«نۇر-انا الەمى» قوعامدىق بىرلەستىگىنىڭ ءتورايىمى باقىتجامال ماكسيلوۆانىڭ ايتۋىنشا, «قىمىزمۇرىندىق» ءداستۇرى 1994 جىلدان بەرى دارىپتەلۋدە.
– ءىس-شارانى وتكىزۋدەگى باستى ماقسات – ۇمىت بولعان ءداستۇردى جاڭعىرتۋ جانە كەلەشەك ۇرپاققا ناسيحاتتاۋ. ودان بولەك «سابانتوي» ءداستۇرىن دە اتاپ وتەمىز. بۇل جوبانى زارا قوجاحمەتوۆا انامىز باستاعان ەدى. «نۇر-انا الەمى» قوعامدىق بىرلەستىگى مۇشەلەرى وسى مەرەكەنى جالعاستىرىپ كەلەمىز, – دەيدى ب.ماكسيلوۆا.
ءىس-شارا بارىسىندا قازاقستان مۇسىلماندارى ءدىني باسقارماسىنىڭ پاۆلودار وبلىسىنداعى وكىل يمامى جولداس قوسپاق ۇلى باتا بەرىپ, قىمىزدان ءدام تاتتى. وبلىستىق ج.ايماۋىتوۆ اتىنداعى قازاق مۋزىكا-دراما تەاترىنىڭ ارتىستەرى ساحنالىق
قويىلىم قويىپ, اجەلەر ءانسامبلى جينالعان قاۋىمعا اسەم اندەردەن شاشۋ شاشتى. جينالعاندار اسىق اتۋدان باق سىنادى.
ءىس-شارانى وتكىزۋگە قالالىق اكىمدىك قولداۋ كورسەتكەنىن اتاپ وتكەن ءجون. جەرگىلىكتى جوعارى وقۋ ورىندارى دا اتسالىسىپ, ءار ۋنيۆەرسيتەت 250 ليتر قىمىز بەن 50 كيلو باۋىرساقتان اكەلگەن.
پاۆلودار وبلىسى
