سالدى. ناتيجەسىندە، گەننادي گولوۆكين ءۇش تۇجىرىم بويىنشا الەم چەمپيونى اتاعىنا قول جەتكىزدى. الايدا گولوۆكينگە كەرەگى بۇل ەمەس ەدى. ويتكەنى ول شىن مىقتى بوكسشىمەن ءارى كاسىپقوي بوكس الەمىنىڭ جارىق جۇلدىزىمەن قولعاپ تۇيىستىرمەگەن بولاتىن. سول ءۇشىن دە «كانەلومەن» شارشى الاڭدى ءبولىسۋدىڭ ماڭىزى زور ەدى. ال مەكسيكالىق تەك 2017 جىلى عانا شارشى الاڭعا شىعۋعا كەلىستى. ءبىرىنشى شايقاستا قازاقستاندىق بوكسشى باسىم تۇسكەنىمەن، تورەشىلەر ەكى بوكسشىنى «تەڭ ءتۇسىردى». ەكەۋارا ەكىنشى كەزدەسۋ تاعى دا ۋاقتىلى وتپەدى. «كانەلو». كلەنبۋتەرول. دوپينگ داۋى. ۋاقىت ءوتتى. گەننادي گولوۆكين ۆانەس مارتيراسياندى جەڭگەننەن كەيىن ەكى بوكسشى شارشى الاڭدا تاعى كەزدەستى. تورەشىلەردىڭ باسىم داۋسىمەن مەكسيكالىق جەڭىسكە لايىق دەپ تانىلدى.

كاسىپقوي بوكس – بيزنەس. ءوزىن بيزنەس يمپەرياعا اينالدىرا بىلگەن تاڭداۋلى تالانتتاردىڭ ءبىرى، مەكسيكا ۇلى ساۋل الۆارەستى مۇحيتتىڭ ارعى بەتىندەگىلەر كاسىپقوي بوكس الەمىنىڭ جارىق جۇلدىزى رەتىندە ءاۋ باستا مويىنداعانىمەن، قازاقستاندىقتاردىڭ ءبىرازى (پسەۆدوفاناتتار دا بار) «كانەلونى» گولوۆكين ارقىلى تانىدى دەسەك، ەش ارتىق ايتپاعان بولارمىز.

«ايتتىم ءبىتتى، اتقان وق ورالمايدى» دەگەن ۇستانىمدى ۇستاناتىن، شارشى الاڭدا كىممەن قولعاپ تۇيىستىرگىسى كەلسە، سونىمەن جۇدىرىقتاساتىن «كانەلو» دەگەن كىم ەدى؟! ول قالايشا الەمدەگى ەڭ تانىمال كاسىپقوي بوكسشىعا اينالدى؟ ءۇڭىلىپ كورەيىك.

ون بەسىندە «وتقا ءتۇستى»

سانتو الۆارەس پەن اننو ماريا بارراگاننىڭ وتباسىندا سەگىز بالا دۇنيەگە كەلدى. وتباسىنىڭ ءسۇت كەنجەسى وسى ساۋل بولاتىن. ول كەزدە سانتو اكەي ءساۋلدىڭ اتى الىسقا كەتەتىنىن ەش بىلگەن جوق. 1990 جىلدىڭ 18 شىلدەسىندە دۇنيەگە كەلگەن ساۋل الۆارەس بالا كۇنىنىڭ از عانا بولىگىن ءوزى تۋعان گۆادالاحار قالاسىندا وتكىزگەنىمەن، ارادا از جىل وتكەن سوڭ وتباسى حۋاناكاتلان شاھارىنا قونىس اۋداردى. ول اۋەلدە اتقا ءمىنىپ سەرۋەندەگەندى ۇناتتى. قازاقتارمەن باستى ۇقساستىعى دا سول عانا شىعار. سول كەزدە ساۋل بوكس تۋرالى مۇلدە ويلامايتىن. اعالارى بوكس سەكتسياسىنا جازىلسا دا، «كانەلو» باس اۋىرتپاعان ەدى. تەك 13 جاسقا تولعاندا بوكسقا قاتىسۋ تۋرالى ويلانا باستادى. ويتكەنى زامانداس­تارى سارى-قىزعىلت شاشىنان تارتىپ، مازاقتاي باستاعان. ۇرىستا تۇرىس جوق. ساۋل بوكسپەن شىنداپ شۇعىلداندى. بويىن ىزا مەن كەك جاۋلاپ العان. ءوزىن مازاق قىلعان زامانداستارىن ورنىنا قويعىسى كەلەدى. سول كەزدە باپكەرلەر حوسە مەن ەددي رەينوسو سارى بالاقايدى قاناتىنىڭ استىنا الدى. ونى قاناتتىعى قاقتىرماي، تۇمسىقتىعى شوقىتتىرماي، ماپەلەدى.

