فيلمدە كومپانيانىڭ نەگىزى قالانعاننان باستاپ بۇگىنگى كۇنگە دەيىنگى تاريحى باياندالادى. 2013 جىلى رەسمي تىركەلگەن كومپانيانىڭ قۇرىلعانىنا بيىل 9 جىل تولىپ وتىر. تۋىندى كومپانيانىڭ قۇندىلىقتارى ارقىلى سۋرەتتەلگەن. ءاربىر قۇندىلىق اياسىندا Bugin Holding قۇرامىنداعى كومپانيا باسشىلارى ويلارىن ايتادى. «سەنىم. قۇرمەت. دامۋ. ناتيجە» قۇندىلىقتارى – دەرەكتى ءفيلمنىڭ نەگىزى بولىپ وتىر.
ءىس-شارا كومپانيانىڭ نەگىزىن قالاۋشىلار ايبەك قۋاتباي مەن نۇرباقىت جۇلدىزباي ۇلىنىڭ, ينۆەستور بالتابەك مۇقاشەۆ پەن ءفيلمنىڭ پروديۋسەرى لاۋرا ارتىقباەۆانىڭ العىسوزىمەن باستالدى. ءارى قاراي ءفيلمنىڭ كورسەتىلىمى بولىپ, ىزىنشە فيلمدە ايتىلعان فاكتىلەر نەگىزىندە كورەرمەنگە سۇراق قويىلىپ, دۇرىس جاۋاپ بەرگەن قاتىسۋشىلارعا سىيلىقتار تابىستالدى.
«بيىل بىزگە 9 جىل. ون جىلدىق دەپ ارنايى جوسپارلاعان جوقپىز. كوماندا سوعان ءپىسىپ-جەتىلىپ دايىن بولدى, ىسكە كىرىستىك تە كەتتىك. كەيىنگى كەزدە بىزگە كەلىپ كەڭەس سۇرايتىن جاستار كوبەيىپ كەتتى. فيلم سولارعا شابىت بەرسىن, موتيۆاتسيا بەرسىن, كەڭەس بولسىن دەگەن ماقساتتا ءتۇسىرىلدى. ەكىنشىدەن, Bugin Entertainment كومانداسى جوبا ىستەگىسى كەلدى. وسىدان باستاڭىزدار دەدىك. ناتيجەسىندە بۇگىنگى تۋىندى ومىرگە كەلدى. الداعى ۋاقىتتا وسى كوماندامەن فيلم دە, سەريال دا تۇسىرە الامىز دەپ ايتا الامىن. ۇشىنشىدەن, بيىل بىزدە كوپ جاڭالىقتار بولىپ جاتىر. مەكتەپ اشىپ جاتىرمىز. Daryn.Online جوباسى قىرعىزستان, وزبەكستان نارىعىنا شىعىپ جاتىر. سونىمەن قاتار بالتابەك قۇمار ۇلى مۇقاشەۆ اعامىز بىزگە ينۆەستيتسيا سالىپ, ستراتەگيالىق سەرىكتەسكە اينالدى. بۇل فيلم – ءبىر جاعىنان سونىڭ دا باستاماسى بولىپ وتىر. وسى سەبەپتەرگە بايلانىستى بۇگىن تۋىندىنىڭ كورسەتىلىمىن جاسادىق. ءفيلمدى كورۋ بارىسىندا ويىما «مىناۋ شىنىمەن دە ءبىز بە؟» دەگەن سۇراق كەلدى», دەيدى Bugin Holding كومپانياسىنىڭ نەگىزىن قالاۋشىلاردىڭ ءبىرى ايبەك قۋاتباي.
Bugin Holding كومپانياسى جوبالارىنىڭ كەڭەسشىسى سادىق شەرىمبەكتىڭ ايتۋىنشا, فيلم كومپانيانىڭ كوپشىلىك الدىندا بەرگەن ەسەبى ىسپەتتى.
«بۇل ءىس-شارانى كومپانيا رەتىندە, كوماندا رەتىندە بەرگەن ەسەبىمىز دەپ ءبىلۋ كەرەك شىعار. وسى ۋاقىتقا دەيىن جىل سايىن وزىمىزشە ەسەپ جاساپ تۇراتىنبىز. بۇل جولعىسىن فيلم رەتىندە جاساۋ كەرەك بولدى. ول ءۇشىن بارلىق العىشارتتار قالىپتاسىپ ءبىتتى دەپ ويلايمىن. جاسالعان جۇمىستار بار. ايتا كەتەيىن, بىزدە كەيىنگى 3 جىلدا مۇلدەم تىنىم بولعان جوق. قانشا جەردەن موتيۆاتسيانىڭ بولسا دا, ەنەرگياڭ بولسا دا, توقتاۋسىز ەڭبەك ادامدى ءسال قاجىتقانداي بولادى. سول كەزدە بىزگە وسىنداي سەرپىلىس كەرەك بولدى. ءبىر جاڭارىپ الۋىمىز كەرەك دەگەندەي. وتكەنىمىزدى ەسكە الىپ...
شىعىس حالىقتارىندا دامۋ تسيكلمەن جۇرەدى. مىسالعا, ءبىر نۇكتەگە بارۋ ءۇشىن, ەڭ الدىمەن, كىشىگىرىم شەڭبەر جاسايسىز. ودان كەيىن سول نۇكتەگە ورالىپ بۇرىنعىدان كەڭىرەك شەڭبەر جاسايسىز. ودان دا كەڭىرەك دەپ جالعاسا بەرەدى. ءبىزدىڭ بۇگىنگى فيلم كەلەسى ۇلكەن شەڭبەردى باستاۋداعى نۇكتە بولدى دەپ ويلايمىن», دەيدى ول.
