شقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە, ءتارتىپ ساقشىلارىنا 2020 جىلدىڭ مامىر ايىنان باستاپ 2022 جىلدىڭ ساۋىرىنە دەيىن 54 جاستاعى ازاماتتان اقشا بوپسالاپ كەلگەن ەر ادام جايلى اقپارات ءتۇستى. كوپ ۇزاماي قالانىڭ 49 جاستاعى تۇرعىنى كۇدىكتى رەتىندە ۇستالدى.
«بەلگىلى بولعانداي, ول ءوزىنىڭ فيزيكالىق كۇشىن پايدالانىپ, جابىرلەنۋشىدەن اقشا تالاپ ەتكەن. العاش رەت ودان 150 مىڭ تەڭگە العان. سودان كەيىن قۇنىعا ءتۇسىپ, سومانى كوبەيتە باستاعان. باس تارتقان جاعدايدا ۇرىپ-سوعامىن دەپ قورقىتقان. جابىرلەنۋشى ءوز اتىنا نەسيە الۋعا, ءتىپتى اناسىنىڭ پاتەرىن ساتۋدان تۇسكەن قاراجاتتىڭ ءبىر بولىگىن بەرۋگە ءماجبۇر بولدى. الايدا بوپسالاۋشى زاڭسىز ارەكەتىن سوندا دا توقتاتپاعان. كۇدىكتى ءوزىنىڭ قۇربانىنان تاعى دا 2 ملن تەڭگە الماقشى بولعان جەرىنەن ۇستالدى», دەلىنگەن اقپاراتتا.
جالپى العاندا 2 جىل ىشىندە ونىڭ قىلمىستىق ارەكەتىنەن كەلتىرىلگەن ماتەريالدىق زالال 50 ميلليون تەڭگەنى قۇرادى.
قازىرگى ۋاقىتتا كۇدىكتىگە قاتىستى قر قىلمىستىق كودەكسىنىڭ 194-بابى 4-بولىگى بويىنشا سوتقا دەيىنگى تەرگەۋ امالدارى جۇرگىزىلۋدە.
ايانا توعانبەك