ول ون ءتورت جاسىندا بىرنەشە جارىستا توپ جاردى. ءتىپتى جاسوسپىرىمدەر اراسىنداعى ەل چەمپيوناتىندا كۇمىس جۇلدەنى موينىنا تاقتى. كوپ ويلانعان جوق، ون بەسىندە كاسىپقوي بوكسقا بەت بۇرۋ تۋرالى شۇعىل شەشىم قابىلدادى. ون بەس جاسىندا العاش رەت كاسىپقوي رينگكە كوتەرىلگەن وعلان ءوزى سەكىلدى تاجىريبەسى كەمشىن ەكى بوكسشىنى ۋاقىتىنان بۇرىن ۇتىپ، جەڭىستىڭ ءتاتتى ءدامىن تاتتى. ءۇشىنشى شايقاسىندا ميگەل ۆاسكەس دەگەن وتان­داسىن تورەشىلەردىڭ باسىم داۋسىمەن جەڭگەن ەدى.

«قاپشىقتاردى» قيراتا جەڭدى

ون بەسىندە كاسىبي مانسابىن باستاعان بالا بوكسشىنىڭ مىقتىلارمەن جۇدىرىقتاسۋى مۇلدە مۇمكىن ەمەستىگى تۇسىنىكتى ەدى عوي. ويتكەنى رەيتينگتە كوتەرىلۋى كەرەك. سول ءۇشىن دە ىڭعايلى قارسىلاستار تاڭدالادى. ول اۋەسقوي بوكستا الەم چەمپيونى اتانعان ەمەس، وليمپيادا ويىندارى دەگەننىڭ نە ەكەنىن دە بىلمەيدى. سوندىقتان دا رەيتينگتە جوعارىلاۋى ءۇشىن ايتارلىقتاي ۋاقىت كەرەك ەكەنى ايداي اقيقات. ال ۋاقىت «كانەلودا» جەتكىلىكتى بولاتىن. سودان دا بولسا كەرەك، جيىرما شايقاس بويى قاتارداعى «قاپشىقتارمەن» قولعاپ ءتۇيىستىردى. بەسىنشى كەزدەسۋىندە حورحە حۋارەس دەگەن وتانداسىمەن تەڭ ءتۇستى دەمەسەڭىز، قالعانىنىڭ بارلىعىندا مەرەيى ۇستەم بولعان. تەك...

تەك، تورەشىلەردىڭ ەكىۇشتى شەشىمىمەن جەڭىلگەنىنە كوڭىلى تولماعان ميگەل ۆاسكەس كۇندەردىڭ كۇنىندە وتانداسىمەن ەكىنشى رەت جۇدىرىقتاسقىسى كەلەتىنىن مالىمدەدى. بۇل 2008 جىل بولاتىن. 18 جاسقا تولۋىنا جيىرما كۇن قالعاندا «كانەلو» قارسىلاسىنىڭ ءۇنىن ء«وشىردى». راس، نوكاۋتقا تۇسىرە العان جوق. بىراق ۆاسكەستى سوققىنىڭ استىنا الىپ، جارقىن مانەردە جەڭىسكە جەتتى. وسىلايشا، ەكەۋارا داۋعا نۇكتە قويدى.

