مامانداردىڭ ايتۋىنا قاراعاندا, ەلىمىزدىڭ اۋماعىندا پالەوليت داۋىرىنە ءتان ارتەفاكتىلەر كوپ ەمەس. بۇعان دەيىن قاراتاۋ جوتاسىنان بۇرىن-سوڭدى بەلگىسىز بولىپ كەلگەن پالەوليت داۋىرىنە تيەسىلى 85 ۇڭگىر انىقتالعان. ونىڭ سىرتىندا, سوڭعى جىلدارى تۇركىستان وبلىسى بايدىبەك اۋدانىنا قاراستى بورالداي تاۋىنداعى تۇتتىبۇلاق ۇڭگىرىنە زاماناۋي تەحنولوگيالاردى پايدالانىپ جۇرگىزىلگەن سكانەرلەۋ جۇمىستارى ناتيجەسىندە, بۇل نۇكتەدە وسىدان 41 مىڭ جىل بۇرىن, ياعني ورتا تاس داۋىرىندە تۇراق بولعانى انىقتالىپتى.
ال بۇل رەتكى, قازاق-نەمىس بىرلەسكەن ەكسپەديتسياسى حالىقارالىق جوبا اياسىندا, مامىر ايىنان باستاپ الماتى وبلىسى كەربۇلاق جانە ەڭبەكشىقازاق اۋداندارىندا زەرتتەۋ جۇمىستارىن جۇرگىزۋمەن اينالىسۋدا. ناتيجەسىندە, جوعارىدا اتاپ وتكەنىمىزدەي, ەڭبەكشىقازاق اۋدانىنداعى «تىكەنەكتى-2» نىسانىنىڭ مادەني قاباتىنان ورتا تاس ءداۋىرى, كەيىنگى پالەوليت جانە نەوليت داۋىرلەرىنە جاتاتىن ارتەفاكتىلەر انىقتالدى. سونىمەن قاتار قازبا جۇمىستارى بارىسىندا تابىلعان جانۋارلار سۇيەكتەرى مەن كومىر قالدىقتارىن زەرتحانالىق ساراپتاماعا جىبەرۋ جايى دا قاراستىرىلۋدا ەكەن.
«ارحەولوگيالىق قازبا جۇمىستارى حالىقارالىق جوبا بولعاندىقتان مۇندا ۇلتتىق مۋزەي قىزمەتكەرلەرىمەن قاتار يسپانيا, گرەكيا, گەرمانيا, اقش ەلدەرىنىڭ زەرتتەۋشىلەرى, سونداي-اق, ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرى دە بەلسەنە اتسالىسۋدا. ەكى شاكىرتىمىز پالەوليت داۋىرىنە قاتىستى دوكتورلىق ديسسەرتاتسياسىن شەتەلدە قورعايدى», دەيدى بىرلەسكەن جوبا جەتەكشىسى, تاريح عىلىمدارىنىڭ دوكتورى جاكەن قوجاحمەت ۇلى.
ايتا كەتەيىك, اتالعان بىرلەسكەن ەكسپەديتسيا كەلەسى كەزەكتە قازاقستان اۋماعىنان پالەوليت داۋىرىنە ءتان ەسكەرتكىشتەردى ىزدەستىرۋ ماقساتىندا, الداعى كۇندەرى جۇمىسىن تۇركىستان, جامبىل, شىعىس قازاقستان وبلىس اۋماعىندا جالعاستىرماق.
