«مەديتسينا - ەرەكشە جان-دۇنيەنى سەزىنە ءبىلۋ قاسيەتىن, جوعارى كاسىبي بىلىكتىلىكتى, ءبىلىم مەن تاجىريبەنى قاجەت ەتەتىن سالا. دارىگەرلەر ءاردايىم ادامگەرشىلىگىمەن, جانقيارلىعىمەن جانە ءوز ىسىنە دەگەن ادالدىعىمەن ەرەكشەلەنەدى. مەديتسينا - ادام تۋعاننان باستاپ ءومىرىنىڭ سوڭىنا دەيىن اراشا تۇسەتىن جالعىز ماماندىق. ادامنىڭ ءومىر سۇرۋىنە ءۇمىت بەرەتىن دارىگەر. بۇگىنگى تاڭدا قازاقستاندا 260 مىڭعا جۋىق مەديتسينا مامانى, ونىڭ ىشىندە 78 مىڭنان استام دارىگەر جانە 189 مىڭ ورتا مەديتسينا قىزمەتكەرى جۇمىس ىستەيدى. ەلىمىزدە كۇن سايىن 2 مىڭنان استام وپەراتسيا جاسالادى, تاۋلىگىنە 600-دەن استام ايەل بوسانادى, ستاتسيوناردان 7 مىڭنان استام ناۋقاس ەمدەلىپ شىعادى, ەمحانالاردا 420 مىڭنان استام ادامعا جانە جەدەل جاردەم 19 مىڭ ادامعا قىزمەت كورسەتەدى», دەلىنگەن مينيستر اجار عينياتتىڭ قۇتتىقتاۋىندا.
ونىڭ ايتۋىنشا, قازاقستاندا دەنساۋلىق ساقتاۋ سالاسى قارقىندى دامىپ كەلەدى. حالىقتىڭ قالىڭ توبىنا, ونىڭ ىشىندە اۋىل تۇرعىندارىنا قولجەتىمدى جانە جەدەل العاشقى مەديتسينالىق كومەكتى ۇيىمداستىرۋ تاسىلدەرى قايتا قارالىپ جاتىر. جوعارى تەحنولوگيالىق كومەك كورسەتۋ كولەمى ءوسىپ, جاڭا پەريناتالدىق ورتالىقتار سالىنۋدا. يننوۆاتسيالىق باعدارلامالار ەنگىزىلىپ جاتىر. وسىنداي جاڭالىقتاردىڭ ارقاسىندا بۇگىنگى كۇنى سيرەك كەزدەسەتىن جانە كۇردەلى اۋرۋلارعا ءساتتى دياگنوستيكا جۇرگىزىلىپ, ەمدەلىپ ءجۇر. ونكولوگيالىق جانە گەماتولوگيالىق اۋرۋلارعا كۇدىك تۋىنداعان كەزدە پاتسيەنتتەردى تەكسەرۋدى جانە ەمدەۋدى جەدەلدەتۋ ءۇشىن «جاسىل جول» ەنگىزىلدى.
«سوڭعى جىلدارى ءبىز ەڭ ماڭىزدى ەكى كورسەتكىشتىڭ جاقسارعانىن بايقادىق - ءومىر ءسۇرۋ ۇزاقتىعى جانە تۋ كورسەتكىشى ءوستى. قازاقستان رەسپۋبليكاسىنىڭ پرەزيدەنتى 2022 جىلدى «بالالار جىلى» دەپ جاريالادى. بالالاردىڭ دەنساۋلىعىن ساقتاۋ ءىس-شارالارىن ىسكە اسىرۋ شەڭبەرىندە ءبىز پروفيلاكتيكاعا ەرەكشە نازار اۋدارامىز. سوعان بايلانىستى جۇرگىزىلەتىن زەرتتەۋلەردىڭ اعىمداعى كولەمىن ەسكەرە وتىرىپ, بالالاردى پروفيلاكتيكالىق تەكسەرۋ كەڭەيتىلەدى. وسىنداي جەتىستىكتەرگە سىزدەردىڭ قاجىرلى ەڭبەكتەرىڭىزدىڭ, ءوز ىسىنە جاۋاپكەرشىلىكپەن قارايتىن سالا ماماندارىنىڭ ەڭبەگى ەرەكشە زور. بارلىق مەديتسينا قىزمەتكەرلەرىنە قازاقستاندىقتاردىڭ دەنساۋلىعىن ساقتاۋعا قوسقان باعا جەتپەس ۇلەسى ءۇشىن شىنايى ريزاشىلىعىمدى بىلدىرەمىن. ەرەكشە العىس سوزدەرىن سالا ارداگەرلەرىنە ايتقىم كەلەدى. سىزدەردىڭ تاجىريبەلەرىڭىز ءداستۇردى ساقتاۋعا كومەكتەسىپ, مامانداردىڭ جاڭا بۋىنىنا ۇلگى بولارى ءسوزسىز», دەيدى اجار عينيات.