كوتتونىڭ ءىنىسى «كانەلونى» قۇلاتا جازدادى

جىل وتكەن سايىن شەبەرلىگى تولىسا تۇسكەن ساۋل الۆارەستى كومانداسى 2010 جىلى سالىستىرمالى تۇردە الساق، مىقتى قارسىلاسپەن شىعارۋعا بەل بۋدى. وسىلايشا، تاۋەكەلگە باردى.

پۋەرتو-ريكو مەن مەكسيكا بوكسشى­لارىنىڭ اراسىنداعى جەكپە-جەك قاي كەزدە دە تارتىستى وتەتىن. بۇل جولى ول ميگەل انحەل كوتتونىڭ ءىنىسى حوسە كوتتومەن قولعاپ ءتۇيىستىردى. ەكى بوكس­شى ءبىرىنشى جارتىلاي ورتا سالماق دارەجەسىندەگى بۇكىلالەمدىك بوكس كەڭەسىنىڭ كۇمىس بەلدىگىن ساراپقا سالدى. ارينە، ەكىنشى دارەجەلى بەلبەۋ. الايدا جيىرما جاسار وعلان ءۇشىن شايقاستىڭ ماڭىزى زور. ءبىرىنشى راۋندتى قارقىندى باستاعان كوتتو «كانەلونى» قۇلاتا جازداعان بولاتىن. ارقان بويى كەرىلگەن رينگتى جاعالاي ءجۇرىپ كۇنەلتكەن «كانەلو» سويقان سوققى وتكىزىپ العانىنا قاراماستان شىدادى. تاعى بىرنەشە سوققى وتكىزسە دە قۇلاعان جوق. ناتيجەسىندە، قارسىلاسىن تەحنيكالىق نوكاۋتپەن جەڭدى. ودان كەيىن الۆارەستى ەشبىر بوكسشى تەڭسەلتە العان جوق. «جارايسىڭ، ساۋل!» دەگەنبىز سول كەزدە جيىرما جاسار بوكسشىنىڭ توزىمدىلىگىنە تامسانا قول سوعىپ.

بۇدان كەيىن دە «كانەلو» جەڭىستى جو­رىعىن ساتىمەن جالعاستىرا ءتۇستى. 2013 جىلى ايگىلى وستين تراۋتتى تورەشىلەردىڭ بىرجاقتى شەشىمىمەن جەڭگەننەن كەيىن مەكسيكا ۇلى ءداۋىردىڭ دارابوز بوكس­شىسى، اتاقتى فلويد مەيۆەزەرمەن جۇدىرىقتاسۋ مۇمكىندىگىنە يە بولدى. وعان دەيىن بۇكىلالەمدىك بوكس كەڭەسىنىڭ تولىققاندى چەمپيونى اتاعىن يەلەنگەن جيرەن سارى جىگىت 23 جاسىندا داڭقتى اقش وعلانىن ۇتاتىنىنا سەنىمدى بولدى. وزىنە قاتتى سەنگەندىكتەن بىرنەشە مارتە مالىمدەمە جاساپ تا ۇلگەردى. بىراق فلويدقا جۇدىرىعىن كىم الا جۇگىرمەدى دەسەڭىزشى. ءبارى دە كەيىن سازايىن تارتتى عوي.

مەيۆەزەر «كانەلونى» بوكس مەكتەبىنە «اپاردى»

ەرتەرەكتە «كانەلونىڭ» پروموۋتەرى وسكار دە لا حويانى ساباسىنا تۇسىرگەن فلويد مەيۆەزەر بۇل جولى ءساۋلدى جەڭەتىنىنە كۇمانى بولعان جوق. «بۇرىن كوكەڭدى جەڭسەم، ەندى سەنى سابايمىن، بالا!» دەدى ول ءباسپاسوز ءماسليحاتتارىنىڭ بىرىندە سۇق ساۋساعىن شوشايتا سويلەپ. فلويد سوزىندە تۇردى. جيىرما ءۇش جاسار وعلاندى قارسىلاس كورگەن جوق.

