«ەلەكتروندىق ساۋداعا قاتىستى شاعىمنىڭ دەنى تاۋار جانە ساتۋشى تۋرالى اقپاراتتىڭ بولماۋى, تاۋاردىڭ بەرىلگەن سيپاتتاماعا سايكەس كەلمەۋى, ينتەرنەت-سايتتاردىڭ تاۋاردى كەرى الىپ, اقشانى قايتارۋدان باس تارتۋىنا قاتىستى. سونداي-اق ەلەكتروندىق ساۋدا بويىنشا الاياقتىق فاكتىلەرگە قاتىستى شاعىمدار دا بار. 2022 جىلعى بەس ايدىڭ ىشىندە 772 ءوتىنىش نەمەسە شاعىم كەلىپ ءتۇستى. بۇل جالپى كەلىپ تۇسكەن شاعىمنىڭ 8,3% قۇرايدى», دەدى سەرىك قۇسايىنوۆ.
ونىڭ ايتۋىنشا, تۇتىنۋشىلاردان تۇرعىن ءۇي-كوممۋنالدىق شارۋاشىلىعىنا قاتىستى دا شاعىمدار تۇسەدى.
«اتاپ ايتساق, وتىنىشتەر مەن شاعىمدار كوممۋنالدىق قىزمەتتەردىڭ ساپاسىز كورسەتىلۋى, تاريفتەردى نەگىزسىز كوتەرۋ, ەلەكتر ەنەرگياسىن ەسەپتەۋ قۇرالدارىن زاڭسىز تەكسەرۋ جانە اۋىستىرۋمەن بايلانىستى. سونىمەن قوسا ەلەكتر جەلىلەرىن زاڭسىز الۋ جانە گاز تاراتۋ كومپانيالارىنا قاتىستى شاعىمدار جيىلەپ كەتتى. بيىلعى 5 ايدا اتالعان سالا بويىنشا 454 ءوتىنىش نەمەسە شاعىم ءتۇستى. بۇل جالپى شاعىمنىڭ 5% قۇراپ وتىر. ال وتكەن جىلى تۇرعىن ءۇي-كوممۋنالدىق شارۋاشىلىعىنا قاتىستى 408 ءوتىنىش-شاعىم تۇسكەن ەدى», دەيدى ول.
سونداي-اق كوميتەت باسشىسىنىڭ ورىنباسارى تۇتىنۋشىلاردان كەلىپ تۇسەتىن جالپى ءوتىنىش, شاعىم 2021 جىلمەن سالىستىرعاندا 2% ازايعانىن ايتىپ وتىر.
ايانا توعانبەك
