دارىگەرلەرگە سۇرانىس ەكى ەسە ءوستى

تاپشىلىق جاي عانا بار ەمەس، كەيىنگى كەزدە ەكى ەسە ارتىپ وتىر. ماسەلەن، كۇنى كەشە رەسپۋبليكالىق بيۋدجەتتىڭ ات­قا­رىلۋىن باقىلاۋ جونىندەگى ەسەپ كومي­تەتى كەيىنگى 5 جىلدا ەلىمىزدەگى مەديتسينا كادرلارىنىڭ جالپى تاپشى­لىعى ەكى ەسە ءوسىپ، 23،1 مىڭ بىرلىككە جەتكەنىن انىقتادى. بۇل رەتتە، مامان تاپشىلىعىن ازايتۋ ماقساتىندا دارىگەرلەر ءبىر ەمەس، بىرنەشە لاۋازىمدى قوسا اتقارىپ كەلەدى. سونىڭ سالدارىنان دەنساۋلىق ساقتاۋ سالاسى قىزمەتكەرلەرىنىڭ جۇكتەمەسى ارتادى. بۇعان قوسا، كورسەتىلەتىن مەديتسينالىق كومەكتىڭ ساپاسىنا دا تەرىس اسەرىن تيگىزەدى. جۇكتەمەنىڭ ارتقانى اق حالاتتىلاردى جۇمىستى ءجۇردىم-باردىم ىستەۋگە يتەرمەلەدى مە، جوق الدە وزگە دە سەبەپتەرى بولدى ما، ايتەۋىر 2020-2021 جىلدارى مەديتسينا قىزمەتكەرلەرى مەن دەنساۋلىق ساقتاۋ ۇيىمدارىنىڭ ۇستىنەن تۇسكەن شاعىمدار ەكى ەسە ءوستى.

بۇل از دەسەڭىز، ەسەپ كوميتەتى جۇر­گىزگەن مەملەكەتتىك ءاۋديتتىڭ ناتيجەسىندە اتالعان سالادا بارلىعى 5 825،6 ملن تەڭگە سوماسىندا قارجىلىق بۇزۋ­شىلىقتاردى (ونىڭ ىشىندە بۋحگالتەرلىك ەسەپتى جۇرگىزۋ جانە قارجىلىق ەسەپتىلىكتى جاساۋ كەزىندەگى بۇزۋشىلىقتار – 5 058،0 ملن تەڭگە)، 7 541،8 ملن تەڭگە سوماسىندا بيۋدجەت قاراجاتىن ءتيىمسىز جوسپارلاۋ مەن ءتيىمسىز پايدالانۋدى، 61،2 ملن تەڭگەگە ىقتيمال شىعىندار مەن جىبەرىپ العان پايدانى، سونداي-اق 151 راسىمدىك بۇزۋشىلىقتى انىقتادى. ارينە، ەسەپ كوميتەتى انىقتاعان ولقىلىقتار مەن كەمشىلىكتەر بۇل سالادا اتقارىلىپ جاتقان قىرۋار جۇمىس پەن ەسىل ەڭبەكتى ءتۇپ-تۇقيانىمەن جوققا شىعارادى دەگەن ءسوز ەمەس. تەك، مەديتسينا سالاسىندا دا ماڭىزدى پروبلەمالار بارىنىڭ قاپەردەن شىعارماعان ءجون. اتا زاڭنىڭ العاشقى بابىندا مەملەكەتىمىزدىڭ ەڭ قىمبات قازىناسى – ادام جانە ادامنىڭ ءومىرى ەكەنى انىق جازىلىپ تۇر. كەمشىلىكتەردى كەلەشەكتىڭ ەنشىسىنە قالدىرىپ، شەشىمىن بۇگىننەن ىزدەمەسەك، اقىر-سوڭىندا سان سوعىپ قالۋىمىز بەك مۇمكىن. بۇعان جاۋاپتى ورگاندار بۇدان بىلاي ماسەلەنى مايشاممەن قارايدى دەگەن ۇمىتتەمىز.