ءيا، مەيۆەزەر 12 راۋند بويى ساۋل الۆارەستى سوققىنىڭ استىنا الدى. نەگىزىندە شابۋىلدىڭ بارلىعان دا «كانەلو» باستايدى. فلويد ونىڭ جويقىن سوققىلارىن وتكىزىپ جىبەرەدى دە، ارقان بويى كەرىلگەن رينگتى پانالاپ تۇرىپ، بىرنەشە ءدال سوققىسىن تيگىزەدى. رينگ ورتاسىندا دا جاعداي ءدال سولاي. الىس قاشىقتىقتا دا، جاقىن جانە ورتا قاشىقتىقتا دا جاعداي وزگەرگەن جوق. ءساۋلدىڭ شابۋىلدارىن فلويد بەسكە وقىپ قويدى. ال الۆا­رەستىڭ بۇرىشىندا دا، وزىندە دە «ۆ» جوسپارى بولماعانى بىردەن سەزىلدى. قىسقاسى، ءساۋلدىڭ سوق­قى­لارى اۋا قارمادى، دەمەسەڭىز، مەي­ۆەزەرگە تۇك تە دارىعان جوق. الايدا تورەشىلەردىڭ ەكەۋى 117:111، 116:112 ەسەبىمەن مەيۆەزەردىڭ جەڭىسىن مو­يىن­داسا، سي دجەي روسس دەگەن ازامات 114:114 ەسەبىن تىركەپ، جانكۇيەرلەر مەن بوكس ما­ماندارىن ەسىنەن تاندىرا جازدادى.

بۇل كەزدەسۋدە الۆارەستىڭ ەشبىر راۋندتا جەڭىسكە جەتپەگەنىن ەسكەرسەك، تورەشىلەردىڭ ءبىرى وعان ءۇش، ەكىنشىسى ءتورت راۋندتى «تارتۋ» ەتۋىنىڭ ءوزى ەرىكسىز ەزۋگە كۇلكى ۇيىرگەن ەدى. ءبىر سوزبەن ايتقاندا، «كانەلودان» جۇلدىز جاساۋ پروتسەسى ءدال وسى شايقاستا باستالىپ كەتە جازداعانى داۋسىز. ونى كۋبالىق ەريسلاندي لارامەن وتكەن جەكپە-جەكتە دە ايقىن بايقادىق. بۇل كەزدەسۋدە بوستاندىق ارالىنىڭ سپورتشىسى مىقتى كورىنگەنىمەن، تورەشىلەر 2:1 ەسەبىمەن جەڭىستى الۆارەستىڭ ەنشىسىنە جازىپ بەردى. وسىدان كەيىن-اق «كانەلونى» تەك نوكاۋتپەن جەڭۋگە بولاتىنى تايعا تاڭبا باسقانداي بەلگىلى بولا ءتۇستى. الايدا جيرەن سارىنى سۇلق ءتۇسىرۋ ەشكىمنىڭ قولىنان كەلەر ەمەس. ويتكەنى ول قارسىلاس جۇمساعان سوققىنى قابىلداي بىلەدى. توزىمدىلىگىمەن تالاي مىقتى بوكسشىنى تاڭ-تاماشا قىلعانىن كوز كوردى.

