وزدەرىڭىزگە ءمالىم, نيكولاەۆ قالاسى ۋكراينانىڭ وڭتۇستىگىندە ورنالاسقان. وعان تاياۋ ماڭداعى حەرسون قالاسىن رەسەي اسكەرلەرى باسىپ العان بولاتىن. ال اكىمشىلىك عيماراتقا زىمىراننان جاسالعان شابۋىل سالدارىنان زالال كەلگەن ەدى.
ء«بىزدىڭ نيكولاەۆ وبلىسى. وڭىردەگى ماڭىزدى ماسەلەلەر بويىنشا كەڭەس ءوتتى. ءبىز ەكونوميكانىڭ جاي-كۇيىن, سۋمەن قامتاماسىز ەتۋدى قالپىنا كەلتىرۋدى, اۋىل شارۋاشىلىعىنداعى جاعدايدى تالقىلادىق. قۇرلىقتان جانە تەڭىزدەن كەلەتىن قاۋىپتەرگە ەرەكشە نازار اۋداردىق. ۋكراينانىڭ جەڭىسى ءۇشىن جۇمىستى توقتاتپايمىز», دەلىنگەن زەلەنسكيدىڭ Telegram ارناسىندا.
سونداي-اق ۆولوديمير زەلەنسكي كۇتپەگەن جەردەن ودەسسا وبلىسىنا دا باردى. بۇعان دەيىن بۇل ساپار تۋرالى ەشتەڭە ايتىلماعان ەدى. سوندىقتان كوپشىلىك ءۇشىن زەلەنسكيدىڭ بۇل ارەكەتى توسىن بولدى. ۋكراينا پرەزيدەنتى ءباسپاسوز قىزمەتىنىڭ حابارلاۋىنشا, ول ىشكى ىستەر مينيسترلىگى بولىمشەلەرىنىڭ بەكىنىسىن, قارۋ-جاراعىن جانە اتىس ءتيرىن ارالاپ, شەكاراشىلارعا ماراپاتتار تاپسىرعان.
ايتا كەتەرلىگى, اسكەري قاقتىعىس باستالعالى ۆ.زەلەنسكي ەل اۋماعىن ءجيى ارالاپ ءجۇر. كيەۆ ماڭىنان رەسەي اسكەرى كەتكەننەن كەيىن بىرنەشە رەت ساپارعا شىقتى. اۋەلى حاركوۆقا باردى. سودان كەيىن زاپوروجە وبلىسىنا ات باسىن بۇردى. ءتىپتى دونباسقا دا بارىپ, العى شەپتىڭ جاي-كۇيىمەن تانىسىپ قايتتى.
ليتۆا بيلىگى رەسەيدىڭ كالينينگراد وبلىسىنان نەگىزگى اۋماققا وتەتىن جۇك پويىزدارىنىڭ وتۋىنە تىيىم سالدى. بۇل تۋرالى العاش بولىپ وبلىستىڭ گۋبەرناتورى حابارلاعان-دى. ليتۆانىڭ مۇنداي قادامعا بارۋىنا ەۋروپالىق وداقتىڭ سالعان سانكتسياسى اسەر ەتىپ وتىر.
تىيىم سالىنعان تاۋارلار جالپى جۇك اعىنىنىڭ جارتىسىنا جۋىعىن قۇرايدى. سونىڭ ىشىندە كومىر, مەتالل جانە قۇرىلىس ماتەريالدارى بار. وتكەن اپتادا ليتۆانىڭ ءبىر توپ دەپۋتاتى ۋكراينانىڭ قويمالارىنان تونالعان استىق ەل اۋماعى ارقىلى دا تاسىمالدانۋى مۇمكىن ەكەنىنە الاڭداۋشىلىق بىلدىرگەن ەدى.
ۋكرايناداعى اسكەري قاقتىعىس باستالعالى بەرى جەتى جارىم ميلليوننان استام ادام ەلدەن كەتكەن. بۇل بىرىككەن ۇلتتار ۇيىمىنىڭ بوسقىندار ءىسى جونىندەگى جوعارعى كوميسسارى باسقارماسى مالىمدەدى. بۇۇ كەلتىرگەن دەرەكتەرگە سۇيەنسەك, 24 اقپاندا رەسەي باسىپ كىرگەلى ەلدەن كەتكەن 7,5 ميلليوننان استام ۋكراينالىقتىڭ 2,5 ميلليونى عانا ورالعان.
ال ۋكراينانىڭ وزىندە 7,1 ميلليون ادام ەل ىشىندە بوسقىنعا اينالىپ, باسپاناسىن تاستاپ كەتكەن. سونداي-اق 15,7 ميلليون ادام شۇعىل گۋمانيتارلىق كومەككە ءزارۋ. بۇۇ بوسقىندار ءىسى جونىندەگى جوعارعى كوميسسارى ەۋروپادا 5,1 ميلليوننان استام ۋكرايندىق بوسقىن بار ەكەنىن العا تارتادى. ۇيىم قازىرگى بوسقىندار داعدارىسىن ەكىنشى دۇنيەجۇزىلىك سوعىستان كەيىنگى ەڭ ۇلكەن داعدارىس دەپ باعالاپ وتىر.
بۇدان بولەك 323 بالا قازا تاۋىپ, 583-تەن استامى جاراقات العان. مۇنداي دەرەكتى ۋكراينا باس پروكۋراتۋراسى كەلتىردى. بىراق سوعىس ءالى اياقتالماعانىن, ۋكراينانىڭ ءبىراز اۋماعىن رەسەي باسىپ العانىن ەسكەرسەك, زارداپ شەككەن بالالار سانى بۇدان دا كوپ بولۋى ىقتيمال. ويتكەنى ول وڭىردە ساناق جۇرگىزۋ مۇمكىن ەمەس.
بالالاردىڭ كوپشىلىگى دونەتسك, حاركوۆ, كيەۆ, چەرنيگوۆ, لۋگانسك, حەرسون, نيكولاەۆ, زاپوروجە جانە سۋمى وبلىستارىندا زارداپ شەككەن. 2028-دەن استام وقۋ ورنىنا بومبالاۋ مەن اتقىلاۋدان ءتۇرلى دەڭگەيدە زالال كەلگەن. سونىڭ 209-ى تولىعىمەن قيراعان. بۇۇ مالىمەتى بويىنشا, رەسەي اگرەسسياسى سالدارىنان 4 509 بەيبىت تۇرعىن, ونىڭ ىشىندە 294 بالا قازا تاپتى. بۇۇ سونداي-اق قازا تاپقاندار مەن جارالانعاندار الدەقايدا كوپ ەكەنىن العا تارتادى. ۇيىم تەك تىركەلگەن, قۇجاتى بار رەسمي مالىمەتتى عانا تاراتادى.
