حالىقارالىق اگەنتتىك, اسىرەسە قىتايدىڭ ىشكى جالپى ءونىمىن ء(ىجو) قايتا قاراپ, 4,8-دەن 3,7 پايىزعا تومەن تۇسىرگەن. سونىمەن قاتار اقش ەكونوميكاسى 2,9 (بۇرىن 3,5 پايىز دەپ بولجانعان), ەو ەكونوميكاسى (بۇرىن 3 پايىز) 2,6 پايىزعا كوتەرىلەدى دەپ كۇتىلەدى. سونداي-اق Fitch 2023 جىلى الەمدىك ءىجو ءۇش اي بۇرىن بولجانعان 2,8 پايىزدىڭ ورنىنا 2,7 پايىزعا جوعارىلايتىنىن جەتكىزدى.
«اقش ەكونوميكاسىنىڭ ءوسىمى قىسقا مەرزىمدى يمپۋلسكە بايلانىپ تۇر. جۇمىس ورىندارىنىڭ سانى مەن جالاقى كولەمىنىڭ ءوسۋى تۇتىنۋشىلىق شىعىنداردى ارتتىرادى. بىراق اقشا-نەسيە ساياساتىنىڭ اگرەسسيۆتى قاتاڭداۋىنا بايلانىستى 2023 جىلدىڭ ورتاسىنا قاراي ءوسىم قارقىنى ءبىرشاما باياۋلايدى. 2023 جىلى اقش-تاعى ءوسىم 1,5 پايىزعا, 2024 جىلى 1,3 پايىزعا دەيىن قۇلدىرايدى. اقشا-نەسيە ساياساتىنىڭ كۇرت قاتاڭداۋىنان كەيىن اقش-تا ايتارلىقتاي رەتسەسسيا تاۋەكەلى تۋىندايتىنىن تاريحي تاجىريبەنىڭ ءوزى كورسەتىپ بەرەدى», دەلىنەدى اگەنتتىك بولجامىندا.
ساراپشىلاردىڭ بولجاۋىنشا, ەۋروپالىق ورتالىق بانك بيىل مولشەرلەمەنى 100 بازالىق تارماققا دەيىن, 2023 جىلى 50 بازالىق تارماققا دەيىن جوعارىلاتۋى مۇمكىن. قازىر ول نولدىك دەڭگەيدە تۇر.
جالپى, الەمدە ەكونوميكالىق احۋالدىڭ كۇردەلەنىپ جاتقانىن جەكەلەگەن بيزنەسمەندەردىڭ جاعدايىنان دا بايقاۋعا بولاتىنداي. Bloomberg تاراتقان اقپاراتقا سۇيەنسەك, وسى جىلى الەمنىڭ 500 باي ادامى جالپى جيىنتىعى 1,4 ترلن دوللار اقشاسىنان ايىرىلعان. سونىڭ ىشىندە جەلگە ۇشقان 206 ملرد دوللار دۇيسەنبى كۇنگى قور نارىعىنداعى پايىزدىق ستاۆكانىڭ وسۋىنە جانە ينفلياتسياعا بايلانىستى.
2021 جىلى قايشىلىقتى ۇردىستەر كوپ ءجۇرىپ جاتىر. ماسەلەن, دامۋشى نارىق ەلدەرىندە اۋقاتتى ازاماتتار سانى 8 پايىزعا ارتقان. سولتۇستىك امەريكادا بۇل كورسەتكىش 13 پايىزدى قۇرايدى. ازيا-تىنىق مۇحيتى ايماعىنداعى باي ادامدار سانى نەبارى 4,2 پايىزعا كوبەيىپتى. بايلار كوپ تۇراتىن ەلدەر – اقش, جاپونيا, قىتاي جانە گەرمانيا. الەم بايلارىنىڭ 64 پايىزى وسى ەلدەردە قونىستانعان. وسى جىلعى داعدارىس سالدارىنان كوپ قارجىسىنان ايىرىلعان بايلاردىڭ ىشىندە حالىقارالىق اگەنتتىك چانپەن چجاو, يلون ماسك, دجەف بەزوس, مارك تسۋكەربەرگ جانە بەرنار ارنولاردىڭ اتى-ءجونىن اتايدى. بۇل بەستىكتىڭ جوعالتقان قارجىسى 345 ملرد دوللارعا باعالانادى.