ءتورت سالماقتا توپ جارعان ساڭلاق

ول ورتا سالماققا اۋىسقاندا WBC تۇجىرىمى بويىنشا الەم چەمپيونى اتاعىنا تالاستى. جوعارىدا جازعانىمىزداي ايگىلى ميگەل كوتتونى تورەشىلەردىڭ بىرجاقتى شەشىمىمەن جەڭدى. ءدال وسى 2015 جىلى قازاقستاندىق گەننادي گولوۆكين ونىڭ مىندەتتى قارسىلاسى اتانعانىنا قاراماستان، الۆارەس بابىندا جۇرگەن گولوۆكينمەن قولعاپ تۇيىستىرگەندى قۇپ كورمەدى. ءبىر جاعى جەڭىلىپ قالۋ قاۋپى باسىم ەكەنىن سەزدى. ەكىنشىدەن، مۇنداي ۇلكەن شايقاستى جانكۇيەرلەرگە ابدەن كۇتتىرىپ بارىپ وتكىزۋدىڭ ماڭىزى زور ەكەنىن ءتۇسىندى. سوندا شايقاس بارىنشا تابىستى بولادى. ءسويتتى دە ءامىر حان، ليام سميت، حۋليو سەزار چاۆەس كىشىمەن قولعاپ ءتۇيىستىردى. سودان كەيىن 2017 جانە 2018 جىلدارى گولوۆكينمەن ەكى رەت شارشى الاڭدا كەزدەستى. العاشقىسىندا تورەشىلەر ءساۋلدى قازاق وعلانىمەن «تەڭ تۇسىرسە»، ەكىنشى جەكپە-جەكتە مەكسيكا ۇلى جەڭىس تويىن تويلاعانىن ءبارى بىلەدى. قالاي دەسەك تە، اتالعان كەزدەسۋلەر تاريحقا اينالىپ كەتتى.

كەيىن روككي فيلدينگ، دەنيەل دجەيكوبستى ۇتقان سوڭ ول ەكىنشى ورتا سالماقتاعى چەمپيونداردى جانە جارتىلاي اۋىر سالماقتاعى الەم چەمپيونى سەرگەي كوۆالەۆتى جەڭىپ، ءتورت سالماقتا الەم چەمپيونى اتانىپ، تاريحقا اتىن التىن ارىپتەرمەن جازدى. بۇگىندە الۆارەس ەكىنشى ورتا سالماقتا الەمنىڭ ءابسوليۋتتى چەمپيونى سانالادى.

سپاررينگتە سىر اڭدىعان ساۋل

وتانداسىمىز گەننادي گولوۆكين مەن مەكسيكالىق ساۋل الۆارەس ارا­سىن­داعى العاشقى جەكپە-جەك نەگە كەش ۇيىمداستىرىلدى؟ وسى ساۋال تالايدى تولعاندىراتىنى داۋسىز. مۇنىڭ سەبەبىن 2011 جىلى وتكەن ەكى بوكسشىنىڭ اراسىنداعى سپاررينگپەن بايلانىستىراتىندار از ەمەس.

ول ۋاقىتتا گەننادي گولوۆكيندى مەكسي­كالىق باپكەر ابەل سانچەس جاتتىق­تىراتىن. كۇندەردىڭ كۇنىندە سانچەستىڭ لاگەرىنە الۆارەس كەلەدى. «بيگ بەردە» قازاقستاندىق بىلعارى قولعاپ شەبەرى مەن مەكسيكا ۇلى التى راۋندتىق سپاررينگ وتكىزەدى. اتالعان بارلاۋ كەزدەسۋىن كورگەن The Ring جۋرنالىنىڭ رەداكتورى دۋگلاس فيشەر ويىن بىلاي ساباقتايدى.

