كەزدەسۋ بارىسىندا قازاقستان مەن تاتارستاننىڭ ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىعىن كەڭەيتۋ پەرسپەكتيۆالارى دوستىق رۋحتا تالقىلاندى. ەكونوميكانىڭ ماڭىزدى سەكتورلارىنداعى بىرلەسكەن جوبالاردى قازاقستان اۋماعىندا جۇزەگە اسىرۋعا, ەلىمىزدىڭ زاۋىتتارىن رەسەي فەدەراتسياسىنىڭ ءوندىرىس جۇيەسىمەن قاتار دامىتۋعا باسا ءمان بەرىلدى.
سونىمەن قاتار «كاماز» جانە «تاتنەفت» كومپانيالارىمەن بىرلەسكەن جوبالاردى جۇزەگە اسىرۋ بارىسى قاراستىرىلدى. كەزدەسۋگە بۇل كومپانيالاردىڭ دا باسشىلارى قاتىستى.
قاسىم-جومارت توقاەۆ رۋستام ميننيحانوۆقا ءىلتيپات بىلدىرە وتىرىپ, ءوزىنىڭ تاتارستانعا بارعان ساپارىن ايرىقشا ىقىلاسپەن ەسكە الدى. ونىڭ ناتيجەلەرى ىنتىماقتاستىقتى ودان ءارى نىعايتۋعا تىڭ سەرپىن بەردى.
«ۋاعدالاستىقتارىمىزدىڭ قالاي جۇزەگە اسىرىلىپ, كوزدەگەن ماقساتقا قالاي قول جەتكىزىپ جاتقانىمىزدى كورىپ وتىرمىن. ءبارى دە باقىلاۋدا دەپ ايتۋعا بولادى», دەدى قازاقستان پرەزيدەنتى.
قاسىم-جومارت توقاەۆ قازاقستاننىڭ رەسەيمەن كوپجاقتى قاتىناستارىندا ماڭىزدى ورىن الاتىن قازاق-تاتار بايلانىستارىنىڭ قارقىندى دامىپ كەلە جاتقانىن اتاپ ءوتتى.
2021 جىلدىڭ قورىتىندىسى بويىنشا رەسپۋبليكامەن اراداعى تاۋار اينالىمى 423 ميلليون دوللار بولدى. بيىلعى ءتورت ايدىڭ ىشىندە 143 ميلليون دوللارعا جەتتى. ماشينا جاساۋ سالاسىنداعى ءىرى جوبالار تابىستى جۇزەگە اسىرىلىپ جاتىر. قازاقستان مەن رەسەيدىڭ وڭىرارالىق فورۋمى ىنتىماقتاستىقتى كەڭەيتۋگە جاقسى مۇمكىندىك بەرەدى.
ءوز كەزەگىندە رۋستام ميننيحانوۆ پەتەربۋرگ حالىقارالىق ەكونوميكالىق فورۋم اياسىندا كەزدەسۋگە مۇمكىندىك تۋعىزعانىنا ريزاشىلىعىن ءبىلدىرىپ, تاتار كومپانيالارىنىڭ قازاقستاندىق سەرىكتەستەرىمەن ىقپالداستىق ورناتۋىنا قولداۋ كورسەتىپ جاتقانى ءۇشىن قاسىم-جومارت توقاەۆقا العىس ايتتى.
«قازاقستان كومپانيالارىنىڭ رەسەي نارىعىنا تاتارستان ارقىلى كىرۋگە مۇمكىندىك الۋىنا پايدامىزدى تيگىزگىمىز كەلەدى. ءبىز تولىققاندى قولداۋ كورسەتىپ, ىقپال ەتۋگە دايىنبىز», دەدى تاتارستان پرەزيدەنتى.
