Qamgor charity قوعامدىق قورىنىڭ توراعاسى باعدات انارباەۆا الماتىلىق ەرىكتىلەر جۇمىلا ىسكە كىرىسكەندە الىنبايتىن قامال بولمايتىنىن العا تارتتى. ءبىر جىلدان استام مەرزىمدە ۇلكەن تاجىريبە جيناپ ۇلگەرگەن ەرىكتىلەر قولداۋعا ءزارۋ ازاماتتارعا قولۇشىن بەرۋگە قاشاندا دايىن. اسىرەسە «قاسىرەتتى قاڭتار» كەزىندە توتەنشە جاعداي رەجىمىندە جۇمىس ىستەي ءجۇرىپ, ەرىكتىلەر قيىن جاعدايعا تاپ بولعاندارعا بارىنشا كومەك قولىن سوزعانى بەلگىلى. جەكەلەگەن ازاماتتارمەن قاتار, مەكەمەلەر مەن كاسىپورىندارعا بارىپ, بۇگىندە مىڭنان استام الماتىلىق وتباسىنىڭ العىسىنا بولەنىپ وتىر.
قايىرىمدىلىق ءىس-شارالاردىڭ باسىم بولىگى قاسيەتتى رامازان ايى كەزىندە ىسكە استى. وسى كەزدە كوپبالالى جانە تۇرمىسى تومەن وتباسىلارعا اۋىزاشار بەرىپ, قالا كوشەلەرىندە قۇرما مەن سۋ تاراتۋعا اتسالىستى. بۇل – ەرىكتىلەر جۇمىسىنىڭ ءبىر بولىگى عانا. ەرىكتىلەر ميسسياسى ءبىر رەتتىك اكتسيا ەمەس, قايىرىمدىلىققا نەگىزدەلگەن ءداستۇرلى ءىس-شارالار تۇرىندە ىسكە اسىپ كەلەدى.
«قالادا اتا-اناسىنىڭ قامقورلىعىنسىز قالعان بالالارعا كاسىپتىك باعدار بەرۋ جانە قىسقا مەرزىمدى كاسىپتەرگە وقىتۋعا باعىتتالعان «الەۋمەتتىك شەبەرحانا» اۆتورلىق جوباسى جۇمىس ىستەيدى. سونىمەن قاتار ەرىكتىلەردىڭ Ulagat جوباسى اياسىندا جالعىزباستى ارداگەرلەر مەن زەينەتكەرلەرگە قامقورلىق كورسەتىلىپ كەلەدى. ال مەرەكە كۇندەرى ەرىكتىلەر ءۇشىن ءتۇرلى قايىرىمدىلىق ءىس-شارالارى مەن ەكواكتسيالارعا تولى», دەيدى «قازاقستان ەرىكتىلەرى ليگاسى» قق توراعاسى نۇرسۇلتان بەكقايىروۆ. ونىڭ ايتۋىنشا, ەرىكتىلەر وزدەرىنىڭ ناقتى ءىس-ارەكەتتەرى ارقىلى قورشاعان ورتاسىن, تۋعان ەلىن وزگەرتۋدى ماقسات ەتەدى. بۇگىندە مۇنداي ۇيىمداردىڭ قاتارىن Bilim, Sabagtastyg, Qamgor, Taza alem, ءۇmit, Asyl mura, Ayala سياقتى ۇيىمدار تولىقتىرىپ وتىر. ال رەسپۋبليكالىق «يگى ىستەر مارافونى», «ارداگەرلەردى ارداقتايىق», «شاي ىشەيىك», «جارقىن جۇلدىز» اكتسيالارى ەرىكتىلەر تاراپىنان تۇراقتى ۇيىمداستىرىلىپ كەلەدى.
«جىل باسىنان بەرى فرونت-ءوفيستىڭ قولداۋىمەن 80-گە جۋىق جوبا ۇيىمداستىرىلىپ, جۇزەگە استى. قالانىڭ بارلىق جوعارى وقۋ ورىندارىندا «قازاقستان ۆولونتەرلار ليگاسى» قوعامدىق قورىنىڭ فيليالدارىن اشۋ جوسپارلانۋدا. بۇگىندە بۇل ۇيىمنىڭ فيليالدارى 23 جوعارى وقۋ ورنىندا جۇمىس ىستەيدى», دەپ اتاپ ءوتتى ن.بەكقايىروۆ. قوعامدىق قور باسشىسىنىڭ ايتۋىنشا, ەرىكتىلەر قۇرامى تەك جاستاردان جاساقتالمايدى. «بۇگىندە «كۇمىس ۆولونتەر» تۇجىرىمداماسى ازىرلەنۋدە. ولاردىڭ قۇرامىنا بەلسەندى ازاماتتىق ۇستانىمى بار ەڭبەكقور ازاماتتار كىرەدى. ويتكەنى ەرىكتى بولۋ قوعامعا جاقسى كوڭىل كۇي سىيلاۋداعى ەركىندىكپەن بايلانىستى. ەرىكتى بولعىسى كەلەتىندەر فرونت-وفيسكە حابارلاسىپ, ارنايى اقپارات العاننان كەيىن كوماندانىڭ تولىققاندى مۇشەسى بولا الادى», دەيدى ول.
الماتى