«2011 جىلدىڭ مامىراجاي مامىر ايى ءالى ەستە. گەننادي گولوۆكين مەن ساۋل الۆارەس شارشى الاڭدا التى راۋندتىق سپاررينگ وتكىزدى. اتاۋى جاي عانا سپاررينگ بولعانىمەن، مەكسيكالىق بوكسشى بارىن سالىپ باقتى. بىرنەشە جويقىن سوققىسىن دارىتتى. الايدا ونىڭ مىعىم سوققىلارى گولوۆكيننىڭ ەزۋىندە كۇلكى ءۇيىردى. ال بۇرىشتاردى قيىپ، قارسىلاسىن تىقسىرتقان گەنناديدىڭ جويقىن سوققىلارى الۆارەستى ابدەن تيتىقتاتتى. بەت-ءجۇزى ءورت شالعانداي قىزارىپ كەتتى. ءبىر سوزبەن ايتقاندا، گەننادي گولوۆكين كۇشىن ساقتاي ءجۇرىپ جۇدىرىقتاسقاننىڭ وزىندە دەسى دە، سەسى دە باسىم ەكەنى اڭعارىلىپ تۇردى. 29 جاسار قازاقستاندىق بوكسشى وسىلايشا، ءساۋلدى ويلاندىرىپ تاستاعان بولاتىن»، دەيدى بەلگىلى جۋرنالدىڭ باس ساراشىسى. دۋگلاس فيشەردىڭ سوزىنەن تۇسىنگەنىمىز، الۆارەس شارشى الاڭدا بارىن سالۋ ارقىلى ءوزىنىڭ شاماسىن تەكسەرۋگە دەن قويعانى ايقىن اڭعارىلادى. ول بولاشاق قارسىلاسىنىڭ الەۋەتىن وسىلايشا 2011 جىلى بارلاپ كوردى. مۇنداي قادامنىڭ ءوزى ساۋل الۆارەستىڭ بولاشاق قارسىلاسىن زەرتتەۋگە اۋەلدەن ازىرلەنگەنىن بايقاتا تۇسەتىنى داۋسىز.

جالپى، ساۋل الۆارەس سپاررينگ قار­سىلاستاردى ىزدەپ، باسقا بوكسشى­لاردىڭ جاتتىعۋ لاگەرىنە بارمايتىنى ەكى باستان ءمالىم. كاسىپقوي بوكس الەمىنىڭ جارىق جۇلدىزىنىڭ لاگەرىنە جۇپتاسىپ جۇدىرىقتاسۋعا نيەتتى بىلعارى قولعاپ شەبەرلەرىنىڭ وزدەرى اعىلىپ كەلىپ جاتادى. ارينە، ءار جەكپە-جەكتەگى قارسىلاستارىنىڭ الەۋەتىنە قاراي تاڭدايدى ولاردى. مۇنىڭ ءوزى كوپ جايتتان سىر شەرتە تۇسسە كەرەك. الايدا «بيگ بەرگە» بارۋ ارقىلى ول بەلگىلى ءبىر دەڭگەيدە قارسىلاسىنىڭ قارىمىن بايقاپ كورگىسى كەلدى. ويتكەنى ءدال سول ۋاقىتتا الۆارەستىڭ ءبىرىنشى ورتا سالماقتىڭ ءليميتىن جاساي الماي جۇرگەنى تۋرالى اقپارات تاراي باستاعان. سوعان قاراپ-اق ونىڭ ارالىق سالماقتا جۇرە بەرمەي، الداعى ۋاقىتتا ورتا سالماققا اۋىساتىنى بەلگىلى بولعان ەدى. قىسقاسى، اتالعان بارلاۋ الۆارەستى ابدەن ويلاندىرعانى داۋسىز. 29 جاسار گولوۆكينمەن جاقىن ارادا قولعاپ ءتۇيىستىرۋ ءتيىمسىز ەكەنىن مەكسيكالىق بوكس­شى سول كەزدە انىق ءتۇسىندى.

اتالعان سپاررينگتى تاماشا­لا­عان­داردىڭ ءبىرى رەسەيلىك كاسىپقوي بوكسشى سەر­گەي كوۆالەۆ تە ۋاقىتىندا ءوز ويىمەن بولىسكەن ەدى.

