ەكو-بەلسەندىلەر ەرىكتىلەرمەن بىرلەسىپ, ءتۇرلى ەكو-اكتسيالار, كونكۋرستار مەن سەنبىلىكتەردى ۇيىمداستىرىپ جاتىر.
«قازىر گرانتتىق قارجىلاندىرۋ اياسىندا ءبىز ەكولوگيالىق باعىتتا 2 ۇلكەن جوبانى ىسكە اسىرىپ جاتىرمىز. بيىل بۇل باعىتتاعى جوبالاردىڭ شەڭبەرىندە ۇەۇ-دان 19 ءوتىنىم كەلىپ ءتۇستى. بۇل باسقا تاقىرىپتارعا تۇسكەن ءوتىنىم سانىنا قاراعاندا ءۇش ەسە ارتىق. مۇنداي ءۇردىس, سونداي-اق, ءبىزدىڭ قوعامدا ەكولوگيالىق ءبىلىمنىڭ جوعارى سۇرانىسقا يە ەكەندىگىن كورسەتەدى. ەكو-باعىتتاعى جوبالار بارلىق قازاقستاندىقتاردىڭ بولاشاعىنا اسەر ەتپەي قويمايدى», دەيدى ازاماتتىق باستامالاردى قولداۋ ورتالىعى باسقارما توراعاسىنىڭ ورىنباسارى جاسۇلان بيسەمبيەۆ.
جوبانى ىسكە اسىرۋ شەڭبەرىندە قازاقستاننىڭ ەكولوگيالىق قورى جاستار اراسىندا بەينەروليكتەر بايقاۋىنىڭ باستالعانىن حابارلادى. بايقاۋدىڭ ماقساتى-تابيعاتقا دەگەن قامقورلىقتى قالىپتاستىرۋ.
ۇيىمداستىرۋشىلاردىڭ ايتۋىنشا, بايقاۋعا «مەن سۋدى قالاي ۇنەمدەيمىن», «قوقىسقا ەكىنشى ءومىر سىيلايىق», «مەنىڭ اۋلام – ەڭ تازا اۋلا» تاقىرىپتارىنا بەينەروليكتەر تۇسىرگەن مەكتەپ وقۋشىلارى نەمەسە ستۋدەنتتەر قاتىسا الادى.
سونداي-اق قوعام بەلسەندىلەرى ەكولوگيالىق اكتسيالار مەن سەنبىلىكتەردى, اۋماقتاردى تازالاۋعا, اباتتاندىرۋعا باعىتتالعان باسقا دا ءىس-شارالاردى وتكىزبەك. كوكتەمدە ەلوردادا ەلىمىزدىڭ ماڭىزدى وقيعالارىنا ورايلاستىرىلعان اتاۋلى اعاشتار وتىرعىزۋعا باعىتتالعان «جاسىل چەللەندج» ۇيىمداستىرىلدى.
اكتسيانى نۇر-سۇلتان, ماڭعىستاۋ, تۇركىستان, پاۆلودار وبلىستارىنىڭ مەكتەپتەرى قولدادى.
«بۇگىنگى تاڭدا قوعامدا ەكولوگيالىق تاربيە مەن مادەنيەتتى ەرتە جاستان دامىتۋ كەرەك دەگەن ۇستانىم بار. ەگەر ءبىز بالالارعا ەكو-مادەنيەتتى جاستايىنان سىڭىرەتىن بولساق, بولاشاقتا ولاردىڭ ەكولوگيالىق ساۋاتى جوعارى بولادى. مۇنىمەن قوسا, جاستاردىڭ ەكولوگيالىق ءبىلىم دەڭگەيىن ارتتىرۋ باعىتىندا كەشەندى شارالار جۇرگىزىلۋى ءتيىس», دەيدى جوبا جەتەكشىسى ايگۇل ابدۋاليەۆا.
ۇيىمداستىرۋشىنىڭ ايتۋىنا قاراعاندا, بارلىق ەكولوگيالىق اكتسيالارعا ەرىكتىلەر تارتىلادى. ولاردىڭ اراسىندا وقۋشىلار دا, قازاقستاندىق كوللەدجدەر مەن جوعارى وقۋ ورىندارىنىڭ ستۋدەنتتەرى دە بار.
