بيىلعى بالالار جىلىنىڭ اياسىندا وسى وقۋشىلار سارايىنىڭ تالىمگەرلەرى ەرەكشە سىيلىققا يە بولدى. جاقىندا جەتىسۋ وبلىسىنىڭ اكىمى بەيبىت يساباەۆ وقۋشىلار سارايىنا ارنايى كەلىپ, بالالاردىڭ يگىلىگى ءۇشىن ميكرواۆتوبۋس سىيلادى. بۇدان بىلاي بالالار ءتۇرلى كونكۋرسقا, جارىسقا, ەكسكۋرسياعا وسى شاعىن اۆتوبۋستارمەن تاسىمالدانادى. جانە تۋرا وسىنداي قۇرمەت تەكەلى قالاسىنداعى بالالار مەن جاسوسپىرىمدەر ءتۋريزمى جانە ولكەتانۋ ورتالىعىنا دا كورسەتىلدى. ولارعا دا جاڭا ميكرواۆتوبۋستىڭ كىلتى بەرىلدى.
– مەملەكەت باسشىسىنىڭ شەشىمىمەن بيىل بالالار جىلى جاريالاندى. بارلىق جاقسىلىقتى, يگىلىكتى وزدەرىڭ سياقتى كىشكەنتاي بالدىرعاندارعا ۇسىنامىز. ەلىمىز جاڭا دامۋ جولىنا بەت الدى. جاڭا قازاقستاندى وركەندەتەتىن وزدەرىڭسىڭدەر. وقۋشىلار سارايىندا كوپتەگەن ۇيىرمەگە قاتىساسىڭدار, جەتىسۋ جەرىنىڭ تابيعاتى كوركەم, باراتىن, كورەتىن جەرلەرى كوپ. سوندىقتان ءبىزدىڭ جەتكىنشەكتەر جەتىسۋدىڭ ادەمى جەرلەرىن ارالاپ, ساياحات جاساپ, مادەنيەت مەكەمەلەرىنە, تەاترلار مەن سپورت سارايلارىنا بارۋى ءۇشىن ميكرواۆتوبۋس سىيلاۋدى ءجون كوردىك, – دەدى وقۋشىلارمەن كەزدەسۋدە وبلىس اكىمى بەيبىت يساباەۆ.
مۇنان كەيىن وبلىس باسشىسى وقۋشىلار سارايىنىڭ جۇمىسىمەن تانىستى. اكىم 3D-مودەلدەۋ مەن روبوت قۇراستىرۋ زەرتحاناسىندا, ءۇي شارۋاسىنا بەيىمدەيتىن شەبەرحانادا بولىپ, مەملەكەت قايراتكەرى د.قوناەۆتىڭ ءومىرى مەن قىزمەتىنە ارنالعان مۋزەي بولمەسىن, كوركەمسۋرەت, حورەوگرافيا جانە ءىت-كلاستەرىن, پلانەتاري زالىن ارالاپ كوردى. سول سياقتى كەمە قۇراستىراتىن شەبەرحانا, شاحمات, تاۋ ءتۋريزمى, روبوتتەحنيكا كابينەتتەرىندە بولىپ, بالالارمەن سويلەستى.
جەتىسۋ وبلىسى