«سپاررينگتەگى جاعداي باسقاشا بولاتىنى بەلگىلى عوي. ساۋل الۆارەستى جەرگە ۇرۋعا بولمايدى. ول بارىن سالىپ باقتى. ءوزىن جاقسى جاعىنان كورسەتە بىلگەنىنە ەشقانداي كۇمان جوق. ال گەننادي گولوۆكين شارشى الاڭدا بار مۇمكىندىگىن كورسەتكەن جوق. ول قاجەت كەزدە ءوزىن توقتاتىپ وتىرعانىن ايقىن بايقادىق. الايدا شارشى الاڭدا ءوز الەۋەتىنىڭ جارتىسىن عانا قولدانعان گەننادي گولوۆكيننىڭ الۆارەس ءۇشىن الىنباس قامال ەكەنىن ءبارىمىز سەزىندىك. كوزگە انىق كورىنىپ تۇردى. راسىندا دا رينگتە مۇمكىندىگى مەن تاجىريبەسىنىڭ جارتىسىن عانا كورسەتكەن گولوۆكين الۆارەستەن باسىم ءتۇستى. وسىلايشا، قازاقستاندىق بىلعارى قولعاپ شەبەرى ءوزىنىڭ شىن مىقتى ەكەنىن كورسەتتى.

راس، 21 جاسار الۆارەس گولوۆكينگە بىرنەشە سوققىسىن دارىتتى. الايدا گەننادي گولوۆكين قارسىلاسىن بىرنەشە مارتە شايقاپ تاستادى. ونىڭ ەكىنشى راۋندتا جۇمساعان حۋك سوققىسىن مەكسيكالىق قارسىلاسى ءسوزسىز سەزىندى. سونداي-اق باۋىر تۇسىنا جۇمساعان بىرنەشە سوققىسىنان كەيىن دە ساۋل الۆارەس قاشقاقتاي بەردى. سوڭعى ەكى راۋندتا ءساۋلدىڭ قاتتى شارشاعانى بايقالدى. ايتكەنمەن ول سوڭعى كۇشىن جيناپ، گەنانىڭ قولىن بايلاپ ءجۇرىپ، سپاررينگتى سوڭىنا دەيىن جەتكىزدى. بۇل ەكى بوكسشىنى شارشى الاڭدا كەزدەستىرۋ كەرەك. جانكۇيەرلەر ءۇشىن تاماشا شايقاس بولادى. ءبارىمىز گەننادي گولوۆكين مەن ساۋل الۆارەس اراسىنداعى جەكپە-جەكتى كورگىمىز كەلەدى»، دەدى سەرگەي كوۆالەۆ ۋاقىتىندا ءوز پىكىرىن ءبىلدىرىپ.

بۇل پىكىرلەردەن قانداي قورىتىندى شىعارۋعا بولادى؟ البەتتە، الۆارەستىڭ كومانداسى گولوۆكيننىڭ بىرنەشە جىل جوعالتقانىن كۇتتى. بۇل كاسىپقوي بوكس الەمىندە قالىپتاسقان ءۇردىس ەكەنى بارشاعا ءمالىم. مىقتى بوكسشىنىڭ جاسى شاۋ تارتا باستاعاندا جارقىراپ شىققان جۇلدىزدار ونىمەن شارشى الاڭدى بولىسۋگە كەلىسەدى. ساۋل دە ءسويتتى. ۇرىمتال ءساتتى ۇتىمدى پايدالانعىسى كەلدى. الايدا ءبىرىنشى شايقاستا گولوۆكيننىڭ فيزيكالىق الەۋەتى مەن تەحنيكالىق شەبەرلىگى ءالى دە جوعالماعانىن كوز كوردى. ال سەرگەي كوۆالەۆ سول الۆارەستەن نوكاۋتپەن جەڭىلىس تاپتى.

