10 ماۋسىمدا ءتورت ايلىق كىشكەنتاي بالاسىمەن بىرگە ۇيىنەن بەلگىسىز باعىتقا شىعىپ كەتىپ, ءىز-ءتۇسسىز جوعالعان جاس ايەل تۇركىستان وبلىسى پوليتسەيلەرىنىڭ جۇيەلى جانە جوسپارلى تۇردە جاساعان جۇمىسىنىڭ ارقاسىندا تابىلعان.
14 ماۋسىمدا ساۋران اۋداندىق پوليتسيا بولىمىنە جەرگىلىكتى تۇرعىن ارىزدانىپ, كەلىنى مەن ءتورت ايلىق نەمەرەسى جوعالعانىن ايتىپ, كومەك سۇراي كەلگەن. ارىز تۇسە سالىسىمەن ءتارتىپ ساقشىلارى تولىق قۇرامدا جۇمىلدىرىلىپ, ىزدەۋ جۇمىستارىن جۇرگىزدى. پوليتسەيلەر ايەلدىڭ بارۋى مۇمكىن دەگەن ورىنداردى تەكسەرىپ, تانىستارىنىڭ اراسىندا سۇراستىرۋ جۇمىستارىن اتقاردى.
ءىز-ءتۇسسىز جوعالعانداردى ىزدەۋ جۇمىسىنا ەرىكتىلەر دە تارتىلدى. ءتارتىپ ساقشىلارى جوعالعان ايەلدىڭ ايرىقشا بەلگىلەرىن جازىپ, سۋرەتىمەن بىرگە بۇقارالىق اقپارات قۇرالدارىنا, سايتتارعا جولدادى. شۇعىل ىزدەستىرۋ جۇمىستارىنىڭ ناتيجەسىندە, 4 كۇندە ءىز-ءتۇسسىز كەتكەن ايەل مەن كىشكەنتاي نارەستە شىمكەنت قالاسىنداعى ايەلدەرگە ارنالعان داعدارىس ورتالىعىنان تابىلدى.
بەلگىلى بولعانداي, جاس ايەل ەنەسىمەن اراسىندا بولعان وتباسىلىق كەلىسپەۋشىلىكتىڭ سالدارىنان جاقىندارىنا ايتپاي كەتىپ قالعان. جوعالعان كەلىنشەكتىڭ دەنساۋلىعىنا ءتونىپ تۇرعان قاۋىپ جوق, جاعدايى جاقسى. تۋىستارىنا امان-ەسەن تاپسىرىلدى.