جاقىندا عانا رەسەيلىك دميتري بيۆولدان جەڭىلگەن ساۋل الۆارەس قىركۇيەكتە گەننادي گولوۆكينمەن ءۇشىنشى رەت قولعاپ تۇيىستىرمەك. بۇل كەزدەسۋدى كاسىپقوي بوكستىڭ شىن جانكۇيەرلەرى مەن مامانداردىڭ اسىعا كۇتىپ جۇرگەنى داۋسىز. ەگەر ءۇشىنشى شايقاستا قازاق وعلانى جەڭىسكە جەتسە، ەكى بوكسشى ءتورتىنشى رەت شارشى الاڭدا كەزدەسۋى ىقتيمال. ۋاقىتىندا حۋان مانۋەل ماركەس پەن مەنني پاكياو شارشى الاڭدا ءتورت رەت جۇدىرىقتاسقان ەدى عوي. بۇگىنگى تاڭدا كاسىپقوي بوكستاعى ەڭ كاسسالىق جەكپە-جەك الۆارەس – گولوۆكين كەزدەسۋى ەكەنى داۋسىز. كاسىپقوي بوكس – بيزنەس. بوكسشىلاردان ءبارىن كۇتۋگە بولادى.

P.S. ءيا، ساۋل الۆارەس كاسىبي مانسابىندا ەكى رەت جەڭىلىستىڭ اششى ءدامىن تاتتى. مامىر ايىندا جارتىلاي اۋىر سالماق دارەجەسىندەگى WBA تۇجىرىمى بو­يىنشا الەم چەمپيونى، رەسەيلىك دميتري بيۆول مەكسيكالىقتىڭ مىسىن باستى. ول ساۋلمەن ينفايتقا (قويان-قولتىق ۇرىس) كوپ بارعان جوق. كاسىپقوي بوكسشى بولعانىنا قاراماستان، اۋەسقوي رينگتەگى ءستيلىن ارالاستىرا وتىرىپ جۇدىرىقتاستى. ال ينفايتتا قالعان ساتتەردە ساۋاتتى قورعاندى. قورعانىستان كەيىن شابۋىلدادى، ناتيجەلى شابۋىلدان كەيىن قاۋىپتى ايماقتان لەزدە كەتىپ قالىپ جاتتى. بۇل – شەبەرلىك.

الۆارەس وسى جەڭىلىستەن كەيىن دە كاسىپقوي بوكس الەمىنىڭ جارقىن جۇلدىزى بولىپ قالا بەرەدى. ويتكەنى اقش-تاعى كاسىپقوي بوكستىڭ جانكۇيەرلەر بازاسىن مەكسيكالىقتار قۇرايدى. ولار بوكسشى 2-3 رەت قاتارىنان جەڭىلمەيىنشە شىن مىقتىدان ءۇمىتىن ۇزبەيدى. الداعى شايقاستا گەننادي گولوۆكين ساۋلدەن ايلاسىن اسىرسا، وعان ۇلكەن پسيحولوگيالىق سوققى بولارى انىق. بىراق گولوۆكين ونى جەڭە الا ما؟ اڭگىمە سوندا. كىم ءبىلسىن؟! ال مەكسيكا ۇلى تاريحتىڭ جاڭا پاراقتارىن جازۋعا ءتاستۇيىن دايىن سياقتى... ايتسە دە قازاقستاندىق بوكسشى ونىڭ جوسپارىن بۇزادى دەگەنگە سەنگىمىز كەلەدى... الۆارەستىڭ جاقىندا عانا جەڭىلگەنىن ەسكەرسەك، گولوۆكيننىڭ باپكەرى دجوناتان بەنكستىڭ سول شايقاستان قورىتىندى شىعارۋى مۇمكىن ەكەنىن پايىمداساق، جەڭىسكە جەتۋگە مۇمكىندىك بار ەكەنىن تۇسىنە تۇسەمىز. ال قالعانىن ۋاقىت كورسەتەدى...

سوڭعى جاڭالىقتار

ۇلىلار ۇندەستىگى

قازاقستان • كەشە

باعا باقىلانادى

قارجى • كەشە

مەيىرىم شۇعىلاسى

رۋحانيات • كەشە

تسيفرلى دامۋ: جاڭا بەتبۇرىس

تەحنولوگيا • كەشە

ماحاببات اۋەنى

ونەر • كەشە

ۇقساس جاڭالىقتار